ދޮޅު އަހަރު ފަހުން ރައީސް ވިދާޅުވީ ތުޅާދޫ އެއާޕޯޓުގެ މަސައްކަތް ލަސްވީ ފައިސާގެ ގޮތުން ކަންކަން ތަރުތީބު ވާން ޖެހޭތީ ކަމަށް
ރައީސް މުޢިއްޒު ވިދާޅުވެފައި ވަނީ، މިދިޔަ ރިޔާސީ އިންތިޚާބުގެ ތެރޭގައި ތުޅާދޫގެ ތަރައްޤީ އަށް ވަރަށް މުހިންމު ވައުދުތަކެއް ވެފައިވާ ކަމަށް
ތުޅާދޫގެ ރައްޔިތުންނާ ބައްދަލު ކުރައްވައި ރައީސް މުޢިއްޒު ވާހަކަ ދައްކަވަނީ
ބ.އަތޮޅު ތުޅާދޫގެ އެއާޕޯޓު ތަރައްޤީ ކުރުމުގެ މަސައްކަތް މިއަދާ ހަމައަށް ލަސްވެގެން ދިޔައީ، ފައިސާގެ ގޮތުން ބައެއް ކަންކަން ތަރުތީބު ކުރަން ޖެހޭތީ ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.
ތުޅާދޫގެ އެއާޕޯޓު ތަރައްޤީ ކުރުމަށް ބޭނުންވާ ބިން ހިއްކުމުގެ މަޝްރޫއު ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ވަނީ ފަށައިފަ އެވެ. ނަމަވެސް ވެރިކަން ބަދަލުވުމާ އެކު އެ މަސައްކަތް މަޑު ޖެހިފައިވާއިރު، ކުރިން ހިއްކި ސަރަހައްދު ވެސް ގިރާލަމުންދާ ކަމުގެ ކަންބޮޑުވުން އޮތީ ފާޅު ކޮށްފަ އެވެ.
ބ.އަތޮޅުގެ ރަށްތަކަށް ކުރައްވާ ދަތުރުފުޅުގައި ރައީސް މުޢިއްޒު އަންގާރަ ދުވަހު ތުޅާދޫ އަށް ވަޑައިގެންފައިވާއިރު، އެ ދަތުރުފުޅުގައި ވަނީ ތުޅާދޫ އެއާޕޯޓުގެ މަޝްރޫއުގެ އެއްބަސްވުމުގައި ސޮއި ކޮށްފަ އެވެ. އެ މަޝްރޫއުގެ ދަށުން ރަންވޭ އާއި، އެއާޕޯޓުގެ ޓާމިނަލް އަދި އިތުރު ފެސިލިޓީތައް ތަރައްޤީ ކުރެވޭނެ ކަމަށް ވަނީ ބުނެފަ އެވެ.
ތުޅާދޫގެ ރައްޔިތުންނާ ބައްދަލު ކުރައްވައި ވާހަކަ ދައްކަވަމުން ރައީސް މުޢިއްޒު ވިދާޅުވެފައި ވަނީ، މިދިޔަ ރިޔާސީ އިންތިޚާބުގެ ތެރޭގައި ތުޅާދޫގެ ތަރައްޤީ އަށް ވަރަށް މުހިންމު ވައުދުތަކެއް ވެފައިވާ ކަމަށެވެ. އެ ވައުދުތައް ފުއްދުމަކީ އެމަނިކުފާނުގެ އެންމެ މުހިންމު އެއް ޒިންމާކަން ފާހަގަ ކުރައްވައި ރައީސް ވިދާޅުވީ، އެމަނިކުފާނު ވެވަޑައިގަންނަވާ ވައުދުތައް ފުއްދުމަށް ވަރަށް އަމާނާތްތެރިކަމާ އެކު އަދި އިޚުލާސްތެރިކަމާ އެކު ސަމާލުކަން ދީގެން މުޅި ސަރުކާރު މަސަައްކަތް ކުރަމުން ގެންދާ ކަމަށެވެ.
މީގެ އިތުރުން ރައީސް މުޢިއްޒު ވިދާޅުވެފައި ވަނީ އެކި ވައުދުތައް ފުއްދުމުގެ މަސައްކަތް ފެށިގެން ދަނީ އެކި ދުވަސްވަރު އެކަމަށް ބޭނުންވާ އެކި ކަހަލަ ކަންތައްތައް ފަހި ކުރެވިގެން އަދި ތަރުތީބު ކުރެވިގެން ކަމަށެވެ. އެގޮތުން ތުޅާދޫގެ ތަރައްޤީ އަށް އެންމެ މުހިންމު މަޝްރޫއަކީ އެއާޕޯޓުގެ މަޝްރޫއު ކަމަށް އެމަނިކުފާނު ވިދާޅުވި އެވެ.
އެއާޕޯޓު މަޝްރޫއުގައި ސޮއި ކުރެވޭ ހިސާބަށް މިއަދު ގެންދެވުނުއިރު، އެ މަޝްރޫއަކީ ފައިސާގެ ގޮތުން ގިނަ ކަންތައްތަކެއް ތަރުތީބު ކުރެވިގެން ކުރިއަށް ގެންދަން ޖެހޭ މަޝްރޫއަކަށް ވާތީ ވަގުތު ކޮޅެއް ނެގީ ކަމަށް ރައީސް މުޢިއްޒު ވިދާޅުވި އެވެ. ރައީސް ވިދާޅުވީ މިއަދު ތުޅާދޫ އެއާޕޯޓުގެ މަޝްރޫއު ފެށިގެންދާއިރު، އެ މަޝްރޫއު ހުއްޓުމެއް ނެތި، ބާރު ދުވެލީގައި ކުރިއަށް ގެންގޮސް ފުރިހަމަ އަށް ނިންމައި ދޭނެ ކަމުގެ ޔަގީންކަން ދޭން ބޭނުންވާ ކަމަށެވެ.
އެކި ވައުދުތައް ފުއްދުމުގެ މަސައްކަތް ފެށިގެން ދަނީ އެކި ދުވަސްވަރު އެކަމަށް ބޭނުންވާ އެކި ކަހަލަ ކަންތައްތައް ފަހި ކުރެވިގެން، ތަރުތީބު ކުރެވިގެން ދިޔުމުން. މިގޮތުން ބަލާއިރު މި ރަށުގެ ތަރައްޤީ އަށް އެންމެ މުހިންމު މަޝްރޫއުގައި މިއަދު އަޅުގަނޑުމެންނަށް ސޮއި ކުރެވޭ ހިސާބަށް މި ގެންދެވުނީ. މި މަޝްރޫއަކީ، އެއާޕޯޓުގެ މަޝްރޫއަކީ ފައިސާގެ ގޮތުން ފުދޭ ވަރެއްގެ ގިނަ ކަންތައްތަކެއް ތަރުތީބު ކޮށްގެން ފެށޭ ވަރުގެ މަޝްރޫއަކަށް ވާތީ ވަގުތު ކޮޅެއް ނެގީ. އަޅުގަނޑު މިއަދު އެންމެ ފުރަތަމަ ވެސް މިކަމާ ގުޅޭ ގޮތުން ދަންނަވަން އޮތް ވާހަކަ އަކީ، ތިބޭފުޅުންނަށް އަޅުގަނޑު ދޭ ޔަގީންކަން، އިރާދަކުރެއްވިޔާ މިއަދު މި ފެށޭ އެއާޕޯޓުގެ މަޝްރޫއު ހުއްޓުމެއް ނެތި ބާރު ސްޕީޑުގައި ކުރިއަށް ގެންގޮސް ފުރިހަމަ އަށް ނިންމައި ދޭނެ ކަމުގެ ޔަގީންކަން.ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު
މީގެ އިތުރުން ރައީސް މުޢިއްޒު ވިދާޅުވީ އެމަނިކުފާނުގެ ސަރުކާރުން ތުޅާދޫ އެއާޕޯޓުގެ މަޝްރޫއުގެ މަސައްކަތް ފެށީ، ކުރީ ސަރުކާރުން ތުޅާދޫ ކައުންސިލާ އެކު ހަދާފައިވާ އަދި ފާސްކޮށްފައިވާ އީއައިއޭ އަށް ބިނާ ކޮށްފައި ކަމަށެވެ. އެ އީއޭއައި އަށް ބިނާ ކޮށްފައި މަސަައްކަތް ފެށި ނަމަވެސް، އެމަނިކުފާނު ބަދަލު ތަކެއް ގެންނަވާނެ ކަމަށް ރައީސް ވިދާޅުވި އެވެ.
ތުޅާދޫ އެއާޕޯޓުގެ ބިން ހިއްކުމަށް ބޭނުންވާ މަސައްކަތް ފެށުމަށް ވެހިކަލްތައް ތުޅާދޫ އަށް ގެންގޮސްފައި ވަނީ ރައީސް މުޢިއްޒު އެ ރަށަށް ވަޑައިގެންނެވުމުގެ ދެ ދުވަސް ކުރިންނެވެ. އެ ރަށު ކައުންސިލް އިން މީގެ ކުރިން ބުނެފައިވާ ގޮތުގައި، އެ މަސައްކަތް ފެށުމަށް ރައީސް މުޢިއްޒު ތުޅާދޫ އަށް ވަޑައިގަންނަވާ ނަމަވެސް، އެކަމާ ގުޅޭ އެއްވެސް މައުލޫމާތެއް ކައުންސިލާ ހިއްސާކޮށްފައި ނުވާ ކަމަށެވެ.
