މި ސަރުކާރަށް 6 މަސް ވެގެން ދިޔަ އިރުވެސް، އިޒްރޭލު ޕާސްޕޯޓް މަނާނުކުރެވިގެން އުޅެނީ ސްޓޭންޑް ނުނެގިގެން ކަމަށް ސަރުކާރުން ބުނެފިއެވެ.
ނިރުބަވެރި އިޒްރޭލުން ގައްޒާގެ އާންމުންނަށް އަމާޒުކޮށް ދެމުންދާ ހަމަލާތަކާއި ހިންގަމުންދާ ގަތުލައާންމާއި ގުޅިގެން އިޒްރޭލު ރައްޔިތުން ރާއްޖެއައުން މަނާކޮށް، ޕާސްޕޯޓް ބޭން ކުރުމަށް ގޮވާލާ ސަރުކާރަށް ވަނީ ޕެޓިޝަނެއް ހުށަހަޅާފައެވެ. ނަމަވެސް އެ މައްސަލައިގައި މިހާތަނަށް ވެސް ސަރުކާރުން ސާފު ޖަވާބެއް ނުދެއެވެ.
ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އިޒްރޭލު ޕާސްޕޯޓް ބޭންކުރުމާއި ގުޅޭގޮތުން ސަރުކާރުގެ ސްޓޭންޑަކީ ކޮބައިތޯ ނޫސަވެރިއަކު ދެންނެވި ސުވާލަށް ޖަވާބުދެއްވަމުން، ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ ފަލަސްތީނަކީ ދިވެހިންގެ ވަރަށް ގާތް އަހުންނާއި އުހުތުންތަކެއް ތިބި ގައުމެއް ކަމަށެވެ. އަދި ފަލަސްތީން ރައްޔިތުންގެ ހައްގުތައް ނުގެއްލޭ ގޮތަށް ކަންތައްތައް ބައްޓަންކުރުމަކީ އަބަދުވެސް ދިވެހިރާއްޖެއިން ނަގަމުން އަންނަ ސްޓޭންޑް ކަމަށާއި، މި ސަރުކާރުން ވަރަށް ބޮޑަށް ދައްކަމުން އަންނަ ވާހަކައެއް ކަމަށެވެ. ހީނާ ވިދާޅުވީ ބައިނަލްއަގުވާމީ ދެ ޕްލެޓްފޯމެއްގައި ސަރުކާރުގެ ދެ ވަޒީރުން ދެއްވި ދެއްކެވި ވާހަކަފުޅަކީ އޭގެ ވަރުގަދަ ހެތްކެއް ކަމަށެވެ.
ހީނާ ވިދާޅުވީ އަދި ފަލަސްތީނުގައި މިނިވަން ދައުލަތެއް އޮތުމަށް ދިވެހިރާއްޖެއިން އަބަދުވެސް ވަކާލާތުކުރަމުން އަންނަ ކަމަށެވެ. އެހެންކަމުން ފަލަސްތީނުގެ ރައްޔިތުންގެ ހިމާޔަތުގައާއި އެ ރައްޔިތުންގެ ހައްގުގައި ދިވެހި ސަރުކާރުން ކުރަންޖެހުނު ކޮންމެ ކަމެއް ކުރާނެ ކަމަށް ހީނާ ވިދާޅުވިއެވެ.
ހީނާ ވިދާޅުވީ ރައްޔިތުންގެ މަޖިލިސްގެ އައު ދައުރު ފެށެންވާއިރަށް ކުރެވޭނެ ކަންތައްތަކަކީ ކޮބައިތޯ ބަލަމުން އަންނަ ކަމަށެވެ. އޭގެ ތެރޭގައި ތަންކޮޅެއް ބޮޑަށް ދިރާސާކޮށް، 'އިންޑެޕްތުކޮށް' މަޝްވަރާކުރަންޖެހޭ ހުރިހާ ފަރާތްތަކާއި މަޝްވަރާކުރުމަށްފަހު ފަލަސްތީނުގެ ހައްގުގައި ނަގަންޖެހުނު ކޮންމެ ސްޓޭންޑެއް ސަރުކާރުން ނަގާނެ ކަމަށެވެ. އަދި ނަގާ ކޮންމެ ސްޓޭންޑަކީ ފަލަސްތީނުގެ ރައްޔިތުންގެ ދިފާއުގައި ނަގާނެ ސްޓޭންޑެއް ކަމަށް ހީނާ ވިދާޅުވިއެވެ.
އިޒްރޭލު ޕާސްޕޯޓު ބޭންކުރުމާއި ގުޅޭގޮތުން ތަކުރާރުކޮށް ސުވާލުކުރުމުން ވެސް ހީނާ ވިދާޅުވީ، ފަލަސްތީނުގެ ރައްޔިތުންގެ ހައްގުގައި ކުރަންޖެހުނު ކޮންމެ ކަމެއް ކުރުމަށްޓަކައި ކުރަންޖެހޭ މަޝްވަރާތަކަކީ އަދި ނަގަންޖެހޭ ސްޓޭންޑްތަކަކީ ކޮބައިތޯ، އެކަންކަމާއި ގުޅޭގޮތުން ވަރަށް ފުޅާ ދާއިރާއެއްގައި ކަމާއިބެހޭ ފަރާތްތަކާ އެކީގައި މަޝްވަރާކުރަމުންދާ ކަމަށެވެ.
އެހެންކަމުން އައު މަޖިލިސް ހުވާ ކުރަންވާއިރަށް އެހިސާބަށް ދެވޭނެކަމަށް ހީނާ ވިދާޅުވިއެވެ.
އިޒްރޭލުގެ ފަތުރުވެރިން ރާއްޖެ އައުން މަނާކޮށް އިޒްރޭލުގެ އުފެއްދުންތައް ރާއްޖެ ގެނައުން މަނާކުރަން ގޮވާލާފައިވާ ގަރާރެއް ރައްޔިތުންގެ މަޖިލީހުން ފާސްކުރީ މި އަހަރުގެ އޭޕްރިލް 1 ގައެވެ.
