ޕްރެމިއާ ލީގު ކާމިޔާބުކުރާނީ މެންޗެސްޓަރ ސިޓީ: ރޮނާލްޑޯ

އިނގިރޭސި ޕްރެމިއާ ލީގު ކާމިޔާބު ކުރާނީ މެންޗެސްޓާ ސިޓީ ކަމަށް ދުނިޔެދުށް އެންމެ މޮޅު އެއް ފޯވަޑް ބްރެޒިލްގެ ރޮނާލްޑޯ ބުނެފި އެވެ.

އޭނާ މިހެން ބުނީ ފުޓްބޯޅައިގެ އެކި ކަންކަމާމެދު މީހުން ކުރި ސުވާލުތަކަށް ޖަވާބުދެމުންނެވެ. ރޮނާލްޑޯ ބުނީ އިނގިރޭސިވިލާތުގައި އޭނާ ނުކުޅުނަސް އެލީގު ގަވާއިދުން ބަލާ ކަމަށެވެ.

އަދި އޭނާއާއެކު ބާސެލޯނާ އަށް ކުޅުނު ސިޓީގެ މިހާރުގެ ކޯޗު ޕެޕް ގާޑިއޯލާ ސިޓީއަށް ކޯޗުކޮށްދޭން ފެށިފަހުން ސިޓީގެ މެޗުތައް ވަރަށް ގިނައިން ބަލާ ކަމަށާއި އެއީ މިހާރު ވަރަށް ވަރުގަދަ ޓީމެއް ކަމަށެވެ.

އޭނާ އަދި ބުނީ ޕްރެމިއާ ލީގަކީ ވަރަށް ވާދަވެރި ލީގެއް ކަމަށާއި މިހެންވެ އެއްވެސް ޓީމަކަށް ތަށީ ޖެހިޖެހިގެން ހަތަރު ފަހަރު ހޯދިފައިނުވާކަން އޭނާ އަށް ވެސް އެނގޭ ކަމަށެވެ. ނަމަވެސް ސިޓީގައި މި ފަހަރު މިކަން ބަދަލުކޮށްލުމަށް ބޭނުންވާ ހުރިހާ ކަމެއް ފުރިހަމަ ކަމަށެވެ.

ބްރެޒިލަށް ދެ ފަހަރު ވޯލްޑްކަޕް ކާމިޔާބުކޮށްދިން ރޮނާލްޑޯ އަކީ ވޯލްޑްކަޕުގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑް ވެސް މުގުރާލި، އަދި މިހާރު އެ ލިސްޓުގެ ދެ ވަނާގައިވާ ކުޅުންތެރިޔާ އެވެ. އޭނާ ވަނީ ސްޕޭނުގެ ބާސެލޯނާ އާއި ރެއާލް މެޑްރިޑް އަދި އިޓަލީގެ އިންޓަމިލާނުގައި މޮޅަށް ކުޅެފަ އެވެ.