ނުދައްކާ ހުރި ބިލްތަކަށް ޕްރައިވެޓް ސެކްޓަރއާ އެސްއޯއީތަކާއެކު ސަރުކާރުގެ މުއައްސަސާތަކަށް 11.3 ބިލިއަން ރުފިޔާ ދައްކައިފި

ޕްރައިވެޓް ސެކްޓަރގެ ނުދައްކާ ހުރި ބިލްތަކަށް މިހާތަނަށް 4.9 ބިލިއަން އަދި އެސްއޯއީތަކާއެކު ސަރުކާރުގެ މުއައްސަސާތަކަށް 6.4 ބިލިއަން ރުފިޔާ ދައްކާފައިވާ ކަަމަށް ފިނޭންސް މިނިސްޓަރު ޑރ މުހައްމަދު ޝަފީގު ވިދާޅުވެއްޖެއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު ޝަފީގު ވިދާޅުވީ ދައުލަތުން ނުދައްކާ ހުރި ބިލްތަކަށް ފައިސާ ދައްކަމުންދާ ކަމަށާއި، މިހާތަނަށް ޕްރައިވެޓް ސެކްޓަރގެ ނުދައްކާ ހުރި ބިލްތަކަށް 4.9 ބިލިއަން އަދި ސަރުކާރުގެ އެސްއޯއީތަކާއެކު ސަރުކާރުގެ މުއައްސަސާތަކަށް 6.4 ބިލިއަން ރުފިޔާ ދައްކާފައިވާ ކަަމަށެވެ.

މިނިސްޓަރު ޝަފީގު ވިދާޅުވީ ފައިސާ ހޯދައިގެން ފައިސާ ދޫކުރުމުގެ މަސައްކަތް ކުރަމުން ގެންދާ ކަމަށާއި، މަސައްކަތް ކުރަނީ ވީހާ ވެސް އަވަހަށް ބިލްތަކަށް ފައިސާ ދައްކަން ކަމަށެވެ. ކުރެވިފައިވާ މަސައްކަތުން ފައިސާ ނުދެއްކި ހުރި މުއްދަތު ކުރުކުރެވިފައިވާ ކަމަށް މިނިސްޓަރު ޝަފީގު ވިދާޅުވިއެވެ. އަދި ވިދާޅުވީ މިހާރު ވެސް ދެ ބިލިއަން ރުފިޔާ ބިލްތަކަށް ދައްކަން ޖެހިފައިވާ ކަމަށެވެ.

މިނިސްޓަރު ޝަފީގު ވިދާޅުވީ ސަރުކާރު ހިއްސާވާ ކުންފުނިތަކުގެ މުވައްޒަފުންނަށް މުސާރަ ދިނުމަށްޓަކައި ކޮންމެ މަހަކު ވެސް މުސާރަ ނުދެވޭ ހާލަތަކަށް ނުގޮސް ވޭތޯ ވަރަށް ބޮޑަށް ބަލާ ކަމަށެވެ. އެއުސޫލުގެ ތެރެއިން ސަބްސިޑީ ދެމުން ގެންދާ ކަމަށް މިނިސްޓަރު ޝަފީގު ވިދާޅުވިއެވެ. އަދި ކުންފުނިތަކަށް ބޭނުންވާ ފައިސާ ހޯދުމަށް އެކުންފުނިތަކުން މަސައްކަތްތައްކޮށް، ހަރުދަނާ ކުރުމަށް ބާރު އަޅާ ކަމަށް މިނިސްޓަރު ޝަފީގު ވިދާޅުވިއެވެ.