އަދުގެ ސަރުކާރުން މަޝްވަރާގެ މަތިން ރައްޔިތުންގެ ހިޔާލާއެކު ކަންކުރާނެ ސަރުކާރެއް ދަނީ ވަކާލާތު ކުރަމުންނެވެ. ނަމަވެސް އެންމެފަހުން އެތައް ސަތޭކަ ބައެއްގެ އާމްދަނީއާ ގުޅިފައިވާ ޓެކްސީގެ ހިދުމަތުގެ ބޮޑެތި ނިންމުންތަކެއް ނިންމާ އެކަން ތަންފީޒުކުރުމަށް ފުލުހުން ނެރުނު އިރު ޓެކްސީ ޑްރައިވަރުން ކައިރިން ހޭވެސް އަހާނުލާކަމަށް ވަނީ ތުހުމަތުކުރެވިފައެވެ.

އެންމެފަހުން ނިކަމެތި ރައްޔިތުން މި ދާންޖެހުނީ ރައްޔިތުންގެ ހާދިމުކައިރިއަށް ކަންބޮޑުވުންތައް ހިފައިގެންނެވެ. މިކަމާއި ގުޅިގެން ރާއްޖެއެމްވީއާއި ވާހަކަ ދެއްކި ޓެކްސީ ޑްރައިވަރު އިބްރާހީމް ނިޔާޒު ބުނީ، މިނިސްޓަރަށް ފުރަތަމަ ހުށަހެޅި ކަންބޮޑުވުންތަކަކީ، އެއަރޕޯޓް ޓެކްސީ ކިއު ހައްލުކުރުމަށްޓަކައި މިނިސްޓްރީން ގެނައި ބަދަލަކީ އެތަނުގައި ފުލުހުން ބޭތިއްބުން ކަމަށެވެ. އަދި ފުލުހުން ލައްވާ ކިއު ތަރުތީބުން ދަތުރަކަށް ޓެކްސީއެއް ދޫކުރަމުންދާ ކަމަށާއި، ޓެކްސީތަކުގެ ތެރޭގައި 7 ސީޓާއި 9 ސީޓުގެ ވެހިކަލް ހިމެނޭ އިރު، އެ އުޅަނދުތަކަށް ވެސް ނަގަން މަޖުބޫރުކުރުވަނީ އާދައިގެ ޓެކްސީއަކަށް ނަގާ އަގު ކަމަށެވެ. މީގެއިތުރުން ނިޔާޒު ބުނީ ބޮޑެތި އުޅަނދުތަކަށް ޓެކްސީ ސެންޓަރުތަކުން ދަތުރުތަކަށް އަގު ކަނޑައަޅާފައިވީ ނަމަވެސް، މިހާތަނަށް ވެސް ޓްރާންސްޕޯޓް މިނިސްޓްރީން އެ އަގުތައް ގެޒެޓްކޮށްފައި ނުވާ ކަމަށެވެ.

ނިޔާޒު ބުނޫ އެދިފައިވާނީ ދުއްވާ ވޭންތަކަށް ކުރިން އޮންނަ ގޮތަށް ވަކި ސްލޮޓެއް ކަނޑައަޅައިދިނުމާއި، މިހާރު ޑޮމެސްޓިކް ޓާމިނަލަށް ވަދެވޭ ގޮތަށް އޮތްނަމަވެސް، ޓެކްސީތަކަށް ދާންޖެހޭ ރޫޓް ދިގުވުމުގެ މައްސަލައާ ގުޅިގެން އެއަރޕޯޓުގެ ހާލަތު ބަދަލުކޮށްދީ ފުލުހުންގެ ސަމާލުކަމަށް އެކަން ގެނައުމެވެ.

މީގެ އިތުރުން ޓެކްސީ ފެއަރ ރޭޓުގެ އަގުތަކުގައި ވޭން ދުއްވާ އަގުވެސް މިނިސްޓްރީން ކަނޑައަޅާ ގޮތެއްގެ މަތިން ހިމަނައިދިނުމަށްވެސް އެދިފައިވާނެކަމަށް ނިޔާޒު ބުންޏެވެ. މީގެ އިތުރުން ޑޮމެސްޓިކަށް ހަމަޖައްސާފައިވާ އަގަކީ އެކަށީގެންވާ އަގަކަށް ނުވާތީ މީޓަރު ހަރުކުރުން ނުވަތަ އަގަށް ބަދަލު ގެނައުމަށް އެދިފައިވާނެ ކަމަށް ނިޔާޒް ބުންޏެވެ.

ނިޔާޒު ބުނީ އަގުތަކަށް ކުއްލި ބަދަލެއް ގެނައި އިރު އަދި މޫވްމެންޓަށް ބަދަލު ގެނައި އިރު ޓެކްސީ ޑްރައިވަރުންނާއި އެއްވެސް ގޮތަކަށް މަޝްވަރާކޮށްފައި ނުވާ ކަމަށެވެ. އަދި މިނިސްޓަރާއި ބައްދަލުކުރަން މިނިސްޓްރީއަށް ދިޔައީ އެކަމާއި މަޝްވަރާކުރަން އިސްވެ ބޭނުންވެގެން ކަމަށެވެ. އެގޮތުން 8 މެއިގައި ފުރަތަމަ ބައްދަލުވުން ބާއްވާފައިވާ ކަމަށާއި، އެދުވަހުން އެދުވަހަށް ހައްލުކޮށްދެއްވާނެކަމަށް މިނިސްޓަރު ވިދާޅުވި ކަންކަން ހައްލުނުވުމުން 12 މެއިގައި ދެވަނަ ބައްދަލުވާން ދިޔަ ކަމަށާއި، އަނެއްކާވެސް ދިން ޖަވާބަކީ ދެދުވަހެއްގެ ތެރޭގައި ކަންކަން ހައްލުކުރައްވާނެ ވާހަކަ ކަމުގައި ނިޔާޒް ބުންޏެވެ.

ނިޔާޒް ބުނީ ސަރުކާރުގެ ވިސްނުމަކީ ޓެކްސީތައް ސަރުކާރުން ގެނެސްގެން ޑްރައިވަރުން ހިމަނައިގެން އެކަން ކުރުމެވެ. އަދި ޓެކްސީ ޑްރައިވަރުންގެ ކަންބޮޑުވުމަކީ ޓެކްސީ ކުރުމަކީ އާމްދަނީ ހޯދުމަށް ކުރަމުން އަންނަ މަސައްކަތަށް ވެފައި އަދި އަގުބޮޑުކޮށް ޓެކްސީ ގެނެސް އެއަށް ފައިސާ ދައްކަމުން ދާއިރު، ސަރުކާރުން މިކަމުގެ ތެރެއަށް ވަންނާތީ، އެކަމުގެ ކަންބޮޑުވުމެވެ.

ނިޔާޒު ވިދާޅުވީ ޓެކްސީ ޑްރައިވަރުންގެ އެންމެ ބޮޑު ކަންބޮޑުވުމަކީ ލިބެންޖެހޭ އިހްތިރާމް ނުލިބުމެވެ. އެގޮތުން ޓެކްސީގެ އަގުތައް ކޮންޓްރޯލްކުރި ނަމަވެސް ސަރުކާރުންދޭ ފުލެޓްތައް ބޮޑު އަގުގައި ވިއްކަމުންދާއިރު އެކަން ކޮންޓްރޯލް ނުކުރާކަމަށް އޭނާ ބުންޏެވެ. އަދި ޓެކްސީ ޑްރައިވަރުންނަށް ވެސް އަގުހެޔޮކޮށް ދަތުރު ކުރެވޭނީ ޓެކްސީ ޑްރައިވަރުންގެ ބޮލުގައި އެޅިފައިވާ ބޮޑު ކުލިތައް ވެސް ކޮންޓްރޯލް ކުރެވިގެން ކަމަށް އޭނާ ބުންޏެވެ.

ސަރުކާރުން ވަނީ އެއަރޕޯޓް ޓެކްސީ ކިއުއަށް ބަދަލުތަކެއް ގެނެސް ވަކިގޮތަކަށް ޓެކްސީ ޑްރައިވަރުން އަމަލުކުރަންޖެހޭ ގޮތަށް ކަންކަން ބަދަލުކޮށްފައެވެ. އަދި ޓެކްސީ ޑްރައިވަރުންގެ ކަންބޮޑުވުން ހުރިނަމަވެސް، މިހާތަނަށް ވެސް އެކަންކަމަށް އެދެވޭ ހައްލެއް ގެނައުމަށް ސަރުކާރުން މަސައްކަތް ނުކުރާކަމުގެ ޝަކުވާތައް ޓެކްސީ ޑްރައިވަރުން ދަނީ ކުރަމުންނެވެ.