އާދީއްތަ 16 އޯގަސްޓު 2020
06 މާ
1441 ޒުލްޙައްޖު 26
ފަތިސް 04:48
އިރުއަރާ 06:01
މެންދުރު 12:14
އަސްރު 15:28
އިރުއޮއްސޭ 18:20
އިޝާ 19:33
ނޭމާ ޕީއެސްޖީއަށް

ވޯލްޑް ޓްރާންސްފާ ރެކޯޑް ފީ މުގުރާލުމަށްފަހު ނޭމާ ޕީއެސްޖީއަށް ސޮއިކޮށްފި

  • ނޭމާ ޕީއެސްޖީއަށް ބަދަލުވީ 222 މިލިއަން ޔޫރޯ އަށް

ކ. މާލެ | 4 އޯގަސްޓް 2017 | ހުކުރު 04:49 | 3,184

ޕީއެސްޖީއަށް ނޭމާ ބަދަލުވުން - ގޯލް.ކޮމް

ވޯލްޑް ޓްރާންސްފާ ރެކޯޑް ފީ މުގުރާލުމަށްފަހު ބާސެލޯނާގެ ނޭމާ ޕެރިސް ސެއިންޓް ޖާމަން (ޕީއެސްޖީ) އަށް ސޮއިކޮށްފި އެވެ.

އުމުރުން 25 އަހަރުގެ ނޭމާ ޕީއެސްޖީ އަށް ސޮއިކޮށްފައިވަނީ 222 ޔޫރޯ އަށެވެ. ފަސް އަހަރު ދުވަހުގެ އެއްބަސްވުމެއްގެ ދަށުން އޭނާ ޕީއެސްޖީއަށް ބަދަލުވެފައިވާއިރު، އަހަރެއްގެ މައްޗަށް 45 މިލިއަން ޔޫރޯ ލިބޭނެ އެވެ. މީގެއިތުރުން ހަފްތާއެއް މައްޗަށް 865،000 ޔޫރޯ ލިބޭނެއެވެ.

އެންމެ އަގުބޮޑުކޮށް ކްލަބް ބަދަލުކުރި ދެވަނަ ކުޅުންތެރިޔަކީ މިދިޔަ އަހަރުގެ އޮގަސްޓްމަހު ޔުވަންޓަސް ދޫކޮށްލުމަށްފަހު އަނބުރާ މެންޗެސްޓާ ޔުނައިޓެޑަށް ބަދަލުވި ޕައުލް ޕޮގްބާގެއެވެ. އޭނާ އެ ކްލަބަށް ބަދަލުވެފައިވަނީ 89 މިލިއަން ޕައުންޑަށެވެ.

ޕީއެސްޖީއަށް ބަދަލުވުމަށްފަހު ނޭމާ ބުނީ ޕީއެސްޖީއަކީ ޔޫރަޕްގައިވެސް އެންމެ އުންމީދީ ކްލަބް ކަމަށާއި، އެ ކްލަބާއެކު ކޮންމެ ޗެލެންޖަކާވެސް ކުރިމަތިލާން އޭނާ ހުރީ ތައްޔާރަށް ކަމަށެވެ. އެގޮތުން އާ ޓީމް މޭޓުންގެ އެއްބާރުލުމާއެކު ޓީމަށް ކާމިޔާބު ހޯދައިދޭން ކެތްމަދުވެފައިހުރި ކަމަށްވެސް ނޭމާ ވަނީ ބުނެފައެވެ.

ނޭމާ ޕީއެސްޖީއަށް ބަދަލުވިކަން އެ ކްލަބުންވެސް ވަނީ ކަށަވަރުކޮށްދީފައެވެ. މީގެއިތުރުން ނޭމާ ވަނީ ބާސާގެ ކުޅުންތެރިން، ސަޕޯޓަރުން އަދި މެނޭޖްމަންޓަށް ޝުކުރު އަދާކޮށް ކުޑަ ބަޔާނެއްވެސް ނެރެފައެވެ. އެ ބަޔާނުގައި ނޭމާ ވަނީ ބާސާ އޮންނާނީ އަބަދުވެސް އޭނާގެ ހިތު ތެރޭގައި ކަމަށް ބުނެފައެވެ.

ނޭމާ ހޯދުމަށް މި ޓްރާންސްފާ ބާޒާރުގައި ގިނަ ކްލަބްތަކަކުން ވަނީ މަސައްކަތްކޮށްފައެވެ. އޭގެ ތެރޭގައި މެންޗެސްޓާ ޔުނައިޓެޑް އަދި ޖަރުމަންގެ ކްލަބްތައްވެސް ހިމެނެއެވެ.

ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާ އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 77 މެޗުގައި 52 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު އަދި ސައުތް އެމެރިކަން ޔޫތް ޗެމްޕިއަންޝިޕް 2011 ވަނަ އަހަރު ބްރެޒިލްއާއެކު ކާމިޔާބުކޮށްފައެވެ.

 

އެންމެ ފަހުން އަޕްޑޭޓް ކުރީ: 5 މަސް ކުރިން | ރިވިއު ކުރީ: ހުސެން ފިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.