‎‏ރަމަޟާން މަހާއެކުވެސް ޣައްޒާގައި މީހުން މެރުމާއި ބޮން ގޮއްވުމާއި ލޭއޮހޮރުވުން ކުރިއަށް އެބަދޭ: އދ‏

މުސްލިމުންގެ އެންމެ ޚާއްސަ މައްސަރު ކަނަށްވާ ރަމަޟާން މަސް ފެށުނުނަމަވެސް، ޣައްޒާގައި މީހުން މެރުމާއި ބޮން ގޮއްވުމާއި ލޭއޮހޮރުވުން ކުރިއަށްދާކަމަށް އދ.ގެ ވެރިޔާ ވިދާޅުވެއްޖެއެވެ.

ޣައްޒާގައި ހިނގަމުންދާ ހަމަނުޖެހުންތަކާ ބެހޭގޮތުން ނޫސްވެރިންނަށް މައުލޫމާތު ދެއްވަމުން އދ.ގެ ސެކްރެޓަރީ ޖެނެލް އެންޓޯނިއޯ ގުޓަރޭޒް ވިދާޅުވީ، ރަމަޟާން ފެށުމުގެ ކުރިން ހަނގުރާމަ ހުއްޓައިލުމަށް ތަކުރާރުކޮށް ދެފަރާތަށްވެސް ގޮވައިލައްވައިފައި ވާނެކަމަށާއި، އެހެންނަމަވެސް ހަމަލާ ބަދަލުކުރުމަށް އެއްވެސް މަޑުޖެހުމެއް އައިސްފައި ނުވާކަމަށެވެ.

ފަލަސްތީނަށާއި ހަމާސްއަށްވެސް ރައްކާތެރިކަމާއި އަމާންކަން އޮތީ ސުލްހަވެރިކަން އިސްކޮށްގެން ކަމަށާއި، އެހެންކަމުން ހަމާސް ޖަމާއަތުން ރަހީނުކޮށްފައިވާ ހުރިހާ އެންމެން ވަގުތުން ދޫކޮށްލުމަށް ވެސް އޭނާ ގޮވައިލެއްވިއެވެ. ‎

ގުޓަރޭޒް ވިދާޅުވީ އޭނާ އދ. މަޖިލީހުގައި ހޭދަކުރެއްވި ދިގު މުއްދަތުގައި ދުވަހަކުވެސް އެއްވެސް ތަނަކުން ނުފެންނަ ވަރަށް މަރުތަކާއި، ގެދޮރު ގެއްލުމާއި، ދަތިކުރުމުގެ ފިޔަވަޅުތައް ޣައްޒާއިން މިއަދު ފެންނަމުން ދާކަމަށެވެ.

‎އާންމު ރައްޔިތުންގެ ފުރާނަ ސަލާމަތްކުރުމާ ބެހޭގޮތުން ގުޓެރޭޒް ވިދާޅުވީ، ބައިނަލްއަގުވާމީ އިންސާނީ ހައްގުތަކާބެހޭ ގާނޫނުތައް އޮތީ ފުނޑުފުނޑުވެފައި ‎‎ކަމަށެވެ.‎

‎އަދި ރަފަހަށް އިސްރާއީލުން ހަމަލާއެއް ދީފާނެކަމުގެ އިންޒާރު ދެއްވަމުން އޭނާ ވިދާޅުވީ އެފަދަ ފިޔަވަޅެއްގެ ސަބަބުން ޣައްޒާގެ ‎‎ރައްޔިތުންގެ ހިތްދަތިކަން އިތުރަށް ބޮޑުވެގެންދާނެ ކަމަށެވެ.‎

‎އެތައް މަހެއް ވަންދެން ދުނިޔޭގެ ލީޑަރުން އިލްތިމާސް ކުރައްވަމުން ގެންދަވަނީ ވަގުތުން މި ހަނގުރާމަ ހުއްޓާލުމަށާއި ރަހީނުކުރި ‎‎އެންމެން ވަގުތުން މިނިވަން ކުރުމަށެވެ. އެކަމަކު އެންމެ ހިތްދަތި ވޭންދެނިވި މަޖުބޫރު ގޮވުންތައް އިވެމުން އައީ މި ހަނގުރާމައިގެ ޝިކާރައަކަށްވި މީހުންގެ ‎‎އާއިލާތަކުން ކަމަށް އޭނާ ވިދާޅުވިއެވެ.‎

‎ގުޓަރޭޒް ވަނީ މަރުވި މީހުންގެ އާއިލާތަކުގެ އަޑުއަހައި، އެކަމަށް ސަމާލުކަން ދިނުމަށް ހުރިހާ ފަރާތްތަކަކަށް ގޮވައިލައްވައިފައެވެ.  ‎