އާނޮލްޑް ދައްކާ ވާހަކައަކީ ނޫހުގައި ޖަހަންޖެހޭ ވަރުގެ ޚަބަރެއްނޫން: ގާޑިއޯލާ

މެންޗެސްޓަރ ސިޓީ އާއި ލިވަޕޫލްގެ މިރޭ ކުޅޭ މުހިންމު މެޗާ ގުޅުވައިގެން ލިވަޕޫލްގެ ވައިސް ކެޕްޓަން ޓްރެންޓް އެލެގްޒެންޑާ އާނޮލްޑް ދައްކާ ވާހަކަތަކަކީ ޚަބަރެއްނޫން ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.

މެޗުގެ ކުރިން އާނޮލްޑް ބުނީ ގާޑިއޯލާ 2015 ވަނަ އަހަރު ސިޓީއާ ހަވާލުވި ފަހުން އެ ޓީމުން ކިތަންމެ ގިނަ ތައްޓެއް ހޯދި ނަމަވެސް ލިވަޕޫލް ހޯދި ތަށިތަކުގެ ބުރަދަން މާބޮޑު ކަމަށެވެ.

އާނޮލްޑް އިތުރަށް ބުނީ ސިޓީން އެއް ސީޒަނެއްގައި ތިން ތަށި ހޯދައި، ލިވަޕޫލަށްވުރެ މިދިޔަ އަށެއްކަ އަހަރު ކާމިޔާބީތައް އިތުރު ނަމަވެސް ދެ ޓީމުހެ ކާމިޔާބީތަކަށް ބަލާއިރު ބުރަދަން ބޮޑީ ލިވަޕޫލްގެ ކާމިޔާބީތަކުގައި ކަމަށެވެ. ސަބަބެއް ކަމަށް އޭނާ ދެއްކި ލިވަޕޫލަށްވުރެ އެތައް ގުނައެއް އިތުރަށް ސިޓީން ހޭދަކުރުން ކަމަށެވެ.

މިކަމާ ބެހޭ ގޮތުން ނޫސްވެރިން ގާޑިއޯލާއާ ސުވާލުކުރުމުން އޭނާ ބުނީ އާނޮލްޑް ދައްކާ ވާހަކަތަކީ ނޫހުގައި ޖަހަންޖެހޭވަރުގެ ޚަބަރެއްނޫން ކަމަށެވެ.

ނަމަވެސް އާނޮލްޑްގެ މިވާހަކައަށް ލިވަޕޫލްގެ ކޯޗު ޔާގެން ކްލޮޕް ތާއީދު ކުރި އެވެ. އެކަމަކު މި ވާހަކައާ ހެދި ސިޓީގެ ފޯވަޑް އާލިން ހާލަންޑް ވަނީ އާނޮލްޑަށް ރައްދުދީފަ އެވެ.