ރޭޕްގެ ތުހުމަތުގައި ދީނީ ޢިލްމުވެރިޔާ ތާރިޤް ރަމަޟާންއާ ސުވާލުކޮށްފި
31 ޖެނުއަރީ 2018 | ބުދަ 19:17ދެ އަންހެނަކު ވަނީ އެމީހުން ރޭޕްކުރި ކަމަށް ތުހުމަތުކޮށްފައި
ތާރިޤް ރަމަޟާން: އޭނާއާ ދެކޮޅަށް ކުރެވޭ ތުހުމަތުތަކަށް އިންކާރުކުރޭ
ރޭޕްގެ ތުހުމަތުގައި މަޝްހޫރު ދީނީ ޢިލްމުވެރިޔާ ޠާރިޤް ރަމަޟާންއާ ފަރަންސޭސީ ފުލުހުން ސުވާލުކޮށްފިއެވެ.
ފަރަންސޭސީ ވެރިރަށް ޕެރިހުން ޠާރިޤް ރަމަޟާން ހައްޔަރުކުރީ ދެ އަންހެނަކު އޭނާގެ މައްޗަށް ކުރި ރޭޕްކުރުމާއި ޖިންސީ އަނިޔާގެ ތުހުމަތުތަކެއްގައި ސުވާލުކުރުމަށެވެ.
އިނގިރޭސިވިލާތުގެ އޮކްސްފަރޑް ޔުނިވަރސިޓީގައި އިސްލާމް ކިޔަވައިދޭ ރަމަޟާން ވަނީ މިތުހުމަތުތަކާ ގުޅިގެން މިދިޔަ އަހަރުގެ ނޮވެމްބަރު މަހުން ފެށިގެން ޗުއްޓީ ނަގާފައެވެ. އޭނާ ބުނާ ގޮތުން މިތުހުމަތުތަކަކީ އެއްވެސް އަސްލެއް ނެތް، އޭނާގެ އަބުރު ކަތިލުމަށް އުފުލާފައިވާ ދައުވާތަކެކެވެ. އުމުރުން 55 އަހަރުގެ ރަމަޟާންއަކީ ސްވިޓްޒަލޭޑްގެ ރައްޔިތެކެވެ.
ރަމަޟާންގެ މައްޗަށް ދައުވާކުރާ ދެ އަންހެނުންގެ ތެރެއިން އެކަކީ ކުރިން ހައްދުފަހަނައަޅާފައިވާ ފިކުރުތަކެއް ގެންގުޅެ، މިހާރު ސެކިއުލަރ ގްރޫޕެއް ހިންގަމުންދާ އަންހެނެއް ކަމަށްވާ ހިންދާ އަޔާރީއެވެ. އަޔާރީ ބުނީ ރަމަޟާން އޭނާ ރޭޕްކުރީ 2012 ވަނަ އަހަރު ޕެރިހުގެ ހޮޓަލެއްގައި ކަމަށެވެ.
އެ އަށް ފަހު ނަން ހާމަކޮށްފައިވާ ނުވާ އަންހެނަކު ވަނީ 2009 ވަނަ އަހަރު ރަމަޟާން އޭނާ ރޭޕްކުރި ކަމަށް ތުހުމަތުކޮށްފައެވެ. މިއަންހެން މީހާއަކީ އެހެން ދީނަކަށް އުޅެ، ފަހުން އިސްލާމްވި އަންހެނެކެވެ.
