ފުލަމް އަތުން ބަލިވެ، ޓޮޓެންހަމުން ފުރުސަތު ނަގާލައިފި

އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅުނު މެޗުން ޓޮޓެންހަމް ބަލިވެއްޖެ އެވެ.

ހޮނިހިރު ދުވަހުގެ ރޭ ފުލަމްގެ އަމިއްލަ ދަނޑުގައި ކުޅުނު މެޗުން ޓޮޓެންހަމް ބަލިވީ 3-0 އިންނެވެ. މެޗުގެ ފުރަތަމަ ހާފުގައި ފުލަމް އިން އެއް ލަނޑުގެ ލީޑެއް ނެގިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 42 ވަނަ މިނެޓުގައި ފުލަމް އަށް ލީޑު ނަގައިދިނީ ރޮޑްރީގޯ މުނީޒް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އެންޓޮނީ ރޮބާޓްސަން އެވެ. ދެ ވަނަ ހާފު ފަށައިގެން ހަތަރު ވަނަ މިނެޓުގައި ޓިމޯތީ ކަސްޓަނީ ތަނަވަސްކޮށްދިން ފުރުސަތެއްގައި ޓޮޓެންހަމްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ، ސާސާ ލުކިޗް އެވެ. އެ ޓީމުގެ ފަހު ލަނޑު، މެޗުގެ 61 ވަނަ މިނެޓުގައި ޖެހީ މުނީޒް އެވެ.

މެޗުން މޮޅުވެ ލީގު ތާވަލްގެ ހަތަރު ވަނަ އަށް ޖެހިލުމުގެ ފުރުސަތު ޓޮޓެންހަމަށް އޮތެވެ. ނަމަވެސް ބައްޔާއެކު އެ ޓީމު އޮތީ ފަސް ވަނައިގަ އެވެ. އެއީ މިހާތަނަށް ލީގުގައި ކުޅުނު 28 މެޗުން 53 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ހަތަރު ވަނައިގައި އެސްޓަން ވިލާ އަށް ލިބެނީ 55 ޕޮއިންޓެވެ. މެޗުން މޮޅުވި ފުލަމް އޮތީ 38 ޕޮއިންޓާއެކު 12 ވަނައިގަ އެވެ.