ރެކޯޑާއެކު ސިޓީ އެފްއޭ ކަޕްގެ ސެމީ ފައިނަލަށް!

އިނގިރޭސި އެފްއޭ ކަޕްގެ ރެކޯޑަކާއެކު މެންޗެސްޓަރ ސިޓީން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

ސިޓީން ސެމީ ފައިނަލްގެ ޖާގައެއް ހޯދީ، ހޮނިހިރު ދުވަހުގެ ރޭ ކުޅުނު ކުއާޓާ ފައިނަލް މެޗުގައި ނިއުކާސަލް ޔުނައިޓެޑު ބަލިކޮށްގެންނެވެ. މެޗުން ސިޓީ މޮޅުވީ 2-0 އިންނެވެ. އެ ޓީމުގެ ދެ ލަނޑު ވެސް ޖެހީ މެޗުގެ ފުރަތަމަ ހާފުގަ އެވެ.

މެޗުގައި ސިޓީން ޖެހި ދެ ލަނޑު ވެސް ޖެހީ ޕޯޗުގަލްގެ ބެނާޑޯ ސިލްވާ އެވެ. މެޗު ފަށައިގެން 13 ވަނަ މިނެޓުގައި ސިޓީގެ ފުރަތަމަ ލަނޑު އޭނާ ޖެހީ ރޮޑްރީ ތަނަވަސްކޮށްދިން ފުރުސަތެއްގަ އެވެ. ސިޓީގެ ދެ ވަނަ ލަނޑު ފުރަތަމަ ހާފުގެ 31 ވަނަ މިނެޓުގައި ސިލްވާ ޖެހީ ރުބެން ޑިއާސް ތަނަވަސްކޮށްދިން ފުރުސަތެއްގަ އެވެ. މެޗުގައި ސިޓީން ރަނގަޅަށް ކުޅުނުއިރު، ސިޓީގެ ގޯލަށް އަމާޒުކޮށް ނިއުކާސަލަށް ފޮނުވާލެވުނީ އެންމެ ހަމަލާ އެކެވެ.

މޮޅާއެކު ސިޓީން ސެމީ ފައިނަލްގެ ޖާގަ ހޯދިއިރު މިއީ ސިޓީ، ޖެހި ޖެހިގެން އެފްއޭ ކަޕްގެ ސެމީ ފައިނަލްގައި ވާދަކުރާނެ ހަ ވަނަ ފަހަރެވެ. އެފްއޭ ކަޕްގެ ތާރީޚުގައި ޖެހި ޖެހިގެން ހަ އަހަރު ސެމީ ފައިނަލްގައި ވާދަކުރާ ހަމައެކަނި ޓީމަކީ ވެސް ސިޓީ އެވެ.

މުބާރާތުގެ ކުއާޓާ ފައިނަލްގެ އަނެއް މެޗުގައި ކޮވެންޓްރީ އިން ވަނީ ވުލްވްސްގެ މައްޗަށް ކުރި ހޯދައިފަ އެވެ.