ޕޮޓާ ބޭނުންވަނީ ތިއާގޯ ސިލްވާ ޗެލްސީގައި މަޑުކުރަން

ޗެލްސީ އަށް ކުޅެމުން އަންނަ ބްރެޒިލްގެ ސެންޓަ ބެކް ތިއާގޯ ސިލްވާ އެ ޓީމުގައި މަޑު ކުރަން އެދޭ ކަމަށް ގްރަހަމް ޕޮޓާ ބުނެފިއެވެ.

ޗެލްސީގެ ކޯޗު ޕޮޓާ މި ފަދައިން ބުނީ ޗެލްސީއާއެކު ތިއާގޯ ސިލްވާ ހަދާފައިވާ އެއްބަސްވުމުގެ މުއްދަތު ހަމަވާތީ، އޭނާގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. ޗެލްސީއާއެކު ތިއާގޯ ސިލްވާ ހަދާފައިވާ އެއްބަސްވުމުގެ މުއްދަތު އަންނަ އަހަރު ޖޫން މަހުގެ ނިޔަލަށް ހަމަވާނެއެވެ.

އެކަމާ ގުޅިގެން ވާހަކަ ދައްކަމުން ޕޮޓާ ބުނީ، ކުލަބުގައި މަޑު ކުރުމާއި ނުކުރުން އޮތީ ތިއާގޯ ސިލްވާ އަތްމަތީގައި ކަމަށެވެ. އެކަމަށް ގޮތެއް ނިންމަން ޖެހޭނީ ތިއާގޯ ސިލްވާކަން ފާހަގަކުރަމުން ޕޮޓާ ބުނީ، އޭނާ އަށް ކޮށްދެވޭނެ ކަމަކީ ތިއާގޯ ސިލްވާ އަށް ޗެލްސީގައި ރަނގަޅު މަގެއް ހޯދައިދިނުން ކަމަށެވެ. އޭނާ ބުނީ އެހެން ހުރިހާ ކަމެއް އޮތީ ތިއާގޯ ސިލްވާ އާއި ޗެލްސީގެ އަތްމަތީގައި ކަމަށެވެ.

މިކަމާ ގުޅިގެން ތިއާގޯ ސިލްވާ ބުނީ އެވާހަކަ ދައްކަންވީ ވަގުތު އަދި އަންނާނެ ކަމަށެވެ. އެ ވަގުތަކީ ޤަތަރުގައި ފަށާ ފީފާ ވޯލްޑް ކަޕްގެ ކުރިން ނުވަތަ ފަހުން ކަމަށް ވެދާނެ ކަމަށް ވެސް އޭނާ ބުންޏެވެ. މީގެ އިތުރުން އޭނާ ބުނީ އެއްބަސްވުމާމެދު ގޮތެއް ނިންމަން ޖެހޭނީ އޭނާގެ އާއިލާގެ ކަންކަމަށް ބަލާފައި ކަމަށެވެ. އެއީ ފަސޭހެ ކަމެއް ނޫން ކަން ފާހަގަކުރަމުން އޭނާ ބުނީ، ވާނ ގޮތެއް ބަލަން ޖެހޭނެ ކަމަށެވެ.

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށް ތިއާގޯ ސިލްވާ ޗެލްސީ އަށް ބަދަލުވީ 2020 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް 91 މެޗު ކުޅެދީ ފަސް ލަނޑު ޖަހާފައެވެ. މީގެ އިތުރުން އޭނާ ވަނީ ޗެލްސީއާއެކު ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް، ފީފާ ކުލަބް ވޯލްޑް ކަޕް ކާމިޔާބުކޮށްފައެވެ. އަދި އެފްއޭ ކަޕްގެ ރަނަރަޕްކަން ދެ ފަހަރު، ކަރަބޯ ކަޕްގެ ރަނަރަޕްކަން އެެއް ފަހަރު ހޯދާފައިވެއެވެ.

ތިއާގޯ ސިލްވާ އަންނަނީ 2008 ވަނަ އަހަރުން ފެށިގެން ބްރެޒިލްގެ ޤައުމީ ޓީމަށް ވެސް ކުޅެމުންނެވެ.