މުއިއްޒުގެ މޭޔަރު ކަމުގައި އެއް އަހަރު ތެރޭ 10.5 މިލިއަން ރުފިޔާ ސިޓީ ކައުންސިލުން ކުއިކް ޝުއަރ ކިޔާ ކުންފުންޏަކަށް!
މުހައްމަދު މުއިއްޒުގެ މޭޔަރުކަމުގައި އެއް އަހަރު ތެރޭގައި ސިޓީ ކައުންސިލުން ކުއިކް ޝުއަރ އަށް 10.5 މިލިއަން ރުފިޔާ ދީފައިވޭ
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ސިންގަޕޫރަށް ފުރާވަޑައިގަތުމަށް ފްލައިޓަށް އަރައި ވަޑައިގަންނަވަމުން އަތުން ވަދާއުގެ އިޝާރާތް ކޮށްލައްވަނީ
މުހައްމަދު މުއިއްޒު ގެ މޭޔަރު ކަމުގައި އަހަރެއްހާ ދުވަހުގެ މުއްދަތުގެ ތެރޭގައި 10.5 މިލިއަން ރުފިޔާ އަށް ވުރެ ގިނަ ފައިސާ ސިޓީ ކައުންސިލުން ކުއިކް ޝުއަރ ކިޔާ ކުންފުންޏަކަށް ދީފައިވާކަން ހާމަ ވެއްޖެއެވެ.
މި މައުލޫމާތު ހާމަވީ، ރާއްޖޭގައި ހިންގާ ކަރަޕްޝަން އާއި ގާނޫނާ ޚިލާފު ކަންކަން ހާމަ ކުރަމުން ގެންދާ ހަސަންކުރުސީ ގެ އެކްސް އެކައުންޓުގައި ހޯމަ ދުވަހު ލީކު ކޮށްލި މޯލްޑިވްސް މަނިޓަރީ އޮތޯރިޓީގެ ފައިނޭންޝަލް އިންޓެލިޖެންސް ޔުނިޓުން ތައްޔާރު ކޮށްފައިވާ ކަމަށް ބުނާ ތަފްސީލު ރިޕޯޓެއް ގައެވެ.
އެ ރިޕޯޓުގައިވާ ގޮތުން، ތްރެޝްހޯލްޑް ޓްރާންސެކްޝަންސް ރިޕޯޓްސް (ޓީޓީއާރްއެސް) އިން ލިބެން ހުރި މަޢުލޫމާތުން ދައްކާ ގޮތުގައި، 2 ނޮވެމްބަރު 2022 އިން 7 ނޮވެމްބަރު 2023 އާ ދެމެދު، ޖުމްލަ 10,545,232.60 ރުފިޔާގެ މުޢާމަލާތް ކުއިކް ޝުއަރ ނަމަކަށް ކިޔާ ކުންފުންޏަކާ މާލޭ ސިޓީ ކައުންސިލް އާ ދެމެދު ހިނގާފައިވެއެވެ.
މި މުޢާމަލާތްތަކުގެ ތަފްސީލުތައް ރިޕޯޓުގައި ދީފައިވާއިރު، ޖުމްލަ 12 މުއާމަލާތެއް އެ ކުންފުންޏާއި މާލޭ ސިޓީ ކައުންސިލް އާ ދެމެދު ހިނގާފައިވެއެވެ. އެ މުއާމަލާތްތަކުގެ ތެރޭގައި އެންމެ ކުޑަ އަދަދަކަށް 265،000ރ ހިމެނޭ އިރު، 2.3 މިލިއަން ގެ ދެ ޓްރާންސެކްޝަން އެންމެ ބޮޑެތި އަދަދު ތަކުގެ ތެރޭގައި ފާހަގަ ވެއެވެ.
މި މުއްދަތަކީ މާލޭ ސިޓީގެ މޭޔަރުގެ މަގާމުގައި މިހާރުގެ ރައީސް ޑރ. މުހައްމަދު މުއިއްޒު ހުންނެވި ދުވަސްވަރުކަން ފާހަގަ ކުރެވޭ އިރު، މި މުއްދަތުގައި ކުއިކް ޝުއަރގެ ވެރިފަރާތް ކަމަށްވާ މުޙައްމަދު ނާފިޒު ގެ ކޮއްކޮއެއް ކަމަށްވާ މިހާރުގެ ބާރަށު ދާއިރާގެ ޕީއެންސީ އަށް ނިސްބަތްވާ މެމްބަރު އިބްރާހީމް ޝުޖާޢު މާލެ ސިޓީ ކައުންސިލުގައި ހުޅުމާލޭގެ ކައުންސިލަރެއްގެ ގޮތުގައި މަސައްކަތް ކުރަމުން ގެންދިޔަ ކަމަށް ރިޕޯޓުގައި ބުނެފައިވެއެވެ.
މޯލްޑިވްސް މަނިޓަރީ އޮތޯރިޓީން މި ރިޕޯޓު އެކުލަވާލާފައި ވަނީ 28 މާރޗް 2024 ގައެވެ.
މާލެ ސިޓީ ކައުންސިލުން ކުއިކް ޝުއަރ އަށް ދޫކޮށްފައިވާ ފައިސާގެ އަދަދުތަކާއި ތާރީޚްތައް:
- ތާރީޚް: 2023-11-07 - ފައިސާގެ އަދަދު 500,000ރ
- ތާރީޚް: 2023-10-19 ފައިސާގެ އަދަދު 500,000ރ
- ތާރީޚް: 2023-10-19 ފައިސާގެ އަދަދު 500,000ރ
- ތާރީޚް: 2023-09-14 ފައިސާގެ އަދަދު 445,500ރ
- ތާރީޚް: 2023-09-13 ފައިސާގެ އަދަދު 445,500ރ
- ތާރީޚް: 2023-07-04 ފައިސާގެ އަދަދު 891,000ރ
- ތާރީޚް: 2023-06-22 ފައިސާގެ އަދަދު 950,000ރ
- ތާރީޚް: 2023-05-30 ފައިސާގެ އަދަދު 662,817ރ
- ތާރީޚް: 2023-05-22 ފައިސާގެ އަދަދު 2,376,000ރ
- ތާރީޚް: 2023-03-13 ފައިސާގެ އަދަދު 648,000ރ
- ތާރީޚް: 2022-12-06 ފައިސާގެ އަދަދު 2,361,415ރ
- ތާރީޚް: 2022-11-02 ފައިސާގެ އަދަދު 265,000ރ
