ޒައިދު ހަދާފައިވާ 10 ކިލޯ މީޓަރުގެ ގައުމީ ރެކޯޑް ފަޒީލް މުގުރާލައިފި
ކުރިން މި ރެކޯޑް އޮތީ ޒައިދު ޝަރިފް އަތުގައި
ޒުވާން ދުވުންތެރިޔާ ހުސެން ފަޒީލް ހާރޫން
ޒުވާން ދުވުންތެރިޔާ ޒައިދު ޝަރީފް ހަދާފައިވާ 10 ކިލޯމީޓަރު ދުވުމުގެ ގައުމީ ރެކޯޑް ހުސެން ފަޒީލް ހާރޫން މުގުރާލައިފި އެވެ.
ފަޒީލް މި ރެކޯޑް މުގުރާލީ މޮރޮކޯގައި ކުރިއަށްދާ އުޖުދާ އިންޓަނޭޝަނަލް މެރަތަންގެ 10 ކިލޯމީޓަރު ދުވުމުގައި ވާދަކޮށް 33 މިނެޓް 47 ސިކުންތުން ރޭސް ނިންމައިގެންނެވެ.
ޒައިދު ޝަރީފް މި ރެކޯޑް ހަދާފައި ވަނީ މިދިޔަ ޖެނުއަރީ މަހުގެ 20 ވަނަ ދުވަހު ދުބާއީ މެރެތަންގައި ވާދަކޮށް 34:40 ރޭސް ނިންމައިގެންނެވެ. ޝަރީފްގެ ކުރިން މި ރެކޯޑް އޮތީ ރާއްޖޭގެ ކުރީގެ އެއް ވަނަ ދުވުންތެރިޔާ ނަސީރު އިސްމާއިލް އަތުގަ އެވެ.
ނަސީރު އެ ރެކޯޑް ހަދާފައި ވަނީ 1999 ވަނަ އަހަރުގެ މާލޭ މެރެތަންގައި ވާދަކޮށް 35:05 ރޭސް ނިންމައިގެންނެވެ.
10 ކިލޯ މީޓަރުގެ ގައުމީ ރެކޯޑް މުގުރާލި ފަޒީލްގެ ޓާގެޓަކީ ކުރިއަށް އޮތް އިންޑިއަން އޯޝަން އައިލެންޑް ގޭމްސްގައި 5000 މީޓަރާއި 1500 މީޓަރު ދުވުމުން ރާއްޖެއަށް ރަން މެޑަލް ހޯދައި ދިނުމެވެ.
އުމުރުން 27 އަހަރުގެ ފަޒީލް ވަނީ މިދިޔަ އަރު ބޭއްވި ދިރާގު ރޯޑް ރޭހުގެ 5 ކިލޯ މީޓަރު ދުވުމުން ވެސް ގައުމީ ރެކޯޑް ހަދާފަ އެވެ.
