އިޒްރޭލުގެ ކެބިނެޓް ދެ މިނިސްޓަރުން އިސްވެ ތިބެ ޔަހޫދީ ގްރޫޕަކުން އަލް-އަގްސާ މިސްކިތައް ވަދެގަނެ އަޅުކަން ކޮށްފިއެވެ.
ޔަހޫދީ ގްރޫޕަކުން ގޮސް އިޒްރޭލުން ގަދަކަމުން ހިފާފައިވާ އިރުމަތީ ޖެރޫސަލަމްގައި ހުންނަ އަލް-އަޤްޞާ މިސްކިތަށް ވަދެގަނެ މިސްކިތުގެ ހުރުމަތް ކެނޑި މައްސަލައިގައި އިސްލާމީ ގައުމުތަކުން ގެންދަނީ ޔަހޫދީންގެ އެ އަމަލު ހަރުކަށި އިބާރާތުން ކުށްވެރި ކުރަމުންނެވެ.
އަލް-އަގްސާ މިސްކިތަށް އަންގާރަ ދުވަހު ހެނދުނު ވަދެގަތް ޔަހޫދީ ގުރޫޕްގެ އިސް މީހަކަށް ހުރީ ހައްދުފަހަނަ އަޅާފައިވާ ނަތަންޔާހޫގެ ކެބިނެޓްގައި ހިމެނޭ ނޭޝަނަލް ސެކިއުރިޓީ މިނިސްޓަރ ބެން-ގަވިއަރ އެވެ.
އަލްއަގްސާ މިސްކިތުގެ ގޯތި ތެރެއަށް މި ގްރޫޕް ގޮވައިގެން ބެން-ގަވިއަރ ވަނީ ޔަހޫދީ ދީނުގެ ލަވަ ކިޔަމުންނެވެ. އެ މަންޒަރު ފެންނަ ވީޑިއޯ ސޯޝަލް މީޑިއާގައި އާންވެފައިވެއެވެ.
އަލް-އަގްސާ މިސްކިތުގެ ގޯތި ތެރެއަށް މި ގްރޫޕް ވަދެ ޔަހޫދީ ދީނުގެ އަޅުކަމެއް ކުރިކަމަށް އަލް ޖަޒީރާ އިން ބުނެފައިވެއެވެ. ގްރޫޕް ވަތް ދުވަހަކީ ޔަހޫދީން ފާހަގަ ކުރާ ޓިޝަ ބިއާވް ދުވަސް ކަމަށް ރިޕޯޓްތައް ބުނެއެވެ.
މި ގްރޫޕުން ގޮސް އަލް-އަގްސާގެ ގޯތި ތެރޭގައި އަޅުކަން ކުރިއިރު އެއީ ޔަހޫދީން އަޅުކަން ކުރުން މަނާ ސަރަހައްދެއްގެ ގޮތުގައި ކަނޑައަޅާފައިވާ ސަރަހައްދެކެވެ. އިޒްރޭލުގެ ހައްދުފަހަނަ އެޅި ހަރުކަށި ގައުމީ ސަލާމަތާ ބެހޭ މިނިސްޓަރ ބެން-ގަވިއަރ އަކީ އަލް-އަގްސާ ގައި ޔަހޫދީންނަށް އަޅުކަން ކުރެވެން ޖެހޭނެ ކަމަށް ބުނެ ފާޅުގައި އެކަމަށް ގޮވާލާ މީހެކެވެ. ޔަހޫދީން އަލް-އަގްސާގެ ގޯތި ތެރޭގައި އަޅުކަން ކުރަމުން ދިޔަ އިރު ޔަހޫދީ ފުލުހުންނާއި، ހުޅަނގު އައްސޭރީގައި ގަވައިދާ ޚިލާފަށް ގަދަކަމުން ވަޒަންވެރިވެގެން އުޅޭ ގޮތެއްފޮތެއް ނެތް ޔަހޫދީން ގެންދިޔައީ ހިމާޔަތް ދެމުންނެވެ.
ހުސްވި މަހުވެސް ބެން-ގަވިއަރ ވަނީ ވަރުގަދަ ސަލާމަތީ ފައުޖެއް ގޮވައިގެން އައިސް މިސްކިތައް ވަދެގަނެފައެވެ. އަންގާރަ ދުވަހު ބެން-ގަވިއަރ މިސްކިތައް ވަނުމުން މިއީ އަހަރެއްހާ ދުވަހުގެ ތެރޭގައި އޭނާ އަލް-އަގްސާ އަށް ވަދެގަތް ތިންވަނަ ފަހަރެވެ.
އަޅުކަމުގެ ތެރޭގަޔާއި މިސްކިތައް ދިޔަ މަގުމަތީގައި ބެން-ގަވިއަރ ގެންދިޔައީ ހަމާސް ބަލިކުރާނަމޭ ގޮވަމުންނެވެ.
އަލް-އަގްސާ އަކީ މުސްލިމުންގެ ތިންވަނަ އަށް އެންމެ މުގައްދަސް މިސްކިތެވެ. އޭގެ އިތުރުން އެ މިސްކިތަކީ ފަލަސްތީންގެ އެންމެ މުހިންމު ރަމްޒެވެ.
މިސްކިތް ބެލެހެއްޓުމުގެ ޒިންމާ އާ ހަވާލުވެފައިވާ އުރުދުންގެ ވަގްފް ގެ އޮފިޝަލަކު އޭއެފްޕީ އަށް މައުލޫމާތު ދެމުން ބުނީ ބެން-ގަވިއަރ އާ އެކު ދެހާހާހެއްހާ ޔަހޫދީން ދީނީ ލަވަ ކިޔަމުން އިޒްރޭލު ފުލުހުންގެ ހިމާޔަތުގައި މިސްކިތުގެ ގޯތި ތެރެއަށް އައިސް ވަދެގަތީކަމަށެވެ.
އޭގެ އިތުރުން މިސްކިތައް މުސްލިމުން ވަނުމަށް އިޒްރޭލް ފުލުހުން ގެންދިޔައީ ހުރަސް އަޅަމުން ކަމަށާއި އެވަގުތު މިސްކިތަށް ވަދެ ތިބި މުސްލިމުންނަށް އެތަނަށް ވަދެގަތް ޔަހޫދީން ވަނީ ފުރައްސާރަ ކޮށްފައި ކަމަށް އޮފިޝަލް ބުނެފައިވެއެވެ.
ބެން-ގަވިއަރ އާ އެކު ކެބިނެޓް އެހެން މިނިސްޓަރެއް ކަމަށްވާ ޔިޓްޒަކް ވަސަލައުފް އާއި އިޒްރޭލުގެ ގާނޫނު ހަދާ މަޖިލީސް ކަމުގައިވާ ކްނެސެޓްގެ ބައެއް މެމްބަރުންވެސް މި ކަމުގައި ވަނީ ބައިވެރިވެފައެވެ.
ސައުދީ އަރަބިއްޔާ އިން ވަނީ މި އަމަލު ކުށްވެރިކޮށް އަންގާރަ ދުވަހު ބަޔާނެއް ނެރެފައެވެ.
އިސްރާއީލުގެ އޮފިޝަލުންނާއި ވަޒަންވެރިން އަލް-އަޤްޞާ މިސްކިތަށް ވަދެގަތުމަކީ ސައުދީ އަރަބިއްޔާ އިން އެންމެ ހަރުކަށި އިބާރާތުން ކުށްވެރިކުރާ ކަމެއްކަމުގައި ޚާރިޖީ ވުޒާރާ އިން ނެރުނު ބަޔާނުގައި ބުނެފައިވެއެވެ.
ސައުދީގެ ބަޔާނުގައި ދީނީ ގޮތުން މުހިންމު ކަން ދެވޭ މިފަދަ ތަނަކަށް ވަދެ، އެތަނުގެ ހުރުމަތް ކަނޑާ، އެތަނުގެ ތާރީޚީ އަދި ދީނީ ހަގީގަތް އޮޅޭ ގޮތައް އަމަލު ކޮށް ދުނިޔޭގެ އެތައް މިލިއަން މުސްލިމުން ރުޅި އެރުވުމަށް ކުރާ މިފަދަ ކަންކަމުގެ ނަތީޖާ އާ މެދު ވިސްނުމަށް ވެސް ސައުދީ ގެ ބަޔާނުގައި ބުނެފައިވެއެވެ.
ސައުދީ އަރަބިއްޔާ އިން ވަނީ އިޒްރޭލުގެ މި ނޭއްގާނީ އަމަލު ހުއްޓުވާ އިޒްރޭލުން ބައިނަލް އަގްވާމީ ގާނޫނުތަކަށް ހުރުމަތްތެރިކޮށް ހިތުމަށް ބާރު އެޅުމަށް ބައިނަލްއަގްވާމީ މުޖްތަމައަށް ގޮވާލާފައެވެ.
ގަތަރުންވެސް ވަނީ ޔަހޫދީންގެ މި އަމަލު ކުށްވެރިކޮށް ބަޔާނެއް ނެރެފައެވެ. ގަތަރުން ބުނެފައިވަނީ އިޒްރޭލުން ތަކުރާރުކޮށް މަސައްކަތް ކުރަމުން ދަނީ އަލް-އަގްސާގެ ދީނީ އަދި ތާރީޚީ ހަގީގަތްތައް އޮޅުވާލުމަށް ކަމުގައެވެ. ގަތަރުން ސިފަ ކޮށްފައިވަނީ މިއީ އިޒްރޭލުން ހަމައެކަނި ފަލަސްތީން ރައްޔިތުންނަށް ދިން ހަމަލާއެއް ނޫން ކަމަށާއި މިއީ ދުނިޔޭގެ އެންމެހާ މުސްލިމުންނަށް ދިން ހަމަލާ އެއް ކަމަށެވެ.
