ކޭން މޮޅު، ބަޔާން ދެކެ ބިރުން އާސެނަލް ނުތިބޭނެ: އޮޑެގާޑް

ޖަރުމަނުގެ ބަޔާން މިއުނިކް ދެކެ އާސެނަލް ބިރު ނުގަންނާނެ ކަމަށް އާސެނަލްގެ ކެޕްޓަން މާޓިން އޮޑެގާޑް ބުނެފި އެވެ.

އޭނާ މިހެ ން ބުނީ މި ދެ ޓީމު ޗެމްޕިއަންސް ލީގުގައި މިރޭ ކުޅޭ މެޗުގެ ކުރިންނެވެ.

އޮޑެގާޑް ބުނީ މި ސީޒުގައި 38 ގޯލު ޖަހާފައިވާ ބަޔާންގެ އިނގިރޭސި ކެޕްޓަން ހެރީ ކޭން އަކީ ކިތަންމެހާ ވެސް މޮޅު ކުޅުންތެރިއެއް ކަމަށެވެ.

އާސެނަލްގެ ފޯވަޑް ގަބްރިއަލް ޖެސޫސް ބުނީ ކޭން އަކީ ގޯލު ޖަހަން އެންމެ މޮޅު ފޯވަޑް ކަމަށެވެ. އަދި އާސެނަލްގެ ކޯޗު މިކޭލް އާޓެޓާ ބުނީ މިދިޔަ އަހަރު ކޭންގެ ތަފާސް ހިސާބުތަކުން އޭނާ ފަދަ އެހެން މީހަކު ނެތްހާ މޮޅު ކަމަށެވެ.

މެޗުގެ ކުރިން ވާހަކަ ދައްކަމުން ބަޔާންގެ ކޯޗު ތޯމަސް ޓުޗެލް ބުނީ ޖަރުމަނު ލީގުގައި 12 ޕޮއިންޓު މަދުވެގެން ދެ ވަނާގައި ބަޔާން އޮތް ނަމަވެސް އިނގިރޭސި ލީގުގެ އެއްވަނާގައި އޮތް އާސެނަލް އަކީ އެ ލީގުގެ އެންމެ މޮޅު ޓީމު ކަމަށެވެ.

އޭނާ އަދި ބުނީ ހެރީ ކޭންގެ ތަޖުރިބާ އަކީ އާސެނަލްއާ ދެކޮޅަށް ބަޔާނަށް ލިބޭ އެންމެ މުހިންމު ހަތިޔާރު ކަމަށެވެ.