އިއްޒުއްދީން މަގުގައި ހުންނަ ކެފޭ ޑިޕަބްލިކް ތެރޭގައި މާރާމާރީ ހިންގި މައްސަލައިގައި ސ. މަރަދޫފޭދޫ / ރަށްދެބައިގެ، އިބްރާހީމް ފައިހް ނިޒާމްގެ މައްޗަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.

މި މައްސަލައިގައި އޭނާގެ މައްޗަށް 3 ދައުވާއެއް އުފުލާފައިވެއެވެ. އެއީ ޤާނޫނު ތަންފީޒު ކުރާ މުވައްޒަފެއްގެ މަސައްކަތަށް ޤަސްތުގައި ހުރަސް އެޅުމާއި، ގައިގާ އަތްލުމާއި، ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.  

އަންގާރަ ދުވަހު ބޭއްވި އަޑުއެހުމުގައި ވަނީ މި މައްސަަލައިގައި ދައުލަތުން ހުށަހަޅާފައިވާ ސިއްރު ހެކިވެރިއެއްގެ ހެކިބަސް ނަގާފައެވެ.

ހެކިބަސް ދޭން ފަށަމުން ސިއްރު ހެކިވެރިޔާ ބުނީ، އޭނާ މިހާރު ގިނަ ކަންކަން ހަނދާނުގައި ނެތް ކަމަށެވެ. އެގޮތުން މި މާރާމާރީގައި މީހަކަށް އަނިޔާވިކަން ނުވަތަ ނޫންކަންވެސް ހަނދާނުގައި ނެތްކަމަށް ދައުލަތުން ސުވާލު ކުރުމުން އޭނާ ބުންޏެވެ.

އެހިސާބުން ދައުލަތުން ވަނީ ހެއްކާބެހޭ ޤާނޫނާ ޙަވާލާދީ، ހެކިވެރިޔާގެ ހަނދާން ތާޒާ ކޮށްލުމުގެ ގޮތުން ހެކިވެރިޔާގެ ބަޔާން ދައްކާލުމުގެ ފުރުސަތަކަށް އެދިފައެވެ. އެއީ މިދިޔަ އަހަރުގެ ޖެނުއަރީ މަހު އޭނާ ދީފައިވާ ބަޔާނެކެވެ.

ބަޔާން ކިޔާލުމަށްފަހުވެސް ހެކިވެރިޔާ ބުނީ މި ޙާދިސާއާ ގުޅޭ ކަންކަން އޭނާގެ ހަނދާނުގައި ނެތް ކަމަށެވެ. އެގޮތުން މީހަކަށް ގެއްލުން ލިބުނުކަން ނުވަތަ ނޫންކަން، އަދި މި މާރާމާރީގައި ކިތައް މީހުން ޙަރަކާތްތެރިވިކަންވެސް ހަނދާނުގައި ނެތް ކަމަށާއި، ޙާދިސާ ހިނގި ކަން ފިޔަވައި އިތުރު ކަމެއް މިވަގުތު ހަނދާނުގައި ނެތްކަން ހެކިވެރިޔާ ފާހަގަކުރިއެވެ.

އެކަމާ ގުޅިގެން ދައުލަތުން ބުނީ، ބަޔާން ބެލުމަށްފަހު އެކަންކަން ހެކިވެރިޔާގެ ހަނދާނުގައި ހުންނާނެކަން ސަބަބުވެރި އިންސާނެއްގެ ނަޒަރުން ބަލާއިރު ޤަބޫލު ކުރެވޭ ކަމަށެވެ.

އެހެންކަމުން ދައުލަތުން ވަނީ އެއީ އެއްބާރުލުން ނުދޭ ހެއްކެއްކަމަށް ކަނޑައަޅައި، ހެއްކާބެހޭ ޤާނޫނުގައި ކަނޑައަޅާފައިވާ ގޮތަށް "ހޮސްޓައިލް ވިޓްނަސް" އާ ސުވާލު ކުރާ ގޮތަށް ކުރިއަށް ގެންދިއުމުގެ އިޒްނައަކަށް އެދިފައެވެ. އެކަމަށް ޝަރީއަތުންވެސް ހުއްދަ ދީފައިވެއެވެ.

އެހިސާބުން ދައުލަތުން ވަނީ ބަޔާނާ ޙަވާލާދީ "ލީޑިންގ ސުވާލު" ކޮށްފައެވެ. އެ ހުރިހާ ސުވާލަކަށްވެސް ހެކިވެރިޔާ ޖަވާބު ދީފައިވަނީ "ނޭނގޭ" އަދި "ހަނދާނެއް ނެތް" މި އިބާރަތް ބޭނުން ކޮށްގެންނެވެ.

އެހެންނަމަވެސް ހެކިވެރިޔާގެ ބަޔާނުގައި ޙާދިސާ ހިނގާދިޔަ ގޮތާ ގުޅޭގޮތުން އޭރު ގިނަ ތަފްސީލުތަކެއް ހިއްސާކޮށްފައިވެސް ވެއެވެ. އެގޮތުން މާރާމާރީގައި ބައިވެރިވި މީހުންގެ ސިފަތަކާއި، އަނިޔާވި މީހާއާ ގުޅޭ ގިނަ ތަފްސީލުތަކެއްވެސް އޭރު ތަހުގީގަށް ދީފައިވާ ބަޔާނުގައި ކިޔާދީފައިވެއެވެ.

އޭރު ހެކިވެރިޔާ ކިޔާދީފައިވާ ގޮތުގައި އޭނާއަކީ އެ މާރާމާރީ ހުއްޓުވުމަށްވެސް ޙަރަކާތްތެރިވި މީހެކެވެ.

ޝަރީއަތުން ވަނީ އެއީ އޭނާ ފުލުހުންނަށް ދީފައިވާ ބަޔާނެއްތޯ އަދި ބަޔާނުގައި ވަނީ ހެކިވެރިޔާގެ ސޮޔާއި އިނގިލީގެ ނިޝާންތޯވެސް ސުވާލު ކުރައްވާފައެވެ. އެ ސުވާލުގެ ޖަވާބުގައިވެސް ހެކިވެރިޔާ ބުނީ އޭނާއަށް ނޭނގޭ ކަމަށެވެ.

ޝަރީއަތުން ވަނީ ހެކިވެރިޔާ ތަހުގީގަށް ދީފައިވާ ބަޔާނުގެ ވީޑިއޯ ރެކޯޑިންގ 5 ދުވަހުގެ ތެރޭގައި ޝަރީއަތަށް ހުށަހެޅުމަށް ދައުލަތަށް އަންގަވާފައެވެ.

ދެން އޮންނާނީ މި މައްސަލައިގައި ހިމެނޭ ދިފާއީ ހެކިންގެ ހެކިބަސް ނެގުމެވެ.

މީގެ އިތުރުން، 24 ފެބްރުއަރީ 2023 ވަނަ ދުވަހު 21:30 ހާއިރު ކ. މާލެ، މާފަންނު މުރަނގަ މަގުގައި ހުންނަ "ކްލާސާ" ފިހާރަ ތެރެއަށް ބަޔަކު މީހުންވަދެ އެ ފިހާރަތެރޭގައި ހުރި ސ. ހިތަދޫ، އިޒުމީރު، މުޙައްމަދު އަޙްމަދު ދީދީ އަށް ތޫނު ހަތިޔާރުން ހަމަލާދީ މަރާލި މައްސަލައިގައިވެސް ފައިޙްގެ މައްޗަށް ދައުވާކޮށްފައިވެއެވެ.