ޗެލްސީއަށް ކުޅެމުން އަންނަ ބްރެޒިލްގެ ތަޖުރިބާކާރު ޑިފެންޑަރު ތިއާގޯ ސިލްވާ އެ ކްލަބާއެކު ހަދާފައިވާ ކޮންޓްރެކްޓް އިތުރު އަހަރަކަށް އައުކޮށްފިއެވެ.
އިތުރު އަހަރަކަށް ކޮންޓްރެކްޓް އައު ކުރުމުން އަންނަ ސީޒަނުގެ ނިޔަލަށް އޭނާ ޗެލްސީގައި މަޑުކުރާނެއެވެ.
ޕީއެސްޖީން 2020 ވަނަ އަހަރު ޗެލްސީއާ ތިއާގޯ ސިލްވާ ގުޅުނީ ހިލޭ ޓްރާންސްފާއެއްގެ ދަށުންނެވެ. އުމުރުން 37 އަހަރުގެ ތިއާގޯ ސިލްވާ ޗެލްސީއާއެކު ތަފާތު މޮޅު ކުޅުމެއް ދައްކަމުން އަންނައިރު މިދިޔަ ސީޒަނުގައި ޗެލްސީން ޗެމްޕިއަންސް ލީގު ކާމިޔާބުކުރިއިރު އޭނާ ވަނީ ޗެލްސީގެ ޑިފެންސްލައިންގައި މުހިންމު ދައުރެއް އަދާކޮށްފައެވެ.
ޗެލްސީގެ ކޮންޓްރެކްޓް އައު ކުރުމަށްފަހު ތިއާގޯ ސިލްވާ ބުނީ ޗެލްސީގައި އިތުރު ސީޒަނެއް މަޑުކުރެވޭތީ އުފާކުރާ ކަަމަށާއި، މިހާ ދުވަހު ޗެލްސީއަށް ކުޅެވޭނެކަމަށް އުންމީދު ނުކުރާ ކަމަށެވެ. އަދި ޗެލްސީއަށް ކުޅުމަކީ ވަރަށް ބޮޑު ޕްރެޝަރެއް ކަމަށާއި، މި ފެންވަރުގައި ކުޅުން ދެމެހެއްޓުމަށް އޭނާއަށް ކުރެވެން ހުރި ހުރިހާ މަސައްކަތެއް ކުރާނެ ކަމަށްވެސް ބުންޏެވެ.
ކުރިން އޭސީ މިލާނާއި ޕީއެސްޖީއަށްވެސް ކުޅުނު ތިއާގޯ ސިލްވާ ޗެލްސީއަށް ބަދަލުވީ އެ ޓީމުގެ ކުރީގެ ކޯޗު ފްރޭންކް ލަމްޕާޑުގެ އެދުމުގެ މަތިންނެވެ. މި ސީޒަނަށްފަހު ތިއާގޯ ސިލްވާ ބްރެޒިލްގެ ކްލަބަކާއި ގުޅޭނެކަމަށް ކުރިން ބެލެވިފައި އޮތެވެ.
ޗެލްސީއަށް މިހާތަނަށް ކުޅެދިން 56 މެޗުގައި ތިއާގޯ ސިލްވާ ވަނީ ހަތަރު ލަނޑު އެޓީމަށް ޖަހައިދީފައެވެ.
