ލިސްޓް ފައިނަލް ކުރާނީ ހައުސިން މިނިސްޓްރީން
މިދިޔަ ސަރުކާރުން ފެށި ގެދޮރުވެރިޔާ ފްލެޓްތައް
ހުޅުމާލެ ފޭސް-2 ގައި އިމާރާތް ކުރަމުންދާ 4000 ފްލެޓުތަކުގެ މަސައްކަތް އެއްކޮށް ނިމޭނީ އަންނަ އަހަރުގެ މެދުތެރޭގައި ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުގެ ޖަލްސާގައި މެންބަރަކު ކުރި ސުވާލަކަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ ފްލެޓުތައް އިމާރާތް ކުރުމުގެ މަސައްކަތް ކުރިއަށްދާ ކަމަށާއި، މިމަޝްރޫއުގެ މަސައްކަތްތައް ނިމޭނެ ކަމަށް ބެލެނީ އަންނަ އަހަރުގެ މެދުތެރޭގައި ކަމަށެވެ. އެގޮތުން އަންނަ އަހަރުގެ އޮގަސްޓު މަހުގެ ތެރޭގައި މަސައްކަތް ނިމޭނެ ކަމަށް ލަފާ ކުރެވޭ ކަމަށް މިނިސްޓަރު ހައިދަރު ވިދާޅުވިއެވެ.
ފްލެޓު ލިސްޓަށް އިޝާރާތް ކުރައްވައި މިނިސްޓަރު ހައިދަރު ވިދާޅުވީ އެންޓި ކޮރަޕްޝަން ކޮމިޝަން (އޭސީސީ)އިން ކަނޑައަޅާފައިވާ ލިސްޓަކީ ފައިނަލް ލިސްޓު ނޫން ކަމަށާއި، ލިސްޓް ފައިނަލް ކުރާނީ ހައުސިން މިނިސްޓްރީން ކަމަށެވެ. އަދި ފްލެޓުތައް ދޫކުރެވޭނީ ލިސްޓު މުރާޖައާ ކުރުމަށްފަހު ކަމަށް މިނިސްޓަރު ހައިދަރު ވިދާޅުވިއެވެ.
މީގެ އިތުރުން މިނިސްޓަރު ހައިދަރު ވަނީ މަޖިލީހުގައި މާތްﷲ ގަންދީ ހުވާކޮށް މި ސަރުކާރުގެ ވައުދަކީ އެބަޔަކަށް ލިބިފައިވާ ހައްގެއް އެބަޔަކަށް ރައްދުކޮށް ދިނުން ކަމަށް ވިދާޅުވެފައެވެ. އެގޮތުން ކުރީ ސަރުކާރުން ދޫކޮށްފައިވާ ގޯތިތައް ވެސް ދޫކުރާނެކަމުގެ ޔަގީންކަން މިނިސްޓަރު ހައިދަރު ދެއްވިއެވެ.
29 ޖުލައި 2024 ގައި ޕެޓިޝަން ކޮމެޓީގައި މިނިސްޓަރު ހައިދަރު ވިދާޅުވީ ފްލެޓު ލިސްޓު އޮކްޓޯބަރު މަސްތެރޭގައި އާއްމުކުރާނެ ކަމަށެވެ.
މިނިސްޓަރު ހައިދަރު ވިދާޅުވީ 32 ޓަވަރުގެ މަސައްކަތްތައް ކުރިއަށްދާ ކަމަށާއި، ފުރަތަމަ 6 ޓަވަރުގެ މަސައްކަތް ނިމޭނީ އޮކްޓޫބަރު މަސް ތެރޭގައި ކަމަށެވެ. އެޓަވަރުތަކުގެ މަސައްކަތް ނިމުމާއެކު ލިސްޓު ވެސް އާއްމުކުރާނެ ކަމަށާއި، ފްލެޓުތައް ހުސްކޮށް ނުބަހައްޓާނެ ކަމަށް މިނިސްޓަރު ހައިދަރު ވިދާޅުވެފައިވެއެވެ.
