މި ހަފްތާގައި އީރާނުން އިޒްރޭލަށް ވަރުގަދަ ހަމަލާއެއް ދީފާނެ ކަމަށް އެމެރިކާ އިން ދެކޭ

އެމެރިކާގެ ޖާސޫސީ އެންމެ ފަހުގެ އެސެސްމަންޓުން ދައްކާގޮތުގައި މިހަފުތާގެ ތެރޭގައި އިޒްރޭލަށް އިރާނާއި އެޤައުމުގެ ބައިވެރިން ގެ ފަރާތުން "ފާހަގަކޮށްލެވޭ ހަމަލާތަކެއް" ދޭނެކަމަށް ލަފާކުރެވޭކަމަށް ހޯމަ ދުވަހު ވައިޓް ހައުސްއިން ހާމަކޮށްފިއެވެ.

ނެޝަނަލް ސެކިއުރިޓީ ކައުންސިލްގެ ތަރުޖަމާނު ޖޯން ކަރބީ ބުނެފައިވަނީ އެމެރިކާގެ އަމިއްލަ އެސެސްމަންޓްތަކެއް ހަދާފައިވާ ކަމަށާއި، އެ އެސެސްމަންޓްތަކާއި އިރާނުން ބަދަލުހިފުމަށް ނިންމާފައިވާ ވަގުތާ ގުޅޭގޮތުން އިސްރާއީލުގެ ޖާސޫސުން ހަދާފައިވާ އެސެސްމެންޓް ތަކާ އެއްގޮތް ކަންތައްތަކެއް އެބަހުރި ކަމަށެވެ.

އީރާނުގައި ހުންނަވަނިކޮށް ހަމާސްގެ ވެރިޔާ އިސްމާއީލް ހަނިއްޔާ އަވަހާރަ ކޮށްލުމުގެ ބަދަލު ހިފުމުގެ ގޮތުން އިޒްރޭލަށް ވަރުގަދަ ރައްދެއް ދޭނެ ކަމަށް އީރާނުން ބުނެފައިވާއިރު، ލުބުނާންގެ އިސް ކޮމާންޑަރަކު އިޒްރޭލުން ދިން ހަމަލާއެއްގައި އަވަހާރަވެފައިވާތީ ހިޒްބުﷲ އިން ވެސް އެކަމުގެ ބަދަލު ހިފުމުގެ ގޮތުން އިޒްރޭލަށް ހަމަލާދޭނެ ކަމަށްވަނީ ބުނެފައެވެ.

ރިޕޯޓްތައް ބުނާ ގޮތުގައި ހިޒްބުﷲ އިން އިޒްރޭލަށް ރައްދު ދޭނެ ގޮތަކީ ކޮބައިކަން ދެނެގަންނަން ޚުދު އިޒްރޭލަށްވެސް ވަނީ ދަތިވެފައެވެ.

އީރާނުން ދީފާނެ ކޮންމެ ހަމަލާއަކުން އިޒްރޭލް ސަލާމަތް ކުރާނެ ކަމުގެ ޔަގީންކަން އެމެރިކާ އިން ވަނީ ދީފައެވެ.

ކާރބީ ބުނިގޮތުގައި އީރާނުން ނުވަތަ އެ ޤައުމުގެ ބައިވެރިން ކަމުގައިވާ، ހިޒްބުﷲ އާއި އިރާޤު، ޔަމަން އަދި ސީރިއާގެ އެހެނިހެން ގްރޫޕްތައް ހިމެނޭގޮތަށް، ދީފާނެ ހަމަލާ އަކީ ކޮބައިކަން ކަނޑައެޅުމަކީ އުނދަގޫ ކަމެއްކަމުގައި ވިޔަސް، އެމެރިކާއިން އެ ސަރަޙައްދަށް ފޮނުވާފައިވާ އަސްކަރީ ވަސީލަތްތަކާމެދު އެމެރިކާ އިތުބާރުކުރާކަމަށް އޭނާ ބުންޏެވެ.

އެމެރިކާގެ އޮފިޝަލުން އަންދާޒާކޮށްފައިވަނީ އޯގަސްޓް 4 އެއްހާ ތާނގައި ރޮކެޓް، މިސައިލް ނުވަތަ ޑްރޯން ބޭނުންކޮށްގެން ހަމަލާތަކެއް އިޒްރޭލަށް ދޭނެ ކަމަށެވެ. ނަމަވެސް އެކަން އެހެން ނުވުމުން އެސެސްމެންޓް ބަދަލުކޮށް މިހާރުގެ އަންދާޒާ އަކީ އީރާނު ނުވަތަ ހިޒްބުﷲ އިން ބުރާސްފަތި ނުވަތަ ހުކުރު ދުވަހު ހަމަލާދޭނެ ކަމަށެވެ.

އީރާނުން ހަމަލާ ދިނުމާމެދު ދެވަނަ ވިސްނުމަށް ނުވަތަ އެކަން ހުއްޓާލުމަށް ބާރުއެޅުމަށް އެމެރިކާއާއި ހުޅަނގުގެ ގައުމުތަކުން ގެންދަނީ ޑިޕްލޮމެޓިކް ރޮނގުތަކުން ގިނަ މަސައްކަތްތަކެއް ކުރަމުންނެވެ. އަނެއްކޮޅުން، އެމެރިކާއިން ގެންދަނީ ހަނގުރާމަމަތީ މަތިންދާ ބޯޓުފަހަރާއި މަނަވަރު ފަހަރާއި ސަބްމެރީން އާއި ސިފައިންނާއި ހަތިޔާރު މެދުއިރުމައްޗަށް އިތުރަށް ޖަމާކުރަމުންނެވެ.

ރިޕޯޓްތައް ބުނާގޮތުގައި އެމެރިކާގެ ޚާރިޖީ ވަޒީރު އެންތަނީ ބްލިންކަން މެދުއިރުމައްޗަށް މި ހަފްތާގައި ދަތުރުފުޅެއް ކުރައްވާނެ އެވެ. އަދި އޭނާގެ ދަތުރުފުޅުގައި އިޒްރޭލަށް ވަޑައިގަންނަވާނެ ކަމަށްވަނީ ބެލެވިފައެވެ.

އީރާނުން ބުނަމުންދަނީ ހަނިއްޔާ އަވަހާރަ ކޮށްލަން ދިން ހަމަލާގެ ހަރުކަށި އަދަބު އިޒްރޭލަށް ނުދީ ދޫކޮށް ނުލާނެ ކަމަށާއި އެކަމުގެ ބަދަލު ހިފުމަކީ އީރާނަށް ލިބިގެންވާ ހައްގެއް ކަމަށެވެ.