ރަސްމާލެ ހިއްކުމަށް، ހިމާޔަތްކޮށްފައިވާ ސަރަހައްދަކުން ވެލި ނެގޭގޮތަށް ގަވާއިދު އިސްލާހުކޮށްފި
މި އިސްލާހާއެކު، ހިމާޔަތްކޮށްފައިވާ ކޮންމެ ތަނަކުންވެސް ވެލި ނެގޭނެ
ފުށިދިއްގަރު ފަޅު ހިއްކަން ފެށުން
ބަޖެޓް ކުރުމެއް ނެތި ހިއްކަން ފަށާފައިވާ ރަސްމާލެ ހިއްކަން ބޭނުންވާ ވެލި، ހިމާޔަތްކޮށްފައިވާ ސަރަހައްދަކުން ނެގޭގޮތަށް ގަވާއިދު އިސްލާހުކޮށްފިއެވެ.
ދިވެހިރާއްޖޭގެ ރަށްރަށާއި ފަޅުގެ ސަރަހައްދު ހިއްކުމާއި ފުންކުރުމުގެ ގަވާއިދަށް 2 ވަނަ އިސްލާހު ގެނައުމުގެ ގަވާއިދުގައި އިސްލާހު ގެނެސްފައިވަނީ، ބިން ހިއްކުމަށް ވެލި ނެގިދާނެ ތަންތަނާއި ވެލި ނެގުން އަދި ބިން ހިއްކުންފަދަ މަސައްކަތް ކުރުން މަނާ ސަރަހައްދުތައް ހިމެނޭ މާއްދާއަށެވެ. އެއީ މި ގަވާއިދުގެ 13 ވަނަ މާއްދާއެވެ.
13 ވަނަ މާއްދާގެ (ރ) އަށް އިސްލާހު ގެނެސްފައިވަނީ (ރ)ގެ ފަހަތަށް ނަންބަރެއް އިތުރުކުރުމަށްފަހުއެވެ. އެގޮތުން (ރ)ގެ 1 ވަނަ ނަންބަރުގައި ބުނެފައިވަނީ ގާނޫނު ނަންބަރު 4/93 (ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނު)ގެ ދަށުން ހިމާޔަތްކޮށްފައިވާ ސަރަހައްދަކުން ނުވަތަ "އެންވަޔަރަންމަންޓަލީ ސެންސިޓިވް އޭރިޔާސް"ގެ ގޮތުގައި ކަނޑައަޅާފައިވާ ސަރަހައްދެއްގެ 200 މީޓަރަށްވުރެ ކައިރިން ވެލިނެގުން، ނުވަތަ ބިން ހިއްކުން، ނުވަތަ ފަޅު ފުންކުރުމަކީ މަނާކަމެއް ކަމަށެވެ.
ނަމަވެސް 13 ވަނަ މާއްދާގެ (ރ)ގެ ފަހަތަށް (2) އިތުރުކޮށް އެ ނަންބަރުގައި ބުނެފައިވަނީ (ރ)ގެ 1 ވަނަ ނަންބަރުގައި އެހެން ބަޔާންކޮށްފައި އޮތްނަމަވެސް، ވަޒީރުންގެ މަޖިލީހުން ނުވަތަ ވަޒީރުންގެ މަޖިލީހުގެ ކޮމިޓީއަކުން ކަނޑައަޅާ މަޝްރޫއެއް ހިންގުމަށްޓަކައި، 5 ކަމަކަށް ބެލުމަށްފަހު އެފަދަ ސަރަހައްދެއްގައި ބިންހިއްކުމާއި، ވެލި ނެގުމާއި، ފަޅު ފުންކުރުން ފަދަ މަސައްކަތެއް ކުރެވިދާނެ ކަމަށެވެ.
އެގޮތުން, އެފަދަ މަސައްކަތެއް ކުރަންވާނީ، އެ މަޝްރޫޢު ރާވައި ހިންގާ ފަރާތުން 5 ކަމެއް ފުރިހަމަކުރުމަށް ޝަރުތުކޮށް، ތަންފީޒީ އިދާރާއިން ހުއްދަ ދިނުމަށްފަހު ކަމަށެވެ.
