ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ޑިފެންޑަރު ލޫކަސް ހެނާންޑޭޒް އަށް އަނިޔާވެ، ކުޅުމާ ދުރުގައި ހުންނަން ޖެހިދާނެ ކަމުގެ ބިރު ބޮޑުވެއްޖެ އެވެ.

ހެނާންޑޭޒް އަށް އަނިޔާވެފައި ވަނީ ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗުގަ އެވެ. އެ މެޗުގެ ފުރަތަމަ 11 ގައި ހިމެނިގެން ހެނާންޑޭޒް ވަނީ ކުޅެފަ އެވެ. ނަމަވެސް މެޗުގެ ވަކި ހިސާބަކުން އޭނާ އަށް އަނިޔާވެ، ވަނީ ބަދަލު ކުރަން ޖެހިފަ އެވެ. މެޗުގެ ފުރަތަމަ ހާފުގެ 42 ވަނަ މިނެޓުގައި ހެނާންޑޭޒްގެ ބަދަލުގައި ކުޅެން އެރުވީ، ލޫކަސް ބެރާލްޑޯ އެވެ.

ހެނާންޑޭޒް އަށް އަނިޔާވެފައި ވަނީ މެޗުގެ 36 ވަނަ މިނެޓުގައި ޑޯޓްމަންޑުގެ ނިކްލަސް ފުލްކްރޫގް ލަނޑު ޖެހުމުގެ ކުރިން، އޭނާ ހުއްޓުވަން މަސައްކަތް ކުރުމުގެ ތެރޭގަ އެވެ. ހެނާންޑޭޒްގެ ވާއަތު ފަޔަށް ލިބުނު އަނިޔާގެ ސަބަބުން، ޕީއެސްޖީގެ މެޑިކަލް ޓީމުން އަންނަނީ އިތުރަށް ބަލަން ޖެހޭ ކަންކަން ބަލަމުންނެވެ. ފްރާންސްގެ މީޑިއާ ތަކުގައި ރިޕޯޓުކޮށްފައިވާ ގޮތުގައި، އަނިޔާގެ ސަބަބުން ހެނާންޑޭޒް އަށް ދުވަސް ކޮޅެއް ވަންދެން ކުޅުމާ ދުރުގައި ހުންނަން ޖެހިދާނެ އެވެ.

ހެނާންޑޭޒް އަކީ މި ސީޒަންގައި ވެސް ޕީއެސްޖީގެ ފުރަތަމަ 11 އިން އެ ޓީމުގެ ކޯޗު ލުއިސް އެންރީކޭ އިސްކަން ދެމުން އަންނަ ކުޅުންތެރިޔެކެވެ. މި ސީޒަންގެ މިހާތަނަށް އޭނާ ވަނީ ޕީއެސްޖީ އަށް 41 މެޗު ކުޅެދީ، ދެ ލަނޑު ޖަހައިފަ އެވެ.