މިއީ ބާސެލޯނާ އަށް ބަދަލެއް އަންނަންވީ ވަގުތު: ޒަވީ

މިއީ ސްޕެއިންގެ ބާސެލޯނާ އަށް ބަދަލެއް އަންނަންވީ ވަގުތު ކަމަށް، އެ ޓީމަށް އިރުޝާދު ދެމުން އަންނަ ޒަވީ ހެނާންޑޭޒް ބުނެފި އެވެ.

އޭނާ މިހެން ބުނީ ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ބާސެލޯނާ އިން އިޓަލީގެ ނަޕޯލީ ބަލިކޮށް، ކުއާޓާ ފައިނަލްގެ ޖާގަ ހޯދި މެޗަށްފަހު ނޫސްވެރިންނާ ވާހަކަ ދައްކަމުންނެވެ.

މި ސީޒަނަށްފަހު ބާސެލޯނާ ދޫކޮށްލަން ޒަވީ ވަނީ ނިންމައިފަ އެވެ. މި ސީޒަންގައި ބާސެލޯނާގެ ނަތިޖާތައް ދަށްވެފައިވާއިރު، ޒަވީ ވަނީ ކުލަބުގެ އިސް ފަރާތްތަކާ މަޝްވަރާ ކުރުމަށްފަހު ކުލަބު ދޫކޮށްލަން ނިންމައިފަ އެވެ. ނަމަވެސް ބާސެލޯނާާގެ އިސްވެރިން އަދިވެސް އެދެނީ ޒަވީ އެ ކުލަބުގައި މަޑު ކުރުމަށެވެ.

އެކަމާ ގުޅޭ ގޮތުން ޒަވީ ބުނީ، އޭނާގެ ނިންމުމަށް އެއްވެސް ބަަދަލެއް ނާންނާނެ ކަމަށާއި، އެ ނިންމުމުގެ މަތީގައި އޭނާ ދެމި ހުންނާނެ ކަމަށެވެ. ބާސެލޯނާ އާއެކު ގިނަ މަސައްކަތްތަކެއް ކުރެވިފައިވާކަން ފާހަގަކޮށް ޒަވީ ބުނީ، އޭނާ ޤަބޫލު ކުރާ ގޮތުގައި މިއީ ކުލަބަށް ބަދަލެއް އަންނަން ޖެހޭ ވަގުތު ކަމަށެވެ.

އިތުރަށް އޭނާ ބުނީ ބާސެލޯނާ އަށް ބޮޑެތި ޓީމުތަކާ ވާދަނުކުރެވޭ ކަމަށާއި، ބާސެލޯނާގައި އެ ފެންވަރު ނެތް ކަމަށް ބައެއް މީޑިއާ ތަކުގައި ލިޔެފައިވާ ކަމަށެވެ. ނަމަވެސް ނަޕޯލީ މެޗުން އެކަން އޮތް ގޮތް ސާފުކޮށް ފެންނާނެކަން ފާހަގަކޮށް ޒަވީ ބުނީ، ބާސެލޯނާ އަކީ ކޮންމެ ޓީމަކާ ދެކޮޅަށް ވެސް ކުޅެން ޖެހިލުން ނުވާނެ ޓީމެއް ކަމަށެވެ.

ޒަވީ ބުނީ ބާސެލޯނާ ދޫކޮށް އޭނާ ދިޔަ ނަމަވެސް، އަބަދު ވެސް ބާސެލޯނާ އަށް ކާމިޔާބަށް އެދޭނެ ކަމަށެވެ. އަދި ވީ މިންވަރަކުން ބާސެލޯނާ އިން ސްޕެނިޝް ލީގު އަދި ޚާއްސަކޮށް ޗެމްޕިއަންސް ލީގުގައި ކުޅޭ މެޗުތައް ބަލަން އަންނާނެ ކަމަށް ވެސް ޒަވީ ވަނީ ބުނެފަ އެވެ.