ޗެލްސީގެ އެއްބަސްވުން ސިލްވާ އާކުރަނީ

ޗެލްސީއާއެކު ހަދާފައި އޮތް އެއްބަސްވުން އިތުރު އެއް އަހަރަށް އާކުރަން ބްރެޒިލުގެ ޑިފެންޑަރު ތިއާގޯ ސިލްވާ ނިންމާފައިވާ ކަމަށް ރިޕޯޓުތައް ބުނެފިއެވެ.

ޕީއެސްޖީގައި އަށް އަހަރު ހޭދަކުރުމަށްފަހު ސިލްވާ ޗެލްސީއަށް ބަދަލުވީ މިދިޔަ އަހަރުގެ ހޫނު މޫސުމުގައި ހިލޭ ޓްރާންސްފާއެއްގެ ދަށުންނެވެ. އުމުރުން 36 އަހަރުގެ ސިލްވާ ޗެލްސީއާއެކު އެއް އަހަރުގެ އެއްބަސްވުމެއް ހަދާފައިވާއިރު، އެ އެއްބަސްވުމުގެ ދަށުން ސިލްވާ ބޭނުންނަމަ އިތުރު އެއް އަހަރު ޗެލްސީގައި މަޑުކުރުމުގެ ފުރުޞަތު ލިބިގެންދެއެވެ.

އެހެންކަމުން އެ ފުރުޞަތުގެ ބޭނުން ހިފައި، އިތުރު އެއް އަހަރަށް އައު އެއްބަސްވުމެއް ހެދުމަށް ސިލްވާ މިހާރު ނިންމާފައިވާ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

އަންނަ ސީޒަނުގައިވެސް ޗެލްސީގައި މަޑުކުރަން ސިލްވާ ނިންމީ، އެ ޓީމުގެ އައު ކޯޗު ތޯމަސް ޓުޗެލުގެ އިރުޝާދުގެ ދަށުން، ޗެލްސީން ދައްކަމުން އަންނަ ތަފާތު މޮޅު ކުޅުމުގެ ސަބަބުން ކަމަށް ރިޕޯޓުތައް ބުނެއެވެ. އެގޮތުން ޗެލްސީގެ ކޯޗުކަމާ ޓުޗެލް ހަވާލުވި ފަހުން، އެ ޓީމުން ކުޅުނު 14 މެޗުންވެސް ޗެލްސީ ބަލިވެފައެއް ނުވެއެވެ. އަދި މީގެ ކުރިން ޓުޗެލުގެ ކޯޗުކަމުގައި ސިލްވާ ޕީއެސްޖީގެ ކެޕްޓަނުގެ މަގާމު އަދާކޮށްފައިވާއިރު، ޓުޗެލްއާއެކު އިތުރު ކާމިޔާބީތަކެއް ހޯދަން ސިލްވާ ބޭނުންވާ ކަމަށްވެސް މީޑިއާތަކުން ވަނީ ރިޕޯޓުކޮށްފައެވެ.

މީގެ ކުރިން ޕީއެސްޖީއާއެކު ފްރެންޗު ލީގު ހަތް ފަހަރު ހޯދާފައިވާ ސިލްވާ، ޗެލްސީގެ އެއްބަސްވުން އާކުރަން މަސައްކަތްކުރަމުން އަންނައިރު، މި ސީޒަނުގައި ޗެލްސީއާ ގުޅެ މިހާތަނަށް އޭނާ ވަނީ އެ ޓީމަށް 21 މެޗު ކުޅެދީފައެވެ. އަދި މި މެޗުތަކުގައި އޭނާ ވަނީ މިހާތަނަށް ދެ ލަނޑު ޖަހާފައެވެ.