ބާސެލޯނާގެ ކޯޗުކަމުގެ މަގާމު ދޫކޮށްލަން ނިންމި ނިންމުން ބަދަލުކޮށް، ބާސެލޯނާގައި މަޑުކުރަން އެ ޓީމުގެ ކޯޗު ޒަވީ ހެނާންޑޭޒް ނިންމައިފި އެވެ.
ބާސެލޯނާގެ ކުރީގެ ކެޕްޓަން ޒަވީ، އެ ކުލަބުގެ ކޯޗުކަމާ ހަވާލުވީ 2021 ވަނަ އަހަރު އެވެ. އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާން އޮތީ މިއަހަރުގެ ޖޫން މަހުގެ ނިޔަލަށެވެ. ނަމަވެސް ބާސެލޯނާ އިން ވަނީ އިތުރު އެއް އަހަރަށް އޭނާގެ އެއްބަސްވުން އައު ކޮށްފަ އެވެ. އެހެންކަމުން، އައު އެއްބަސްވުމުގެ މުއްދަތު ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ.
ނަމަވެސް، ޒަވީގެ އިރުޝާދުގެ ދަށުން ބާސެލޯނާގެ ނަތީޖާތައް ދަށްވެ، އޭނާ އަށް ފާޑު ކިޔުންތައް އަމާޒުވެފައި ވަނިކޮށް، ޒަވީ ވަނީ ބާސެލޯނާގެ ކޯޗުކަން ދޫކޮށްލަން ނިންމައިފަ އެވެ. ޒަވީ ނިންމީ، މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލުމަށެވެ. ނަމަވެސް ބާސެލޯނާގެ އިސްވެރިން އޭރު ވެސް ވަނީ ޒަވީގެ ނިންމުން ބަދަލު ކުރުމަށް އެދިފަ އެވެ. އަދި އައު ކޯޗެއް ހޯދުމުގެ މަސައްކަތް ކުރާނީ ވެސް، ޒަވީ ބާސެލޯނާގައި މަޑު ނުކުރަން މުޅިން ނިންމުމުން ކަމަށް އެ ކުލަބުން އޮތީ ބުނެފަ އެވެ.
ޒަވީގެ ނިންމުން ބަދަލު ކުރުމަށް އެންމެ ފުރަތަމަ ކުލަބުން އެދުނު ނަމަވެސް، އޭނާ ވަނީ އެ ނިންމުން ބަދަލު ނުކުރާނެ ކަމަށް ބުނެފަ އެވެ. އޭގެ ފަހުން ބާސެލޯނާގެ ރައީސް ޖޯން ލަޕޯޓާ އަދި ނައިބު ރައީސުންނާއި، އެހެނިހެން އިސްވެރިން ހިމެނޭހެން ވަނީ ޒަވީ އާއެކު މަޝްވަރާތަކެއް ކުރިއަށް ގެންގޮސްފަ އެވެ. އެ މަޝްވަރާތައް ކުރިއަށް ގެންދިޔައީ ބާސެލޯނާގެ ރައީސް ލަޕޯޓާގެ ގޭގަ އެވެ. އެ ބައްދަލުވުމުގައި ލަޕޯޓާ ވަނީ ބާސެލޯނާގައި މަޑު ކުރުމަށް ޒަވީގެ ކިބައިން އެދިފަ އެވެ. އަދި ލަޕޯޓާގެ އެދުމަށް، ބާސެލޯނާގައި މަޑު ކުރަން ޒަވީ ވަނީ ނިންމައިފަ އެވެ.
ޒަވީގެ އިރުޝާދުގެ ދަށުން ބާސެލޯނާ އިން ވަނީ މިހާތަނަށް ދެ ތައްޓެއް ކާމިޔާބު ކޮށްފަ އެވެ. އެއީ ސްޕެނިޝް ލީގު އަދި ސްޕެނިޝް ސުޕަ ކަޕް އެވެ. ބާސެލޯނާގެ އިސްވެރިންގެ އިތުރުން، ކުޅުންތެރިން ވެސް ބޭނުން ވަނީ ޒަވީ އެ ކުލަބުގައި މަޑު ކުރުމަށެވެ. ކުޅުންތެރިން ބުނާ ގޮތުގައި އެ ކުޅުންތެރިންގެ ފުރިހަމަ އިތުބާރު ޒަވީ އަށް އޮވެ އެވެ.
