ޗައިނާގެ ދެކުނުހުޅަނގު ސިޗުއާން ޕްރޮވިންސަށް ރިކްޓާ މިންގަނޑުން 7.0  ގައި އައި ބިންހެލުމުގައި މިހާތަނަށް މަދުވެގެން 19 މީހުން މަރުވެފައިވާ ކަމަށާއި އަދި 250 އާ ގާތް ކުރާ އަދަދަކަށް މީހުން ޒަޚަމްވެފައިވާ ކަމަށް އޮފިޝަލުން ބުނެފިއެވެ. 

 ބިންހެލުން އައީ ޕްރޮވިންސްގެ ވެރިރަށް ޗެންދޫގެ އުތުރުން 300 ކިލޯ މީޓަރު (180 މޭލު) ދުރުން 10 ކިލޯ މީޓަރު ބިމު އަޑިއަށް ކަމަށްވާއިރު ބިންހެލުން އައި ސަރަހައްދަކީ ނުވަތަ އެއާ ގާތް ސަރަހައްދަކީ ފަތުރުވެރިންގެ މެދުގައި މަގުބޫލު މަންޒިލެކެވެ.

ބިންހެލުން އައި ސަރަހައްދުން މިހާތަނަށް 45000 ފަތުރުވެރިން ރައްކާތެރި ހިސާބުތަަކަށް ގެންދެވިފައިވެއެވެ. މަރުވި މީހުންގެ ތެރޭގައި ފަތުރުވެރިން ހިމެނޭއިރު މަރުވީ ކިތައް ފަތުރުވެރިކަމެއް ނޭނގެއެވެ.

ޗައިނާގެ ސިޗުއާން ޕްރޮވިންސަކީ އާއްމުކޮށް ބިންހެލުން އަންނަ ސަރަހައްދެއް ކަމަށްވާއިރު ދެހާސް އަށް ވަނަ އަހަރު އެ ޕްރޮވިންސަށް އައި ބިންހެލުމެއްގައި 70،000 އަށް ވުރެ ގިނަ މީހުން މަރުވެފައިވެއެވެ.

މީހުން ސަލާމަތްކުރުމުގެ މަސައްކަތުގައި 1200 މީހުން ދަނީ ހަރަކާތްތެރި ވަމުންނެވެ.