ޔުމްނު ވެއްޓުނު މައްސަލައާއި އޮތީ ދިވެއްސަކަށް ވީތީ އޮތް ގުޅުމެއް: މިނިސްޓަރު އަމީން

މާލޭގެ ގެއެއްގެ ފުރާޅު މައްޗަށް ޒުވާން ކުއްޖަކު ވެއްޓުނު މައްސަލައާ އެމަނިކުފާނާއި އޮތް ގުޅުމަކީ، ދިވެހި ރައްޔިތަކަށް ވީތީ އޮތް ގުޅުމެއް ކަމަަށް ޓްރާންސްޕޯޓު މިނިސްޓަރު މުޙައްމަދު އަމީން ވިދާޅުވެއްޖެ އެވެ.

މިނިސްޓަރު އަމީން މިހެން ވިދާޅުވީ އެމަނިކުފާނުގެ އިތުބާރު ނެތް ކަމަށް، އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ހުށަހެޅި މައްސަލައާ ގުޅިގެން ރައްޔިތުންގެ މަޖިލީހަށް ޙާޟިރުވެ ވާހަކަ ދައްކަމުންނެވެ.

އެ މައްސަލައިގައި ފުލުހުން ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސްގެ މަގާމުގައި އޭރު ހުންނެވި އަލީ ޝުޖާއުއާ މިނިސްޓަރު ގުޅުއްވި ކަމަށާއި، އެ މައްސަލައިގައި ތުހުމަތު ކުރެވޭ ފަރާތަކާ މިނިސްޓަރު އަމީންއާ ގުޅުން އޮތް ކަމަށް ތުހުމަތު ކުރެވޭ ކަމަށް ވަނީ ސުވާލުކޮށްފަ އެވެ.

އެ ސުވާލުތައް އަމާޒު ކޮށްފައި ވަނީ ކެންދޫ ދާއިރާގެ މެމްބަރު މައުރޫފް ޛާކިރު އަދި ހުޅުމާލޭ ދެކުނު ދާއިރާގެ މެމްބަރު ޑޮކްޓަރު އަޙުމަދު ޝަމްހީދު އެވެ.

އެ ސުވާލުތަކަށް ޖަވާބު ދެއްވަމުން އަމީން ވިދާޅުވީ، އެ މައްސަލައާ އެމަނިކުފާނާ އޮތް ގުޅުމަކީ ދިވެއްސަކަށް ވީތީ އޮތް ގުޅުމެއް ކަމަށެވެ. އަދި މާލޭގައި ދިރިއުޅޭތީ އޮތް ގުޅުމެއް ކަމަށް ވެސް އަމީން ވަނީ ވިދާޅުވެފަ އެވެ.

މީގެ އިތުރުން އަމީން ވިދާޅުވީ އެ މައްސަލައާ އެމަނިކުފާނާ ގުޅުވާ ނަމަ، މެމްބަރު ޝަމްހީދާ ވެސް އޮތީ އެއް ގުޅުމެއް ކަމަށާއި، މެމްބަރު މައުރޫފްއާ ވެސް އޮތީ އެއް ގުޅުމެއް ކަމަށެވެ. އެކަން ވަރަށް ސާފުކޮށް ދަންނަވަން ބޭނުންވާ ކަމަށާއި، އެ މައްސަލައާ އެމަނިކުފާނާ ގުޅުމެއް އޮތް ނަމަ އޮތީ، އިތުބާރު ނެތް ކަމަށް ހުށަަހެޅި 12 މެމްބަރުންނާ ވެސް އޮތް ގުޅުން ކަމަށް ވެސް އަމީން ވިދާޅުވި އެވެ.

އަޅުގަނޑާ މި މައްސަލައާ އޮތް ގުޅުން ވެއްޖިއްޔާމުން، އަޅުގަނޑު ދަންނަވަން އޮތީ އޮތް ގުޅުމަކީ އަޅުގަނޑު ވެސް ދިވެއްސަކަށް ވީމަ އޮތް ގުޅުމޭ. އަޅުގަނޑު މި މާލޭގައި އުޅޭތީ އޮތް ގުޅުމޭ. މި މައްސަަލައާ އަޅުގަނޑާ ގުޅުވާ ކަމަށް ވާ ނަމަ، ހަމަ ޝަމްހީދާ ވެސް އޮތީ އެއް ގުޅުމޭ. އިއްޒަތްތެރި މެމްބަރު މައުރޫފާ ވެސް އޮތީ އެއް ގުޅުމޭ. އެ ވާހަކަ އަޅުގަނޑު ވަރަށް ކްލިއަލީކޮށް ތިބޭފުޅުންނަށް މި ދަންނަވަނީ، އަޅުގަނޑާ މި މައްސަލައާ ގުޅުމެއް އޮވެއްޖިއްޔާމުން އަދި މި ބާރަ މެމްބަރުންނާ ވެސް އޮތީ އެއްވަރުގެ ގުޅުމޭ.

ޓްރާންސްޕޯޓު މިނިސްޓަރު މުޙައްމަދު އަމީން

މި މައްސަލައިގައި މިނިސްޓަރު އަމީން ވިދާޅުވީ، އެ މައްސަލައާ ގުޅިގެން އެމަނިކުފާނު އަމިއްލަފުޅަށް އިސްތިއުފާ ނުދެއްވާނެ ކަމަށެވެ. ޚާއްސަކޮށް ކުޑަ މިންވަރެއްގެ ގުޅުމެއް ވެސް ނެތް ކަމެއްގައި، އަމިއްލަ އަށް އިސްތިއުފާ ނުދެއްވާނެ ކަމަށް ވަނީ ވިދާޅުވެފަ އެވެ.

އެ މައްސަލައިގައި މިނިސްޓަރު އަމީން ކުރީގެ ސީޕި އަށް ގުޅުއްވާފައި ވުމާއި، މިނިސްޓަރު އަމީން ދިރިއުޅުއްވާ ގޭގެ ސީސީޓީވީ ފުޓޭޖު ހިއްސާ ކުރުމަށް ދެކޮޅު ހަދާފައިވާތީ ގިނަ ބަޔަކު ވަނީ އެމަނިކުފާނަށް ފާޑު ވިދާޅުވެފަ އެވެ.

އަދި އެ މައްސަލައިގައި ޒުވާނުން ކުރަމުން އަންނަ އިހުތިޖާޖުގައި މިނިސްޓަރު އަމީންގެ އިސްތިއުފާ އަށް ވެސް ވަނީ ގޮވާލައިފަ އެވެ. އަދި ޒުވާނުންގެ ޑިމާންޑު ތަކުގެ ތެރޭގައި ވެސް އެކަން ވަނީ ހިމަނައިފަ އެވެ.