ނިމިދިއަ ރައީސް ސޯލިހް ގެ ސަރުކާރުގައި އަމާޒުހިފާފައި އޮތީ އާރްޓީއެލް ފެރީގެ މަޝްރޫއު 2027 ވަނަ އަހަރު ނިންމުމަށް ކަމަށާއި ނަމަވެސް ރައީސް މުއިއްޒުގެ މި ސަރުކާރުގެ އަމާޒަކީ މިއަހަރު ނިމުމުގެ ކުރިން މި މަޝްރޫއުތައް ނިންމާލުމަށް ކަމަށް ޓްރާންސްޕޯޓް މިނިސްޓަރު އަމީން ވިދާޅުވި ވިދާޅުވުން ކުރީގެ ސްޓޭޓް މިނިސްޓަރ އަކްރަމް ކަމާލުއްދީން ދޮގުކުރައްވައިފި އެވެ.

މިނިސްޓަރ އަމީންގެ ވާހަކަތަކަށް ރައްދު ދެއްވައި އަކުރަމް ކަމާލުއްދީން އެކްސްގައި ކުރެއްވި ޕޯސްޓެއްގައި ވިދާޅުވީ މިނިސްޓަރ އަމީން އެ ހައްދަވަނީ ކަނޑައެޅިގެން އިތުރުފުޅެއް ކަމަށެވެ.

އަކްރަމް ވިދާޅުވީ އާރްޓީއެލް ފެރީގެ ނިޒާމަކީ ރައީސް ސޯލިހުގެ ސަރުކާރުން 2022 ވަނަ އަހަރުގެ ޖޫންމަހުގައި ތައާރަފްކުރި ނިޒާމެއް ކަމަށެވެ. އަދި އެ ނިޒާމުގެ ދަށުން 2024 ވަނަ އަހަރު ނިމުމުގެ ކުރިން ހައި ސްޕީޑް ފެރީގެ ޚިދުމަތް މުޅި ރާއްޖެއަށް ގުޅާލުމަށް ރައީސް ސޯލިހް ގެ ސަރުކާރުން ނިންމާފައިވާ ކަމަށް ވެސް އަކްރަމް ވިދާޅުވިއެވެ. އަދި އެއީ ފަހަރެއްގައި ވެސް ރައީސް މުއިއްޒުގެ މި ސަރުކާރުގެ ޕްލޭނެއް ނޫން ކަމަށް ވެސް އޭނާ ވިދާޅުވިއެވެ.

އަކްރަމް ވިދާޅުވީ މިދިއަ ސަރުކާރުން ކޮށްފައި ހުރި މިފަދަ ބޮޑެތި މަޝްރޫއުތައް މި ސަރުކާރުން އަމިއްލަކުރަން މަސައްކަތް ކުރުމަކީ ވަރަށް ޒިންމާދާރުކަން ކުޑަ ޚުދުމުހުރާތު އަމަލެއް ކަމަށެވެ. އަދި އެފަދަކަންކަމުގައި މި ސަރުކާރުން ބޮޑެތި ދޮގުތައް ހައްދަވަމުން ގެންދަވާކަން އެއީ ހަގީގަތެއް ކަމަށް ވެސް އަކްރަމް ވިދާޅުވިއެވެ.

އަކްރަމް އިތުރަށް ވިދާޅުވީ އެ އަމާޒަށް މިސަރުކާރުން ވާސިލް ނުވެވުނީ އެ މަޝްރޫއަށް އިތުރަށް ބޭނުންވާ ލޯންޗު ތައް ހޯދަން ބޭނުންވާ ފައިސާ ހޯދުމުގައި މި ސަރުކާރު ފެއިލް ވުމުންނެވެ. އަދި މި މަޝްރޫއަށް އިންޑިއާ ގެ އެހީ ހޯދަންޖެހުނީ މަޝްރޫއަށް ބޭނުންވާ ލޯންޗުތައް ސަރުކާރަށް ނުހޯދުމުން ކަމަށް އެނާ ތުހުމަތު ކުރެއްވި އެވެ.

ހައިސްޕީޑް ފެރީގެ ނިޒާމަކުން މުޅި ރާއްޖެ ގުޅާލަން މިދިޔަ ސަރުކާރުގައި ހިންގި ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ނިޒާމު އިތުރަށް ފުޅާކުރަން ކަމަށް ބުނެ އިންޑިއާ ސަރުކާރުން 100 މިލިއަން ރުފިޔާ ދޭން ނިންމިކަން މި ސަރުކާރުން ހާމަކޮށްފައި ވަނީ އާދިއްތަ ދުވަހުގައެވެ.

މި ހަފްލާގައި، މިނިސްޓަރު އަމީން ވިދާޅުވީ ރާއްޖޭގެ ނުވަ އަތޮޅެއްގެ 81 ރަށެއް ގުޅާލާ، ހަލުވި ސްޕީޑް ފެރީގެ ނިޒާމެއް ގާއިމުކުރުމުގެ މަސައްކަތް ސަރުކާރުން ހަލުވިކަމާއެކު ކުރިއަށް ގެންދާނެ ކަމަށެވެ. މިއަދު ސޮއިކުރެވުނު ފަހުމުނާމާގެ ސަބަބުން މި ހިދުމަތްތައް އިތުރަށް ހަރުދަނާވެ، ދެގައުމުގެ ގުޅުން އިތުރަށް ބަދަހި ވެގެންދާނެ ކަމަށް ވިދާޅުވި އެވެ.

އާދިއްތަ ދުވަހު މިކަމަށް ބޭއްވުނު ރަސްމިއްޔާތުގައި ސޮއިކުރެއްވި 13 އެމްއޯޔޫ އެއްގައި . އާރުޓީއެލް ފެރީތައް ބަނުމަށް 100 މިލިޔަން ރުފިޔާ ގެ މާލީ އެހީތެރިކަން ދެއްވާފައިވާ ކަމަށާއި އަދި އާރުަޓީއެލް ފެރީގެ ނިޒާމު ކުރިއެރުވުމަށް އިންޑިއާ ސަރުކާރުހެ އެހީތެރިކަމާއެކު 13 ޕްރޮޖެކްޓެއް ކުރިއަށް ދާނެކަމަށް ވެސް ހާމަކުރެއްވި އެވެ.