ކައުންސިލްތަކާއި، ކައުންސިލް ނިޒާމްގެ މަތިން ބައެއް ވެރިން ހަނދާން އާވަނީ އިންތިޚާބު ބޯމަތިވީމައެވެ. ޚާއްސަކޮށް ކައުންސިލް އިންތިޚާބާއި ދިމާކޮށް ލައްކަ ބައިވަރު ވާހަކަ ދައްކާ މަންޒަރު ފެނެއެވެ. އެކަމަކު ބަލާބެލުމަށް ލާމަރުކަޒީ ނިޒާމަކީ މިހާރު ވެރިކަމުގައި ތިއްބެވި ޕީއެންސީން މާ ގަޔާވާ ކަމެއް ކަމަކަށް ނުފެނެއެވެ.

މިހެން މި ބުނަން ޖެހެނީ ސަބަބެއް ނެތިއެއް ނޫނެވެ. އެހެންޏާ ފަހެ މިވެރިން ވެރިކަމަށް ވަޑައިގަތީ ތިމާމެންނަކީ ލާމަރުކަޒީ ނިޒާމްގެ ޗެމްޕިއަނުން ކަމަށް ދައްކައިގެންނެވެ. ތިމާމެންގެ ވެރި މީހާ އަކީ ލާމަރުކަޒީ ނިޒާމް މާ މޮޅަށް ދަންނަ މާ ބޮޑަށް ފަރިތަ ވެރިއަކު ގެންނަ ވާހަކަ މިވެރިން އައީ ދައްކަމުންނެވެ. އެހެންވީމަ ރައްޔިތުން ހީކޮށްގެން ތިބީ މިވެރިންގެ ވެރިކަން ވާނީ ލާމަރުކަޒީ ނިޒާމަށް ނިކަން ފަހި ނިކަން މުއްސަނދި ވެރިކަމަކަށް ކަމަށެވެ.

އެކަމަކު ކަންވެގެންދިޔައީ އެހެންތޯއެވެ؟ މި ވެރިކަން ވީ ލާމަރުކަޒީ ނިޒާމްގެ ކަންކަށިމަތީގައި ޖަހާލި ދިލަ އެތިފަހަރަކަށެވެ. ވާނީވެސް އެހެންތާއެވެ. މާ މޮޅު ލާމަރުކަޒީ ވެރިއަކު އައިސް މި ފެށީ މުޅި ނިޒާމް މަރުކަޒުކޮށް، އެކީ އެކައްޗަކަށް ނިޒާމް ހަފުސްކޮށްލާށެވެ.

އެކަމަކު އެއީ ވެސް ވެރިޔަކަށް ހުންނެވި މިހާގެ ފަތިފުށް ދަންނަ މީހުން މާކަ ހައިރާންވާނެ ކަމެއް ނޫނެވެ. އެހެނީ މި ވެރި މީހާ އަކީ މިއީ އެ މަނިކުފާނު ހައުސިން މިނިސްޓަރކަމުގައި ހުންނަވައިގެން ކައުންސިލްތަކުގެ ބާރުވެރިކަން ނަގާލި ބޭފުޅެކެވެ. މާލެސިޓީ ކައުންސިލްގެ ބާރުތައް ނަގަމުން ނަގަމުން ގޮސް އެންމެ ފަހުން އެ މަނިކުފާނު ކައުންސިލަށް ދޫކޮށްލީ ވިހާ މަރުވާ މީހުންގެ ދަފްތަރު ބެލެހެއްޓުމުގެ ޒިންމާ އެކަންޏެވެ.

ފުލުފުލުގައި އެކި ޤާނޫނުތަކަށް އިސްލާހު ގެންނަންވައިގެން މިހާރުވެސް ކުރައްވާ ކަމަކީ ކައުންސިލްތަކާއި ބާރުވެރިކަމާއި ވީހާވެސް ބޮޑަށް ދުރުކޮށްލުމެވެ. ފަޅެއް ފަރެއް އޮތިއްޔާ އެތަން ކައުންސިލްގެ އިހުތިސާސަށް ދޫކޮށްލާކަށް ބޭނުމެއް ނުވެއެވެ. އިދާރީ އޮނިގަނޑުގެ މުޅި ކޮންޓްރޯލް ވެސް އެހާމެ ބޭނުމެވެ.

މުށުތެރެއިން ކިރިޔާ ވެސް ބާރެއް ދޫކޮށްލައްވައިފިއްޔާ ތިމަންމަނިކުފާނު ނިކަމެތިވެދާނެ ކަމަށް ހީވަނީތޯއްޗެކެވެ. އަދި އަމުދުން ކައުންސިލްތަކުން ކުރާ ޚަރަދަށް ފާރަވެރިވުމަކީ ފުރަތަމަ ދުވަހުން ފެށިގެން މި ވެރިކަމުގެ މޮޓޯ ކަމަށް އޮތީ ހަދާފައެވެ. ކައުންސިލްތަކުން ކުރާ ޚަރަދަނީ ދައުލަތުން ކުރާ ހޭދައިގެ 5% އަށް ވީ ނަމަވެސް އެންމެ ބޮޑަށް ބަލަން ވީ ވެސް ކައުންސިލްތަކުގެ މާލިއްޔަތެވެ. ޚަރަދުބަރަދު ކުރާ ގޮތަށް އެންމެ ބޮޑު ފާޑެއް ކިޔަންވީ ވެސް ހަމަ ކައުންސިލްތަކަށެވެ.

ސިއްރުން ދެއްކި ވާހަކަ ފާޅުގައި ދައްކާ އިސާހިތަކު ކައުންސިލަރުން މަދުކުރުމުގެ ވާހަކަ ވެސް ފެށީ ހަމަ މި ވެރިކަމުގައި މި ވެރި މީހާއެވެ. ކައުންސިލްތަކުގެ އަދަދު މަދުކުރުމުގެ ވާހަކައިން ފެށިގެން ސިޓީތަކުގެ އަދަދަށް ބަދަލު އަންނަ ފަދަ އެތައް ކަމެއްގެ ވާހަކަ މި ވެރިކަމުގެ އިސް ފަޑީގައި އެބަދައްކައެވެ.

ޖުމްލަކޮށް މި ދައްކާ ވާހަކައިން އަޅުގަނޑަށް ދޭހަވީ ކަމަކީ މި ބޭފުޅުން ހަގީގަތުގައި ބޭނުމީ ރައީސް ވިދާޅުވީމަ "އާދެ ލައްބަ" ކިޔާނެ ބައެއްކަމެވެ. ކޮންމެހެނަކުން ރައްޔިތަކަށް ހެވެއް އެދިގެން ލާމަރުކަޒީ ނިޒާމް ދެކެ ލޯބިން އުޅުއްވާ މަންޒަރެއް ހިލާ ނުފެނެއެވެ. މިހެން ދަމުން ދަމުން ގޮސް ރައީސް އައްޔަންކުރައްވާ ކައުންސިލަރުން ތިއްބަވާ މަންޒަރު ފެނުނަސް މިހާރު ދެން އަޅުގަނޑު ހައިރާނެއް ނުވާނެއެވެ. މިސްރާބު ވަރަށް ސާފެވެ. އިންތިޚާބު ކުރިއަސް ނުކުރިއަސް ކައުންސިލަރުން މި ގެންދަނީ ކަތީބި ނިޒާމާއި ދިމާލަށެވެ. އެވެރިން ކުރިއަށް އޮތްތާ ވާނީ ނަމެއް އޮތަސް ކަމެއް ނެތް ކަތީބުންނަށެވެ.