މާލޭ މަގުމައްޗަށް ކުނިއަޅަމުންދިޔަ ބަންގްލަދޭޝް ރައްޔިތެއް ފުލުހުންނާއި ހަވާލުކޮށްފި

މާލޭ މަގުމައްޗަށް ކުނިއަޅާކަން ފާހަގަކުރެވިގެން ކައުންސިލުން ހޯދި ޤަވާއިދާއި ހިލާފަށް ރާއްޖޭގައި އުޅެމުންދާ ބަންގްލަދޭޝްގެ ރައްޔިތެއް މިހާރު ވަނީ ފުލުހުންނާއި ހަވާލުކުރެވިފައިކަމަށް މާލެ ސިޓީ ކައުންސިލުން ބުނެފިއެވެ.

ސިޓީ ކައުންސިލުން ބުނީ ފުލުހުން ދަނީ އިމިގްރޭޝަނާއި ގުޅިގެން މި މީހާ ޑީޕޯޓް ކުރުމުގެ މަސައްކަތް ކުރަމުންކަމަށެވެ. މާލެ ސިޓީއަށް ދިމާވެފައިވާ ކުނީގެ މައްސަލަ ހައްލުކުރުމަށް ކުރަމުންދާ މަސައްކަތްތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ މަގުތަކަށް ކުނި އަޅައިގެން 180 ވަރަކަށް މީހުން މިހާތަނަށް އައިރު ޖޫރިމަނާކުރެވިފައިވާކަމަށެވެ. މީގެތެރެއިން 85 އިންސައްތަ މީހުންނަކީ ބިދޭސީންކަމަށް ވެސް އާޒިމް ވިދާޅުވިއެވެ.

އާޒިމް ވިދާޅުވީ މާލޭގެ ޕާކިން ޒޯންތަކުގައި ވެސް ބިދޭސީން ފުނިޖެހިގެން ތިބޭ މައްސަލައިގެ ރިޕޯޓްތައް ވެސް ލިބޭ ކަމަށާއި، އެ މައްސަލަ އަމިއްލަފުޅަށް ވެސް ފުލުހުންނަށް ހުށަހެޅި ކަމަށެވެ. އަދި ގަވާއިދާ ހިލާފަށް ހިންގާ ކަންކަން ގާނޫނު ތަންފީޒުކުރަން ތިބި އިދާރާތަކުން އެއްވެސް އުޒުރެއް ނުދައްކާ ގާނޫނު ތަންފީޒުކުރަމުންދާން ޖެހޭނެކަމަށް ވެސް އާޒިމް ވިދާޅުވިއެވެ.