އިޒްރޭލުން ރަފާއަށް ބޮން އަޅަނީ، މިސްރާއި ގަތަރުގެ ސުލްހައިގެ ހުށަހެޅުން ހަމާސް އިން ގަބޫލުކޮށްފި

އިޒްރޭލް ސިފައިން ރަފާއަށް ވައިގެ މަގުން ހަމަލާތައް ދޭން ފަށައިފިއެވެ.

އިޒްރޭލް ސިފައިން ހަމާސް އާ ދެކޮޅަށް ރަފާގެ އިރުމަތީ ސަރަހައްދުގެ ބައެއް ތަންތަނަށް ބޮން އެޅިކަމަށް ހޯމަ ދުވަހުގެ ރޭ ވަނީ ބުނެފައެވެ.

ވައިގެ މަގުން ރަފާއަށް އިޒްރޭލް ސިފައިން ދޭންފެށި ހަމަލާތަކުން ލިބުނު ގެއްލުންތަކުގެ ތަފްސީލް އަދި ހާމަވެފައެއް ނުވެއެވެ.

އިޒްރޭލްގެ ހަމަލާތައް ވަރުގަދަ ވަމުންދާއިރު، މިސްރާއި ގަތަރު މެދުވެރިވެގެން ހުށަހެޅި ހަނގުރާމަ ހުއްޓާލުމުގެ ހުށަހެޅުން ހަމާސް އިން ގަބޫލު ކުރާކަން އެ ގްރޫޕްގެ ލީޑަރ އިސްމާއީލް ހަނިއްޔާ ވަނީ ހާމަކޮށްފައެވެ. ހަމާސް އިން އެއްބަސްވި ކަންކަމުގެ ތަފްސީލް ހާމައެއް ނުކުރެއެވެ.

އިޒްރޭލްގެ ބޮޑުވަޒީރުގެ އޮފީހުން ބުނެފައިވަނީ މި ހުށަހެޅުމަކީ އިޒްރޭލުން ބޭނުންވާ މިންވަރާ ގާތައްވެސް އޮތް ހުށަހެޅުމެއް ނޫން ކަމަށެވެ. އެހެން ނަމަވެސް މަޝްވަރާއަށް މިސްރަށް އިޒްރޭލުގެ ވަފްދެއް ދާނެ ކަމަށެވެ.

އިޒްރޭލްގެ ސިފައިން ބުނެފައިވަނީ، ރަފާ ހިފުމަށް އޮތް ޕްލޭނާ އެއްގޮތައް ރާވާފައިވާ ގޮތައް އިޒްރޭލުން ހިންގާ އޮޕަރޭޝަން ކުރިއަށްދާނެ ކަމުގައެވެ.

ރަފާ އަށް އިޒްރޭލް ސިފައިން އެރުން ޕިކްނިކަކަށް ނުވާނެ ކަމަށް ހަމާސް އިން ވަނީ ބުނެފައެވެ.

ހަމާސް އިން ބުނެފައިވަނީ ފަލަސްތީން ރައްޔިތުން ހިމާޔަތް ކުރުމަށް އެޖަމާއަތުން ފުރިހަމަ އަށް ތައްޔާރުވެފައިވާ ކަމަށެވެ.

ހުސްވި އަހަރުގެ އޮކްޓޯބަރ މަހުގެ 7 ވަނަ ދުވަހުން ފެށިގެން އިޒްރޭލުން ގާޒާ އަށް ދެމުން ގެންދާ ހަމަލާ ތަކުގައި މިހާތަނަށް 34،735 މީހުން މަރުވެފައިވެއެވެ. 77،108 މީހުން ޒަޚަމްވެފައިވެއެވެ.