ސާފިން ޗެމްޕިއަންސް ޓްރޮފީ 2017ގެ ހުޅުވުމުގެ ރަސްމިއްޔާތު ކުލަގަދަކޮށް ބާއްވައިފި

ހަތް ވަނަ ފޯ ސީޒަންސް މޯލްޑިވްސް ސާފިން ޗެމްޕިއަންސް ޓްރޮފީގެ ހުޅުވުމުގެ ރަސްމިއްޔާތު ކުލަގަދަކޮށް ބާއްވައިފި އެވެ.

ޖުމްލަ ހަ ރާޅާއެޅުންތެރިން ވާދަކުރާ މި މުބާރާތަކީ މުޅި ދުނިޔޭގައި ވެސް ފާހަގަކޮށްލެވޭ އެންމެ އަގުބޮޑު ސާފިން މުބާރާތެވެ.

މިފަހަރުގެ މުބާރާތުގައި ބައިވެރިވަނީ ހަވާއީގެ ރޮސް ވިލިއަމްސް، ބްރެޒިލްގެ މާޔާ ގެބްރިއާ، އޮސްޓްރޭލިއާގެ ޑިފެންޑިން ޗެމްޕިއަން ތާޖް ބްރޯ އަދި އެމެރިކާގެ ދެ ރާޅާ އެޅުންތެރިންކަމަށްވާ ސީޖޭ ހޮބްގުޑް އާއި ރޮބް މަޗަޑޯ އެވެ.

މީގެއިތުރުން މި މުބާރާތުގައި ރާއްޖޭގެ އިސްމާއިލް މިގްލާލް (ކުޑަ އިއްސެ) ވެސް ބައިވެރިވާނެ އެވެ. އޭނާ ވަނީ ރާއްޖޭގެ ތިން ގައުމީ މުބާރާތް ކާމިޔާބުކުރުމުގެ އިތުރުން ބައިނަލްއަގުވާމީ މުބާރާތްތަކުގައި ވެސް ވާދަކޮށް ކާމިޔާބީތަކެއް ހޯދާފައެވެ.

މުބާރާތާ ބެހޭ ގޮތުން ކުޑަ އިއްސެ ބުނީ މާލޭ ރާޅުގަނޑު ބަންދުކުރި ހިސާބުން ފެށިގެން އެއްވެސް މުބާރާތަކަށް ތައްޔާރުވާން ފުރުސަތު ނުލިބޭ ކަމަށާއި، އެގޮތުން މި މުބާރާތަށްވެސް ރަނގަޅު ގޮތުގައި ތައްޔާރުވެވިފައިނުވާ ކަމަށެވެ.

ކުޑަ އިއްސެ ބުނީ ބޭރުގެ މަޝްހޫރު ރާޅާ އެޅުންތެރިންނާއެކު ރާޅާ އަޅަން ފުރުސަތު ލިބުމުން ވަރަށް އުފާވެފައި ހުރިކަމަށާއި، މިއީ ވަރަށް ރަނގަޅު ފުރުސަތެއް ކަމަށެވެ. އެގޮތުން ރަނގަޅު ހިސާބަކަށް ދާން ކުރެވެން އޮތް ހުރިހާ މަސައްކަތެއް ކުރާނެ ކަމަށް އޭނާ ވަނީ ބުނެފައެވެ.

މި މުބާރާތުގައި ތިން ޑިވިޝަނެއް ހިމެނޭއިރު، އެއްވަނަ ހޯދާ ފަރާތަކަށް 25,000 ޑޮލަރުގެ އަގުހުރި ފައިސާގެ އިނާމެއް ލިބެއެވެ. މުބާރާތް އަންނަ ހުކުރު ދުވަހު ފަށާނެއެވެ.