ބަލިވިނަމަ ނޫސްވެރިން އަހަރެން ބަހައްޓާނީ މަގުމަތީގައި: ޒަވީ

އިޓަލީގެ ނަޕޯލީ އަތުން ރޭ ބާސެލޯނާ ބަލިވިނަމަ ނޫސްވެރިން ބުނާނީ އޭނާ ހުންނަންޖެހޭނީ ވަޒީފާ ދޫކޮށް، މަގުމަތީގައި ކަމަށް ކޯޗު ޒަވީ ހަނާންޑޭޒް ބުނެފި އެވެ.

އޭނާ މިހެން ބުނީ ނަޕޯލީ 3-1އިން ބަލިކޮށް ހަތަރު އަހަރުތެރޭގައި ފުރަތަމަ ފަހަރަށް ޗެމްޕިއަންސް ލީގު ފުޓްބޯޅަ މުބާރާތުގެ ކުއާޓާ ފައިނަލަށް ދަތުރުކުރުމަށްފަހު ނޫސްވެރިންގެ ސުވާލުތަކަށް ޖަވާބުދެމުންނެވެ.

އޭނާ މިހެން ބުނީ ބާސެލޯނާގެ ކުޅުމަށް ތައުރީފްކުރާ ގޮތަކަށް ބައެއް ނޫސްވެރިން އޭނާގެ ކުރިމަގާމެދު ސުވާލު ކުރުމުންނެވެ. އެ ސުވާލުތަކަށް ޖަވާބު ދެމުން އޭނާ ބުނީ ޗެމްޕިއަންސް ލީގު ތަށި ލިބުނަސް ނިންމުން ބަދަލެއް ނުވާނެ ކަމަށެވެ.

އޭނާ ބުނީ ހަތަރު އަހަރުތެރޭގައި ފުރަތަމަ ފަހަރަށް ޔޫރަޕުގެ ގަދަ އަށަކުން ޖާގަ ލިބުމަކީ ބޮޑު ކުރިއެރުމެއް ކަމަށާއި ޓީމު އަންނަނީ ދުވަހެއް ދުވަހަކަށް ކުރިއަރަމުން ކަމަށެވެ.

ރޭގެ މެޗުގައި ބާސެލޯނާ ދެއްކި ކުޅުމަށް ސަޕޯޓަރުން ވެސް ވަނީ ތައުރީފްކޮށްފަ އެވެ. އަދި އެއީ މި ފަހަކަށް އައިސް ބާސެލޯނާ ކުޅުނު އެންމެ ރަނގަޅު މެޗުކަމަށް ވެސް ބުނެފައިވެ އެވެ.