ސިޓީއާ ދެކޮޅަށް ރެއާލް، ބާސެލޯނާ އާއި ޕީއެސްޖީ

ޔޫއޭފާ ޗެމްޕިއަންސް ލީގު ކުއާޓާ ފައިނަލުގައި އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ރެއާލް މެޑްރިޑް ވާދަކުރަން ޖެހިއްޖެ އެވެ.

ރެއާލް އަކީ މުބާރާތް 14 ފަހަރު ކާމިޔާބުކޮށްފައިވާ މުބާރާތުގެ އެންމެ ކާމިޔާބު ޓީމެވެ.

މިއަދު ހަވީރު ބޭއްވި ގުރު ނެގުމުގެ ރަސްމިއްޔާތުގައި އިނގިރޭސިވިލާތުގެ އާސެނަލް އަށް ވާދަކުރަން ޖެހުނީ ޖަރުމަނުގެ ޗެމްޕިއަން ބަޔާން މިއުނިކާ އެވެ. ސްޕޭނުގެ ބާސެލޯނާ އާއި ދެކޮޅަށް ނުކުންނާނީ ފްރާންސްގެ ޕީއެސްޖީ އެވެ. ޕީއެސްޖީގައި މިހާރު ހުރި ކޯޗު ލުއިސް އެންރީކޭ އަކީ އެންމެ ފަހުން ބާސެލޯނާ އަށް ޗެމްޕިއަންސް ލީގު ހޯދައިދިން ކޯޗު އަދި އެޓީމުގެ ކުރީގެ ކެޕްޓަން އެވެ.

ސްޕޭނުގެ އެތްލެޓިކޯ މެޑްރިޑް ވާދަކުރާނީ ޖަރުމަނުގެ ބޮރޫޝިޔާ ޑޯޓްމުންޑާ އެވެ.

މިގޮތަށް ގުރު ނެގުމުން މުބާރާތުގެ ސެމީ ފައިނަލުގައި ވާދަކުރާނީ އެތްލެޓިކޯ އާއި ޑޯޓްމުންޑް މެޗުން މޮޅުވާ ބަޔަކާއި ބާސެލޯނާ އާއ ޕީއެސްޖީ މެޗުން މޮޅުވާ ޓީމެކެވެ. އަދި ސެމީގެ ދެ ވަނަ މެޗުގައި ވާދަކުރާނީ އާސެނަލް އާ ބަޔާން މެޗުން މޮޅުވާ ޓީމަކާއި ސިޓީ އާއި ރެއާލް މެޗުން މޮޅުވާ ޓީމެކެވެ.