ޗެލްސީ އަށް ކުޅެމުން އަންނަ ބްރެޒިލްގެ ޑިފެންޑަރު ތިއާގޯ ސިލްވާ އާއެކު، ބްރެޒިލްގެ ފްލުމިނެންސޭ އަށް އެއްބަސްވުމަކަށް އާދެވިއްޖެ އެވެ.
އުމުރުން 39 އަހަރުގެ ކުޅުންތެރިޔާ ވަނީ މި ސީޒަނަށްފަހު ޗެލްސީ ދޫކޮށްލަން ނިންމައިފަ އެވެ. އެ ކުލަބާއެކު އޭނާ ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ މި ސީޒަންގެ ނިޔަލަށެވެ. ޗެލްސީ އަށް ސިލްވާ އަށް އައު އެއްބަސްވުމެއް ހުށަހެޅި ނަމަވެސް، ސިލްވާ ނިންމީ އެއްބަސްވުން އައުނުކޮށް، ކުލަބު ދޫކޮށްލުމަށެވެ.
މީޑިއާތަކުގައި ބުނެފައިވާ ގޮތުން ފްލުމިނެންސޭ އިން ވަނީ، ސިލްވާ އާއެކު އެއްބަސްވުމަކަށް އައިސްފަ އެވެ. އެ ކުލަބުން ވަނީ މީގެ ކުރިން ވެސް ސިލްވާ ހޯދުމުގެ ޝައުޤުވެރިކަން ފާޅުކޮށްފަ އެވެ. ފްލުމިނެންސޭގެ ހުށަހެޅުމަށް ސިލްވާ އެއްބަސްވެފައިވާއިރު، އޭނާ އެ ކުލަބަށް ބަދަލު ވާާނީ ހިލޭ ޓްރާންސްފާއެއްގަ އެވެ.
ފްލުމިނެންސޭ އާއެކު ސިލްވާ ސޮއިކުރާނީ ދެ އަހަރު ދުވަހުގެ އެއްބަސްވުމެއްގަ އެވެ. އެއްބަސްވުމުގައި ރަސްމީކޮށް ސިލްވާ ސޮއިކުރުން ކުރިއަށް އޮތް ހަފުތާތަކުގެ ތެރޭގައި އޮންނާނެ ކަމަށް ރިޕޯޓުތައް ބުނެ އެވެ. އެހެންކަމުން، 2026 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި ހުންނާނެ އެވެ.
ޗެލްސީގައި މިވީ ހަތަރު ސީޒަންގެ ތެރޭގައި ސިލްވާ ވަނީ އެ ކުލަބަށް، 151 މެޗު ކުޅެދީ ނުވަ ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ތިން ތައްޓެއް ކާމިޔާބުކޮށްފަ އެވެ. އެއީ ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް އެވެ. މީގެ އިތުރުން އެފްއޭ ކަޕް އަދި ކަރަބޯ ކަޕްގެ ފައިނަލްގައި ވަނީ ދެ ފަހަރު ކުޅެފަ އެވެ.
