ބަޔާން ދޫކޮށްލުމުގެ ވިސްނުމެއް އުޕަމެކާނޯގެ ނެތް!

ޖަރުމަނުގެ ބަޔާން މިއުނިކް ދޫކޮށްލުމުގެ ވިސްނުމެއް ނުގެން ގުޅޭ ކަމަށް އެ ޓީމަށް ކުޅެމުން އަންނަ ފްރާންސްގެ ޑިފެންޑަރު ޑަޔޫޓް އުޕަމެކާނޯ ބުނެފި އެވެ.

އާރްބީ ލައިޕްޒިގް ދޫކޮށް އުމުރުން 25 އަހަރުގެ ކުޅުންތެރިޔާ ބަޔާނަށް ބަދަލުވީ 2021 ވަނަ އަހަރު އެވެ. އެ ކުލަބާއެކު އޭނާ ސޮއި ކުރީ ފަސް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

އެއްބަސްވުމުގައި ބާކީ ދެ އަހަރު އޮއްވާ، އުޕަމެކާނޯ ބަޔާން ދޫކޮށްލަން އުޅޭ ކަމަށް ބައެއް މީޑިއާ ތަކުގައި ވަނީ ރިޕޯޓުކޮށްފަ އެވެ. އެގޮތުން އިނގިރޭސި ޕްރިމިއާ ލީގުގެ ކުލަބުތަކުގެ އިތުރުން، ސްޕެއިންގެ ބައެއް ކުލަބުތަކުން ވެސް އޭނާ ހޯދުމުގެ ޝައުޤުވެރިކަން ގެން ގުޅޭ ކަމަށް ވަނީ ބުނެފަ އެވެ.

އެކަމާ ގުޅޭ ގޮތުން ވާހަކަ ދައްކަމުން އުޕަމެކާނޯ ބުނީ، ސީޒަން ނިމުމުން ބަޔާން ދޫކޮށްލުމުގެ ވާހަކަތަކެއް އޭނާ ނުދައްކާ ކަމަށާއި، އެ ކަހަލަ ވިސްނުމެއް ވެސް ނުގެން ގުޅޭ ކަމަށެވެ. އޭނާ ބުނީ ބަޔާނާއެކު، 2026 ވަނަ އަހަރާ ހަމައަށް ހަދާފައިވާ އެއްބަސްވުމެއް އޮތް ކަމަށާއި، އެ ކުލަބުގައި އޭނާ ހުރީ ހިތްހަމަ ޖެހިގެން ކަމަށެވެ. އަދި ބަޔާންގެ އެހެން ކުޅުންތެރިން، އޭނާއާ މެދު ބާއްވާ ގާތް ގުޅުން ވެސް އުޕަމެކާނޯ ވަނީ ފާހަގަކޮށްފަ އެވެ. އެކަން ފާހަގަކޮށް އޭނާ ބުނީ ބަޔާންގައި ހުންނާނެ ކަމަށާއި، އަދި އެ ކުލަބުގައި ހުންނަން ބާރު ވެސް އަޅާނެ ކަމަށެވެ.

އުޕަމެކާނޯ ވަނީ މިހާތަނަށް ބަޔާނަށް ކުޅެދިން 107 މެޗުގައި ތިން ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ޖަރުމަނު ލީގު އަދި ޖަރުމަނު ސުޕަ ކަޕް ކާމިޔާބު ކޮށްފަ އެވެ.