ރައީސް ޑޮކްޓަރު މުޙައްމަދު މުޢިއްޒު އަކީ ރަށް ރަށަށް ވަޑައިގެން ކައުންސިލްތަކާ ބައްދަލު ކުރައްވާ ހަމައެކަނި ރައީސް ކަމަށް، ޕީއެންސީގެ ޕީޖަރު އިބްރާހީމް ފަލާޙު ވިދާޅުވީތީ އަޑު އެހީމެވެ. ކުރީގެ ރައީސުން މާލޭގައި ތިބެނީ ކަމަށާއި، އެއާ ޚިލާފަށް ރައީސް މުޢިއްޒު ރަށް ރަށަށް ވަޑައިގެން ކައުންސިލްތަކާ ބައްދަލު ކުރައްވާ ކަމަށް ވެސް ފަލާޙު ވިދާޅުވި އެވެ.

ފަލާޙު އެވެ. ހަނދާން ހުންނާނެ އެވެ. އެކަމަކު، އިންސާނީ ތަބިއްޔަތުގައި ވެސް ވާ ގޮތަކީ، މާ ބޮޑަށް ތައުރީފުކޮށް، ހުޝާމަދު ކުރަންވީމާ އޮޅެނީ އެވެ. ހެވާއި ނުބައި ވެސް ވަކި ނުވަނީ އެވެ. އެއްވެސް ޙާލެއްގައި މި ދެންނެވީ ފަލާޙު އަށް އެހެންވީ ވާހަކަ އެއް ވެސް ނޫނެވެ.

ފަލާޙު އަށް ނޭނގުނަސް، ހައުސިން މިނިސްޓަރު ކަމުގައި ރައީސް މުޢިއްޒު ހުންނެވިއިރު މާލޭ ސިޓީ ކައުންސިލަށް ހަދާލި ގޮތް އިނގޭނެ ކިތަންމެ ބަޔަކު މި ޤައުމުގައި އެބަ ތިއްބެވެ. ހުދު ރައީސް މުޢިއްޒު އަމިއްލަ ފުޅަށް ވެސް މިއަދު އެކަން އިޙުސާސް ވާނެ އެވެ. ސިޓީ ކައުންސިލްގެ ހުރިހާ ބާރުތަކެއް، ހައުސިން މިނިސްޓަރުގެ އަތް ޕުޅަށް ނަންގަވައިގެން އުޅުނު ހަމައެކަނި މީހަކީ ރައީސް މުޢިއްޒު އެވެ.

ފަލާޙު އެވެ. ރައީސް މުޢިއްޒު ރަށް ރަށަށް ވަޑައިގެން ކައުންސިލްތަކާ ބައްދަލު ނުކުރައްވައެކޭ ނުބުނަމެވެ. ރަށް ރަށަށް ވަޑައިގަންނަވާ ދަތުރު ތަކުގައި ބައްދަލު ކުރައްވާނެ އެވެ. އެއީ ހުރިހާ ރައީސުން ވެސް ކުރައްވާ ކަމަކަށް ވާތީ އެވެ. އެކަމަކު އެހެން ރައީސުންނާ ޚިލާފަށް ރައީސް މުޢިއްޒު ކުރައްވާ ކަމެއް އޮވެ އެވެ.

ރަށް ރަށަށް ވަޑައިގެން ކައުންސިލްތަކާ ބައްދަލު ކުރައްވާއިރު، ކައުންސިލްތަކުގެ ކަންބޮޑުވުމާއި، ކައުންސިލްތަކުން ބޭނުންވާ ކަންތައްތަކާއި، ރަށު ރައްޔިތުން ބޭނުންވާ ކަންކަން ހިއްސާ ކުރުމުގެ ފުރުސަތު ނުލިބޭ ކަމަށް ބުނި ކިތައް ކައުންސިލް އެ އޮތީ ހެއްޔެވެ؟

ބައެއް އަތޮޅު ހުރިހާ ރަށަކަށް ވަަޑައިގެންނެވި ނަމަވެސް، ބައެއް ރަށް ރަށުގެ ކައުންސިލްތަކާ ބައްދަލު ނުކޮށްގެން އެކަމުގެ ޝަކުވާ އާއި ކަންބޮޑުވުން ފާޅު ކުރީ ވެސް ކިތައް ކައުންސިލުން ހެއްޔެވެ؟ އެ ވާހަކަތައް ސޯޝަލް މީޑިއާގައި ލިޔެ، އެކަމުގެ ނުރުހުން ފާޅު ކުރީ ކިތައް ކައުންސިލުން ހެއްޔެވެ؟

ރައީސް މުޢިއްޒު މިހާރު ކައުންސިލްތަކާ ބައްދަލު ކުރައްވަނީ އެމަނިކުފާނު ބޭނުން ވެގެންނެވެ. ކައުންސިލު ތަކުން އެދިގެން ކުރައްވާ ކަމެއް ނޫން ކަމަށް ވެދާނެއެވެ. މި ދެންނެވީ، ރައީސް މުޢިއްޒު އަށް ރަށަކަށް ވަޑައިގެންނެވުނު ދުވަހަކުން ކައުންސިލްތަކާ ބައްދަލު ކުރުމަށް ކިޔާނީ ކޮން ނިޒާމެއް ހެއްޔެވެ؟ ކައުންސިލްތަކާ ބައްދަލު ކުރަންވީ އެމަނިކުފާނަށް ވަގުތު ވީ އިރަކުން ހެއްޔެވެ؟

ކައުންސިލްތަކުން ރައީސް މުޢިއްޒުއާ ބައްދަލު ކުރަން ބޭނުންވެ، އެ ފުރުސަތު ނުލިބިގެން ޝަކުވާ ކުރީ ކިތައް ކައުންސިލުން ހެއްޔެވެ؟ އެޕޮއިންޓުމަންޓަށް އެެދި ފޮނުވައިގެން، ބައްދަލުވުން ހަމަ ނުޖެހިގެން ޝަކުވާ ކުރީ ކިތައް ކައުންސިލުން ހެއްޔެވެ؟

ފަލާޙުމެން އަށް ނޭނގެނީ ކަަމަށް ވެދާނެ އެވެ. ރައީސް މުޢިއްޒު އާ ދެކޮޅަށް ރާއްޖޭގެ 80 އަށް ވުރެ ގިނަ ކައުންސިލްތަކުން ބަޔާން ނެރެ، ސަރުކާރުން ލާމަރުކަޒީ ނިޒާމު ފުނޑާލަން މަސައްކަތް ކުރަނީ ކަމަށް ބަޔާންތަކުގައި ލިޔެފައި އެ އޮތީ، ރައީސް މުޢިއްޒު ލާމަރުކަޒީ ނިޒާމު ފުނޑާލާތީ ނޫން ހެއްޔެވެ؟

ރައީސް މުޢިއްޒު ކައުންސިލްތައް ބާރުވެރި ކުރަން މަސައްކަތް ކުރާ ކަމަށާއި، ކައުންސިލްތަކަށް ބޭނުންވާ ކަންކަން ރައީސް މުޢިއްޒު ކޮށްދެއްވާ ކަމަށް ބުނެ ފަލާޙުމެން ވާހަކަ ދައްކަން ރަނގަޅެއް ނޫނެެވެ. ލާމަރުކަޒީ ނިޒާމަށް ބަދަލު ގެންނަން ސަރުކާރުން ހުށަހަޅައި، އެކަން މަޖިލީހުން ފާސްކޮށްފައިވާއިރު، އެކަމާ ދެކޮޅު ހެދި ކައުންސިލްތަކަށް އިންޒާރު ދެއްވީ ވެސް ފަލާޙު ނޫންތޯ އެވެ؟