ޖުލައި މަހު ފަށާނެ ކަމަށް ބުނި ޓެކްސީ ލައިންގެ ޚިދުމަތް އޮގަސްޓު މަހަށް ފަސްވެއްޖެ
އެ ޚިދުމަތް ދިނުމަށް ހަވާލު ކޮށްފައި ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާ.
ޓްރާންސްޕޯޓް މިނިސްޓަރު މުޙައްމަދު އަމީން
ސަރުކާރުން ފަށަން ނިންމާފައިވާ ޓެކްސީ ލައިންގެ ޚިދުމަތް ކުރިއަށް އޮތް ޖުލައި މަހުގެ ތެރޭގައި ފަށާނެ ކަމަށް މީގެ ކުރިން ހާމަކޮށްފައި ވީ ނަމަވެސް، އެ ޚިދުމަތް ފެށުން ލަސް ވެއްޖެ އެވެ.
މާލެ ސަރަަހައްދުގައި ޓެކްސީގެ ޚިދުމަތް ސަރުކާރުން ދިނުމަށް އޮތީ ނިންމައިފަ އެވެ. އަދި އެ ޚިދުމަތް ދިނުމަށް ހަވާލު ކޮށްފައި ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާ އެވެ. އެ ކުންފުންޏާ އެ މަސައްކަތް ހަވާލު ކޮށްފައި ވަނީ މިއަހަރުގެ ފެބްރުވަރީ މަހުގެ ތެރޭގަ އެވެ.
އޭގެ ފަހުން ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެފައި އޮތީ، އަންނަ ޖުލައި މަހުގެ ތެރޭގައި ޓެކްސީ ލައިންގެ ޚިދުމަތް ފެށޭނެ ކަމަށެވެ. އޭރު މިނިސްޓަރު އަމީން ވިދާޅުވެފައި ވަނީ، ޖޫން މަސް ނިމި އަދި ޖުލައި މަހުގެ ކުރީ ކޮޅު އެ ޚިދުމަތް ފެށޭނެ ކަމަށް އަންދާޒާ ކުރެވޭ ކަމަށެވެ.
އެހެން ނަމަވެސް، ޓެކްސީ ލައިންގެ ޚިދުމަތް ޖުލައި މަހުގެ ކުރީ ކޮޅު ނުފެށި، އޮގަސްޓު މަހުގެ ކުރީ ކޮޅަށް ލަސްވެފައިވާ ކަމަށް މިނިސްޓަރު އަމީން ވަނީ ވިދާޅުވެފަ އެވެ. މިނިސްޓަރު އަމީން އެހެން ވިދާޅުވީ، ދައުލަތުގެ މީޑިއާ އަށް ދެއްވި ޚާއްސަ އިންޓަވިއުއެއްގަ އެވެ.
އެގޮތުން މިނިސްޓަރ އަމީން ވިދާޅުވީ، ޓެކްސީ ލައިންގެ ޚިދުމަތް ފެށުމުގެ ކުރިން ގިނަ މަސައްކަތްތަކެއް ކުރަން ޖެހޭ ކަމަށެވެ. އަދި ހަމައެކަނި އެ ޚިދުމަތް ދިނުމަށް ބޭނުންވާ ކާރު ގެނައުމަކުން ޚިދުމަތް ނުފެށޭނެ ކަމަށް ވެސް އަމީން ވަނީ ވިދާޅުވެފަ އެވެ. އެގޮތުން ޓެކްސީ ލައިންގެ ޚިދުމަތަށް ބޭނުންވާ ޕްރޮޑަކްޝަންގެ މައްސައްކަތް މި މަހު ފަށާނެ ކަމަށް ބުނެފައިވެ އެވެ.
އެކަމާ ގުޅޭ ގޮތުން އެ އިންޓަވިއުގައި މިނިސްޓަރު އަމީން ވިދާޅުވީ، އެއީ ސްޓޯރަކަށް ވަދެ ޝެލްފަކުން ގަންނަން ލިބޭ ކަހަލަ ތަކެއްޗެއް ނޫން ކަމަށެވެ. އެގޮތުން ސަރުކާރުން ބޭނުންވާ ސައިޒުގެ ޓެކްސީ އާއި ބޭނުންވާ ހުރިހާ ސާމާނެއް ހަރުކޮށްގެން ގެންނައިރު، ބައެއް ބަދަލުތަކެއް އަންނާނެ ކަމަށް ފާހަގަ ކުރެއްވި އެވެ.
އެކަން ފާހަގަ ކުރައްވައި އަމީން ވިދާޅުވީ، މިހާރުގެ ޓައިމްލައިން ދައްކާ ގޮތުން، ޓެކްސީ ލައިންގެ ޚިދުމަތް ފެށުން އޮގަސްޓު މަހުގެ ފަހު ކޮޅަށް ވުރެ ލަސް ނުވާނެ ކަމަށެވެ.
ސަރުކާރުން ޓެކްސީ ޚިދުމަތުގެ ތެރެއަށް ވަދެ، ޓެކްސީ ލައިންއެއް ތައާރަފު ކޮށްފައިވާއިރު، ޓެކްސީ ޑްރައިވަރުންގެ ނުރުހުން ވަނީ އެކަމަށް އަމާޒުވެފަ އެވެ. އަދި ސަރުކާރުން މަސައްކަތް ކުރަމުން ދަނީ ޓެކްސީ ވިޔަފާރިވެރިންގެ ވިޔަފާރި ފުނޑާލުމަށް ކަމަށް ބުނެ، ގިނަ ޓެކްސީ ޑްރައިވަރުންތަކެއް ވަނީ އެކަމާ ދެކޮޅަށް އަޑު އުފުލައި، މުޒާހަރާ ވެސް ކޮށްފަ އެވެ.
