އިޒްރޭލާއި ހަމާސްގެ ސުލްހައިގެ ވާހަކަތަކަށް ކޮންމެވެސް ވަރެއްގެ ކުރިއެރުންތަކެއް ލިބިފައިވާ ކަމަށް ހަމާސް އިން ބުނެފި

ގާޒާގައި ހިނގަމުންދާ ހަނގުރާމަ ހުއްޓާލުމަށް ހަމާސް އާއި އިޒްރޭލާ ދެމެދު ކުރިއަށްދާ ސުލްހައިގެ ވާހަކަތަކުގައި ކޮންމެވެސް ވަރެއްގެ ކުރިއެރުމެއް ލިބިފައިވާ ކަމަށް ހަމާސްގެ ތަރުޖަމާނު އޮސާމާ ހަމްދާން ހާމަކޮށްފިއެވެ.

ވާހަކަތަކުގައި ބައިވެރިވާ ހަމާސްގެ ވަފުދު މިހާރު ތިބީ މިސްރުގެ ވެރިރަށް ކައިރޯގައެވެ.

ޚަބަރުތައް ބުނާ ގޮތުގައި ސުލްހައިގެ ވާހަކަތަކުގައި ބައިވެރިވުމަށް ގަތަރުގެ ވަފްދެއްވެސް އަންނަނީ ކައިރޯއަށް ދަތުރު ކުރަމުންނެވެ.

ކަމާބެހޭ ހުރިހާ ފަރާތްތަކުން ބާރު އަޅަމުން ގެންދަނީ އިޒްރޭލުން ގަޒާގެ ރަފާ ސިޓީއަށް އެއްގަމު މަގުން އަރާ އެ ސިޓީ ހިފުމަށް ރާވާފައިވާ ގޮތައް އެކަން ވިޔަ ނުދިނުމަށް ވީ އެންމެ އަވަހަކަށް ސުލްހައިގެ އެއްބަސްވުމަކަށް ހަމާސް އާއި އިޒްރޭލް ގެނެވޭތޯއެވެ.

ގާޒާގެ 1.5 މިލިއަން ރައްޔިތުން ދިރިއުޅޭ ރަފާ ސިޓީއަށް އިޒްރޭލް ސިފައިން އަރައިފިނަމަ ހިތައް ނުގެނެވޭފަދަ އިންސާނީ ބޮޑު މުސީބާތެއް ކުރިމަތިވާނެ ކަމަށް ގަބޫލް ކުރާ ކަމަށް އދ ގެ ކަމާބެހޭ އިދާރާތަކުން އަންނަނީ ބުނަމުންނެވެ. ކަން މިހެން އޮތް ނަމަވެސް އިޒްރޭލުގެ ހާރެޓްޒް ނޫހުން އިޒްރޭލްގެ އޮފިޝަލަކާ ހަވާލާދީ ބުނެފައިވަނީ އިޒްރޭލުން ރަފާ ހިފާނެ ކަމުގައެވެ.

އދ. ގެ ވާލްޑް ފުޑް ޕްރޮގްރާމް އިން ބުނާ ގޮތުގައި އުތުރު ގާޒާގެ ސަރަހައްދުތަކުގައި އުޅޭ ރައްޔިތުންވަނީ ބަނޑަށް ޖެހިފައެވެ. އެ ސަރަހައްދުތަކަށް އެހީގެ ތަކެތި އުފުލުމަށް އިޒްރޭލުން ގެންދަނީ ހުރަސް އަޅަމުންނެވެ.

ހުސްވި އަހަރުގެ އޮކްޓޯބަރ މަހުގެ 7 ވަނަ ދުވަހުން ފެށިގެން އިޒްރޭލުން ގާޒާ އަށް ދެމުން ގެންދާ ހަމަލާ ތަކުގައި މިހާތަނަށް 34،654 މީހުން މަރުވެފައިވެއެވެ. 77،908 މީހުން ޒަޚަމްވެފައިވެއެވެ.