ނަޕޯލީގެ ސަޕޯޓަރުން ނަފްރަތު ކުރަން އިތުރު ސަބަބެއް ހިގައިން ދައްކާލަދީފި

މިދިޔަ ހޫނު މޫސުމުގައި އިޓަލީގެ ނަޕޯލީ ދޫކޮށް ޔޫވެންޓަސްއަށް ބަދަލުވި އާޖެންޓީނާގެ ތަރި ގޮންޒާލޯ ހިގައިންދިޔަ ނަޕޯލީގެ ސަޕޯޓަރުން ނަފްރަތު ކުރާނެ އިތުރު ސަބަބެއް އޭނާ ދައްކާލައިފިއެވެ.

ހިގައިން ދެކެ ނަޕޯލީގެ ސަޕޯޓަރުން އިތުރަށް ހިތްހަމަ ނުޖެހޭވަރު އޭނާކޮށްލީ ބުދަ ދުވަހުގެ ރޭ އިޓާލިއަން ކަޕުގެ ސެމީ ފައިނަލުގެ ދެ ވަނަ ލެގުގައި ނަޕޯލީ ކޮޅަށް ދެ ލަނޑު ޖަހައިގެންނެވެ.

މި މެޗުގައި ނަޕޯލީ އަތުން 3-2 އިން ޔޫވެންޓަސް ބަލިވި ނަމަވެސް ދެ ލެގުގެ އެގްރިގޭޓުން 4-5 އިން ކުރި ހޯދައިގެން ޔުވެންޓަސް ވަނީ މުބާރާތުގެ ފައިނަލުން ޖާގަ ހޯދައިފިއެވެ.

މިދިޔަ އަހަރުގެ ޖުލައި މަހުގެ ތެރޭގައި 75.3 މިލިއަން ޕައުންޑަށް ނަޕޯލީ ދޫކޮށް ހިގައިން ޔޫވެންޓަސްއަށް ބަދަލުވުމުގެ އެކުލަބުގެ ސަޕޯޓަރުން އޭނާއަށް ފާޑު ކިޔުމުގެ އިތުރުން ނަޕޯލީގެ އޯނަރު ހިގައިން ސިފަކޮށްފައިވަނީ ގައްދާރެއްގެ ގޮތުގައެވެ.

މެޗު ކުރިއަށްދިޔައިރުވެސް ނަޕޯލީގެ ސަޕޯޓަރުންގެ ފަރާތުން ހިގައިންއާ ވަރަށް ބޮޑަށް ދިމާކުރަމުން ދަނިކޮށް މެޗުގެ 32 ވަނަ މިނެޓުގައި ލަނޑެއްޖަހާ ހިގައިންވަނީ ޔުވެންޓަސްއަށް ލީޑު ނަގައިދީފައެވެ. ނަމަވެސް މިލަނޑު ޖެހުމަށްފަހު އެކަމުގެ އުފާ ހިގައިން ފާހަގަކޮށްފައެއް ނުވެއެވެ.

މަރެކް ހަމްސިކް 53 ވަނަ މިނެޓުގައި ނަޕޯލީ އަށް އެއްވަރުކޮށްދީފައި ވަނިކޮށް 59 ވަނަ މިނެޓުގައި ހިގައިން ވަނީ ޔުވެންޓަސް އަށް އަލުން ލީޑު ނަގައިދީފަ އެވެ.

ނަޕޯލީ މޮޅުވީ ޑްރިއެސް މާޓިންސް އާއި ލޮރެންޒޯ އިންސީނޭގެ ލަޑުތަކުންނެވެ. އެހެން ނަމަވެސް އެކުޅުންތެރިންގެ ލަނޑުތަކުންވެސް އިޓާލިއަން ކަޕުގެ ފައިނަލް ނަޕޯލީއަށް ދެވޭ ގޮތެއް ނުވިއެވެ.

މި ދެޓީމުގެ ފުރަތަމަ ކުރިމަތިލުމުގައި ވެސް ހިގައިން ވަނީ ލަނޑެއް ޖަހާފައެވެ. އަދި އެމެޗަށްފަހު ނަޕޯލީގެ ސަޕޯޓަރުންވަނީ ހިގައިންއަށް ފާޑުކިޔުމުގެ ގޮތުން ބެނާތަކާއި އެނޫންވެސް އެއްޗެހި ބޭނުންކޮށްފައެވެ.

އިޓާލިއަން ސީރިއާގެ ސީޒަނެއްގައި އެންމެ ގިނަ ގޯލްޖެހުމުގެ ރެކޯޑާއިއެކު ހިގައިންވަނީ މިދިޔައީ ސީޒަނުގެ ޓޮޕް ސްކޯރާގެ ބޯޓު ހޯދަފައެވެ.

ގަނަރ ނޮދާލް 1949-1950 ހަދާފައިވާ ރެކޯޑް އޭގެ 66 އަހަރު ފަހުން ހިގައިން މުގުރާލީ 36 ލަނޑު ހަމަކޮށްގެންނެވެ. ނޮދާލްގެ ރެކޯޑަކީ 35 އެވެ.

ޖޫން 2 ވަނަ ދުވަހު ކުޅޭ އިޓާލިއަން ކަޕުގެ ފައިނަލް މެޗުގައި ޔުވެންޓަސް ބައްދަލުކުރާނީ ލާޒިއޯއާ އެވެ.