ރަމަޟާން މަހާ ބައްދަލުވިއިރު ޢާއިލާ އެއްކޮށް ޝަހީދުކޮށް ޤަބުރުސްތާނުގައި: "ބޭނުމީ މަންމަގެ އަޑު އަހާލަން"

ޢުމުރުން ކިތަންމެ ދުވަހެއް ވިޔަސް، މަންމަގެ އަތުން ތައްޔާރު ކުރާ ކާނާއަށް އިންތިޒާރު ކުރާ މީހުން މަދެއް ނުވާނެއެވެ. ވަކިން ޚާއްޞަ ރަމަޟާން މަހާ ދިމާކޮށް، ޢާއިލާގެ ހުރިހާ މެންބަރުން އެއްތަނަކަށް ޖަމާވެ، އެންމެން އެކުގައި ތައްޔާރު ކުރާ ކާބޯތަކެތިން ރޯދަވީއްލުމާއި، ދީނުގެ އަޅުކަންތަކުގައި މަޝްހޫލުވެ އުޅުމަކީ އާދަޔާ ޚިލާފު އުފަލަކާއި ހިތްހަމަޖެހުމެއް ލިއްބައިދޭ ކަމެއް ކަމާ މެދު ދެބަސް ވާނެ މީހަކު މަދު ވާނެއެވެ. ބައެއް މީހުންނަކީ ތަޤުދީރު ނިޔާ ކުރި ގޮތުން އެފަދަ ފުރުޞަތުތަކުން މަޚްރޫމުވެފައިވާ މީހުންނެވެ. މިއަދު އެފަދަ އެންމެ ސާފު މަންޒަރެއް ފެނިގެންދަނީ ނިރުބަވެރި އިޒްރޭލުގެ ޤަތުލުޢާންމުގައި މުށްދަށުލާފައި އޮތް ފަލަސްޠީނުގެ ޣައްޒާއިންނެވެ.

ޣައްޒާޣެ ރަށްވެއްސެއް ކަމަށް ވާ އިބްރާހީމް ޙައްސޫނާ، މުލަ ރޯދަ ދުވަސް ހޭދަ ކުރީ އިޒްރޭލުގެ ޢުދުވާންތަކުގައި ޝަހީދުކޮށްލާފައިވާ އޭނާގެ ޢާއިލާ މެންބަރުން ވަޅުލާފައިވާ ޤަބުރުސްތާނުގައެވެ. އެތަނުގައި އިނދެ އޭނާ ދިޔައީ ފޯނުން އެއްޗެއްވެސް އަޑު އަހަމުންނެވެ. އެއީ އިޒްރޭލުގެ ޢުދުވާންތަކުގައި ޝަހީދުވެދިއުމުގެ ކުރިން އިބްރާހީމްގެ މަންމަ، އޭނާއަށް ފޮނުވި ވޮއިސްމެއިލްއެކެވެ. ރަމަޟާން މަހަކީ ބަޔާންކޮށްދޭން ދަތި އުފާވެރި ކަމެއް އިޙްސާސް ކުރެވޭ މައްސަރެއް ނަމަވެސް، އިބްރާހީމްގެ ހިތުގައި އެ ވިންދެއް ނުޖަހައެވެ. މަންމައާއި ބައްޕަ އަދި އެއްބަނޑު އެއްބަފާ އަޚުންނާއި އެ މިހުންގެ ޢާއިލާތައް މިއަދު އޮތީ ކަފުނުގައި ކަމަށް ވާތީއެވެ.

މަންމަގެ މަހާނަ ކައިރީގައި އިށީނދެލައިގެން އިނދެ، އިބްރާހީމްގެ މަންމަ އެންމެ ފަހުން ފޮނުވި ވޮއިސްމެއިލް އަޑުއަހަމުން ދިޔައިރު އެ ޒުވާނާގެ މޫނުމަތިން ފެންނަމުން ދިޔައީ ހިތިފޮނި އަސަރުތަކެކެވެ. ދަރިންގެ ކަންކަމުގައި "ބޭކާރު" ވިސްނުންތައް ގެންގުޅޭ ހަނދާންތައް އައުވަމުން ދިޔައެވެ.

މައިންބަފައިން ދިރި ދުނިޔޭގައި ތިބެ، ދަރިން އުޅޭ ނޫޅޭ ގޮތް ބަލަމުން ދިއުމަކީ ބައެއް ފަހަރު ބަލައިގަންނަން ދަތި ކަމަކަށް އޮންނަނީ ވެފައެވެ. ނަމަވެސް މައިންބަފައިންނަށް ދަރިނެއް ދުވަހަކުވެސް ބޮޑެއް ނުވާނެތާއެވެ. ޢުމުރުން ކިތަންމެ ދުވަހެއް ވިއަސް، އެ ދަރިފުޅުގެ ގައިގައި އަނިޔާވެރިއެއްގެ އިނގިލި ކުރި ކީއްކުރަން ހެއްޔެވެ، ސުންޕާ ބެލުމެއްގެ ނަޒަރު ޢަމާޒުވާކަށްވެސް އެއްވެސް މަޔަކު ނޭދޭނެއެވެ. ގެއިން ބޭރުގައި އުޅޭ ވަގުތުތަކުގައި މަންމަ ގުޅާ ވަރުން "އުނދަގޫ ވެގެން" އެ ޝަކުވާ ކުރެވޭ ގޮތްވެއެވެ. ނަމަވެސް މިއަދު އިބްރާހީމް އެންމެ އިންތިޒާރު ކުރަމުން އެ ދަނީ ހަމަ އެފަދަ ކޯލަކަށެވެ.

އިބްރާހީމް ވަނީ އޭނާގެ ފޯނުގައި އިން އެ ދެމައިންގެ ފޮޓޯއެއް މީޑިއާއަށް ދައްކާލާފައެވެ. އެ ފޮޓޯއިންވެސް އެ ދެމައިންގެ ބަދަހި ގުޅުން ސާފުވެއެވެ. އިބްރާހީމްގެ މަންމަ، އުއްމު ކަރަމްގެ ފަރާތުން އޭނާއަށް އެންމެ ފަހުން ލިބުނު ވޮއިސްމެއިލްއަކީ ތާ އަބަދުމެހެން އޭނާގެ މަންމަގެ ފަރާތުން އަހަންޖެހިފައި އޮންނަ ޝަކުވާއެއްގެ އަޑެވެ. "ލޯބިވާ އިބްރާހީމް، ދަރިފުޅުގެ ޙާލު ބަލައިލަން ހަމަ ބޭނުންވީ. އިއްޔެއްސުރެ މި ގުޅަނީ، އެކަމަކު ދަރިފުޅު ޖަވާބެއް ނުދޭ. ކަމެއް ގޯސްވީތަ؟" އެ މަންމަގެ އަޑުން ފޮނުވާލި ވޮއިސްމެއިލްއަކީ މިއަދު އިބްރާހީމްއަށް އަގުބޮޑު ޖަވާހިރަކަށްވުރެވެސް އަގުހުރި އެއްޗެކެވެ.

އުއްމު ކަރަމްގެ މަހާނައާއި ޖެހިގެން އޮތީ އިބްރާހީމްގެ ބައްޕަގެ މަހާނައެވެ. މަހާނަތަކުގެ ތެރޭގައި ހުރެ، އިބްރާހީމް ވަނީ ދުޢާކޮށްފައެވެ.

އިޒްރޭލުގެ އަނިޔާވެރިކަމުގެ ޝިކާރައަކަށް ވުމުގެ ކުރިން އިބްރާހީމްގެ ޢާއިލާއަކީ އުފާވެރި ޢާއިލާއެކެވެ. މަންމަގެ އަތުން ތައްޔާރުކުރާ ކާއެތިކޮޅު ހޯދަން ދެބެންގެ މެދުގައި ކުދިކުދި ތަޅާފޮޅުންތައް ހިނގައެވެ. އިބްރާހީމް ބުނާ ގޮތުގައި އޭނާގެ މަންމަ ތައްޔާރު ކުރާ ކެއުންތަކަކީ މުޅި ދުނިޔޭގެވެސް 1 ނަމްބަރު ކެއުމެވެ.

ހިތުގައި އަޅަމުން ދިޔަ ގަދަ ވޭނާއެކު، މިއީ ރަމަޟާން މަސް ކަމަށް ޤަބޫލު ކުރަންވެސް އިބްރާހީމަށް ދައްޗެވެ.

 ކުޑަކުދިންގެ މޫނުމައްޗަށް ހިނިތުންވުމެއް ގެނެސްދިނުމުގެ މަޤްޞަދުގައި ފުއްޕާހަން ފުއްޕައިދިނުމުގެ މަސައްކަތް ކުރިޔަސް، މިއަދު އިބްރާހީމްގެ ހިތަށް ލިބޭ އުފަލެއް ނެތެވެ.

އިބްރާހީމް، މުލަ ރޯދަ ދުވަހުގެ ރޯދަ ވީއްލީ، ފަލަސްޠީނުގެ އެންމެންހެން މިއަދު އެތަނަކަށް ޖަމާވެފައިވާ ރަފަޙުގެ ކަޑައަކުން ވިއްކި ފަލާފެލް ތައްޓަކުންނެވެ. ޕޭވްމަންޓް މަތީގައި އިށީނދެލައިގެން އިނދެ ރޯދަ ވީއްލަމުން ދިޔަ އިރު، އެ ހިތުގައި އަޅަމުން ދިޔަ ވޭނާއި، އެ ސިކުނޑިއަށް ދަތިކުރަމުން ދިޔަ ހަނދާންތައް އެހެން މީހަކަށް ނޭނގޭނެއެވެ.