ވޭތުވެދިޔަ 24 ގަޑިއިރުގެ ތެރޭގައި މަދުވެގެން 25 ފަލަސްޠީނު މީހުން އިޒްރޭލުގެ ހަމަލާތަކުގައި ޝަހީދު ވެފައިވާ ކަމަށް މީޑިއާ ރިޕޯޓްތައް ބުނެއެވެ.

އަނެއްކޮޅުން ހަމަލާތައް ހުއްޓާލާ ސުލްހަ ގާއިމް ކުރުމަށް އެމެރިކާ އާއި މިސްރާއި ގަތަރުން އިސްވެ މަޝްވަރާގެ މޭޒަށް އިޒްރޭލާއި ހަމާސް ގެ މަންދޫބުން ގެނައުމަށް ކުރަމުންދާ މަސައްކަތުގައި އުއްމީދު އެބައޮތް ކަމަށް އެމެރިކާ އިން ވަނީ ބުނެފައެވެ.

އެމެރިކާގެ ސްޓޭޓް ޑިޕާޓްމަންޓްގެ ތަރުޖަމާނު ވެދާންތް ޕަޓެލް ވިދާޅުވީ، ހަމަޖެހިފައިވާ ގޮތަށް ބުރާސްފަތި ދުވަހު ޣައްޒާގެ ސުލްޙައިގެ މަޝްވަރާތައް ކުރިއަށްދާނެ ކަމަށް އެމެރިކާއިން އުންމީދުކުރާ ކަމަށެވެ

ޣައްޒާ ސިޓީގެ އަލް-ތަބިއީން ސްކޫލަށް އިސްރާއީލުން ދިން ހަމަލާ ދިފާއު ކުރައްވާ އޭނާ ވިދާޅުވީ އެ އިމާރާތުގައި ހަމާސްގެ ބަޔަކު ފޮރުވިފައި ތިބި ކަމަށް ބެލެވޭތީ ދިން ހަމަލާއެއް ކަމަށެވެ.

ހަމާސް އިން ބުނެފައިވަނީ އެ ސްކޫލަކީ ހަމާސް ގެ އެއްވެސް ހަނގުރާމަވެރިޔަކު އުޅޭ ތަނެއް ނޫން ކަމަށެވެ.

ސަތޭކަ އަށް ވުރެ ގިނަ ފަލަސްތީން މީހުން ޝަހީދުވި މި ހާދިސާގައި އިޒްރޭލުން އެ ސްކޫލްގެ ކޮމްޕައުންޑަށް ބޮން އެޅިއިރު ޓާގެޓް ކޮށްފައިވަނީ އެ ތަނުގެ ނަމާދު ކުރާ ބަޔަށް ކަން ފާހަގަ ކުރެވެއެވެ. އިޒްރޭލުން ބޮން އަޅާފައިވަނީ ފަތިސް ނަމާދަށް މީހުން ތިއްބާ ކަމަށް މީޑީއާ ރިޕޯޓްތަކުގައި ވަނީ ފާހަގަ ކޮށްފައެވެ.

ބުރާސްފަތި ދުވަހު ސުލްހައިގެ ވާހަކަތައް ބޭއްވޭނެ ކަމުގެ އުއްމީދު އޮތް ކަމަށް އެމެރިކާއިން ބުނެފައިވާއިރު، ހަމާސް އިން ބުނެފައިވަނީ އައު ވާހަކަތަކެއް ދެއްކުމަށް ބައްދަލުކޮށް ވަގުތު ނަގާލުމުގެ ބަދަލުގައި އެމެރިކާގެ ރައީސް ޖޯ ބައިޑަން ހުށަހެޅުއްވި ހަނގުރާމަ ހުއްޓުމަކަށް ގެނައުމުގެ ހުށަހެޅުމައިގެން ކުރިއަށް ދިއުމަށް އެމެރިކާ، ޤަޠަރު އަދި މިޞްރަށް ގޮވާލާ ކަމަށެވެ.

މެދުއިރުމަތީގައި ހަލަބޮލިކަން އިތުރުވަމުންދާ ވަގުތެއްގައި، ހިޒްބުﷲ އިން ވަނީ އުތުރު އިސްރާއީލުގެ އެކި އަވަށްތަކަށް އަމާޒުކޮށް ގިނަ އަދަދެއްގެ ރޮކެޓް ހަމަލާތައް ދީފައެވެ.

އިސްރާއީލުން ޣައްޒާއަށް ދެމުންދާ ހަނގުރާމައިގައި މަދުވެގެން 39،897 މީހުން ފަލަސްތީނުން ޝަހީދުވެ، 92،152 މީހުން ޒަޚަމްވެފައިވެއެވެ. އޮކްޓޯބަރު 7 ގައި ހަމާސް އިން ދިން ހަމަލާގައި އިސްރާއީލުގެ 1،139 މީހުން މަރުވި ކަމަށް ލަފާކުރެވޭ އިރު، 200 އަށްވުރެ ގިނަ މީހުން ހަމާސް އިން ވަނީ ހައްޔަރު ކޮށްފައެވެ.