އިޒްރޭލުގެ ޝިކާރައަކަށްވި ކުޑަކުޑަ ޖަމީލާގެ ދުލުން، ޔަހޫދީންގެ ރަޙުމުކުޑަ އަނިޔާގެ ވާހަކަ

ނިރުބަވެރި އިޒްރޭލުން ވަރުގަދަ ގަތުލުއާންމެއް ހިންގަމުން ގެންދާ ފަލަސްތީނުގެ ޣައްޒާގައި އެއްވެސް ދިރުމެއް ނެތްފަދައެވެ. މިލައި މޯޅިވެފައިވާ ހިތްތަކެވެވެ. އެ ހިތުގައި އަޅަމުންދާ ވޭނާއި، އެ ސިކުނޑިތަކަށް ދަތިކުރަމުންދާ ފިކުރުތަކަކީ ދުނިޔޭގެ އެހެން ހިސާބެއްގައި ހުރި މީހަކަށް ވަޒަންކޮށް، އިހުސާސްވެސް ކޮށްލެވޭނެ ކަންކަމެއް ނޫނެވެ. އަހަރެމެންނަށް މުޅިންވެސް މި އިވެނީ މީހުން ކިޔައިދޭ ވާހަކަތަކެވެ. މަންޒަރުތައް ފެންނަނީ ސުމޭކު ނުވަތަ ޑިޖިޓަލް ސްކްރީންތަކަކުންނެވެ. އެފަދަ ކިތަންމެ ވާހަކަތަކެއް ރެޔާއި ދުވާލު ފެނެއެވެ. ވަކިން ޚާއްސަކޮށް، ކުޑަކުދިންގެ ވާހަކަތަކުން ހިތަށް ކުރުވާ އަސަރު ބޮޑުވެއެވެ. މިއީވެސް އެފަދަ ވާހަކައެކެވެ.

އިޒްރޭލުގެ އުދުވާންތައް އަމާޒުނުކުރާ ހަމަ އެންމެ ތަންފުކެއްވެސް ޣައްޒާގައި ނެތެވެ. ހަމަލަތައް ދެމުން ދަނީ އެއެއް މިއެއް ބެލުމެއް ނެތިއެވެ. ޣައްޒާގެ ޖަބާލިޔާ ކޭމްޕަކީވެސް ސިލްސިލާ ގޮތެއްގައި ހަމަލަ އަމާޒުކުރާ ތަނެކެވެ. އެއީ ގިނަ އަދަދަކަށް ކުޑަކުދިންނާއި އަންހެނުންވެސް ދިރިއުޅެމުންދާ ކޭމްޕެކެވެ. ނަމަވެސް، އެއީ ނިރުބަވެރި ލޯތަކަށް ނުފެންނަ ކަމަށް ހަދައިގެން އުޅޭ ތަނެކެވެ. ނީވޭ ކަމަށް ހަދައިގެން އުޅޭ އަޑުތަކެކެވެ.

އުމުރުން އެންމެ 11 އަހަރުގެ އަންހެންކުއްޖަކު ވަނީ، ޖަބާލިޔާއަށް އިޒްރޭލުން ދިން ވައިގެ ހަމަލާއަށްފަހު އޭނާ ކުރި ތަޖުރިބާތައް މީޑިއާއާ ހިއްސާކޮށްފައެވެ. ހަމަލާގައި ވައްޓާލި އިމާރާތުގެ ދަށުވެ ޒަޚަމްވެފައި އޮއްވައި، އަވަސް ފަރުވާ ދޭ ޓީމެއްގެ މެންބަރަކު އޭނާ ސަލާމަތްކޮށްދިން ގޮތް އެ ކުޑަކުޑަ ޖަމީލާ ޚައިލާގެ ހަނދާނުގައި ސާފުކޮށް ހަރުލާފައި ވަނީ، އުމުރު ދުވަހަށްވެސް ފިލައިނުދާނެ ހަނދާންތަކެއްގެ ގޮތުގައެވެ.

ފަލަސްތީނުގެ މަދަނީ ދިފާއުން އާންމުކޮށްފައިވާ ވީޑިއޯއިން ފެނިގެންދަނީ ވައްޓާލާފައިވާ ޢިމާރާތެއްގެ ގައުކުނޑިތަކުގެ ދަށުން ކުޑަކުޑަ އަންހެން ކުއްޖަކު ނަގާ މަންޒަރެވެ. އެ ކުއްޖަކީ ޖަމީލާއެވެ.

ޖަމީލާއާއި އޭނާގެ މައިންބަފައިން ކިޔައިދިން ގޮތުގައި އިޒްރޭލުން ދިން ވައިގެ ހަމަލާގައި، ޖަމީލާއާއި އެ އާއިލާގެ އިތުރު މެންބަރުންތަކެއް ޒަޚަމްވިއެވެ. އަދި ޖަމީލާގެ އެއްބަނޑު އެއްބަފާ ތިންބެއިން މި ދުނިޔެއާ ވަކިވިއެވެ. އެއީ ރަމަޟާން، ޔަޒާމް އަދި ފާޠިމާއެވެ.

ޖަމީލާގެ މަންމަ، އަސްމާގެ ވާހަކަތައްވެސް ހުރީ އެފަދަ ގޮތަކަށެވެ.

ޖަމީލާގެ މަންމަ އުފުލަމުންދާ ހިތްދަތިކަމާއި ވޭނަކީވެސް އެހެން މީހަކަށް ބަޔާންކޮށްދެވޭނެ ޖަޒުބާތުތަކެއް ނޫނެވެ.

5 މަހަށްވުރެ ގިނަ ދުވަހަށް ދިގުލައި ގޮސްފައިވާ ގަތުލުއާންމުގައި ޣައްޒާއިން މަރުވި މީހުންގެ އަދަދު މިހާރު 31000އާ ގާތްކުރަނީއެވެ. އެއީ ރަސްމީ އަދަދުތަކެވެ. އިމާރާތްތަކުގެ ދަށުގައި އަދިވެސް ގިނަ އަދަދެއްގެ ގަބުރުތަކެއް ވާނެކަމަށް، ޣައްޒާގެ ކަމާބެހޭ ފަރާތްތަކުން ބުނެއެވެ. އެކިއެކި އުދުވާންތަކުގައި ޒަޚަމްވި މީހުންގެ އަދަދު ވެސް ލައްކައަކާ ގާތްކުރެއެވެ. އެކަމަކު، އެކަށީގެންވާ ގޮތެއްގައި ޞިއްޙީ ފަރުވާ ދެވޭނެ ގޮތެއް ޣައްޒާގައި ނެތެވެ. ޣައްޒާ ކޮންޓްރޯލްކުރާ ޙަމާސް ޖަމާޢަތުގެ ވަސް، މި ބިންމަތިން ފޮހެލަން ވައުދުވެގެން ކަމަށް ބުނެ އިޒްރޭލުން ހިންގަމުން ގެންދާ ނަސްލު ދޮވެލުމުގެ ގަތުލުއާންމުގައި ޣައްޒާއިން މަރުވި މީހުންނާއި ޒަޚަމްވި މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ.