ރައީސްގެ ނަސޭހަތްޕުޅަކީ އެންމެންގެ އުޅުމާއި ބަސްމަގު ރީތިކުރުން - އެންމެ އަރިހުގައި މަސައްކަތްކުރައްވާ ދައުލަތުގެ ވަޒީރުންނާއި ނައިބުންގެ އުޅުމާއި ބަސްމަގު ހުރި ގޮތް އެނގިވަޑައިގަންނަވާތޯ؟

އަހަރެމެން ދުނިޔެއަށް ފޮނުއްވާފައިވަނީ ރިވެތި އަޚްލާގެއްގައި އުޅުމަށެވެ. ތެދުވެރިކަމާއި އަމާނާތްތެރިކަން އިސްކުރުމަށެވެ. އެހެން މީހުންނާ މުޢާމަލާތް ކުރާއިރު ރީތި ބަހުން މުޢާމަލާތް ކުރުމަށެވެ. މިއީ ވަކި ފަންތިއެއްގެ ވަކި މީހަކަށްވީތީ ކުރަންޖެހޭ ކަމެއް ނޫނެވެ. ތިމާއަށް މަތީ މަޤާމެއް ލިބުނޭ ކިޔާފައި ބަސްމަގު ހަޑިކުރުމާއި ބޮޑާވާކަށް ނުޖެހޭނެއެވެ. އެންމެ އާދައިގެ ނިކަމެތި މީހާ އިސްކުރާ ރިވެތި އަޚުލާގައި ނަމޫނާ ގައުމުގެ އެންމެ މަތީ މަގާމުގައި ހުންނަ މީހާވެސް އަދާކުރަންޖެހޭނެއެވެ.

ދައްކަން މިއުޅެނީ ރައީސް ޑރ. މުޙައްމަދު މުއިއްޒު ރަސްމީ ދަތުރުފުޅެއްގެ ނަމުގައި ކުރައްވަމުން ގެންދަވާ ކެމްޕެއިން ދަތުރުފުޅުތަކުގެ ތެރެއިން ހޮނިހިރު ދުވަހު ޅ. ނައިފަރަށް ވަޑައިގެން ދެއްކެވި ވާހަކަފުޅަކަށެވެ. އެމަނިކުފާނު ދެއްކެވި ވާހަކަފުޅުގައި ވަނީ ރިވެތި ސިފަތައް އަށަގެންނެވުމަށް އަހަރެމެން އެންމެންނަށް ނަސޭހަތްތެރިވެވަޑައިގަންނަވާފައެވެ. ރައީސް މުއިއްޒު ވިދާޅުވިޔަސް ހެޔޮ ވާހަކައެއް ވާނީ ހެޔޮ ވާހަކައަކަށެވެ. ނަމަވެސް ސުވާލަކީ، ރައީސް މުއިއްޒު މިގޮތަށް ވިދާޅުވެފައިވާއިރު، އެމަނިކުފާނުގެ އަރިހުގައި މަސައްކަތްކުރައްވާ ދައުލަތުގެ ވަޒީރުންނާއި ވަޒީރުންގެ ނައިބުންގެ ކިބައިގައި މި ސިފަތައް އެބަހުރިތޯއެވެ؟

ސަބަބެއް ނެތިއެއްވެސް ނޫނެވެ. ސަބަބުތައް ގިނަކަމުންނެވެ. އެންމެ ފުރަތަމަ މި ބަލާލަނީ ގައުމެއްގެ ވެރިއަކަށް ފުރައްސާރަކުރުމުގެ ސަބަބުން ސަސްޕެންޑުކުރި ތިން ނައިބު ވަޒީރުންގެ ވާހަކައަށެވެ. މި ތިން ނައިބު ވަޒީރުންވެސް މުސާރަ ލިބޭ ގޮތައް ވަނީ ސަސްޕެންޑުކޮށްފައެވެ. ނަމަވެސް، އެހިސާބުން ފުރައްސާރަކުރުން ހުއްޓުނީއެއް ނޫނެވެ. ސަސްޕެންޝަނުގައި ހުރެ، ނައިބު ވަޒީރަކު ވަނީ ނުކުޅެދުންތެރިކަން ހުރި ދިވެހި ދަރިއަކަށް ފުރައްސާރަކޮށް ގަނާކޮށްފައެވެ. އެހެންވެ މިދަންނަވަނީ، ރައީސް އެވެ. ތިމަން މަނިކުފާނު ނަސޭހަތްތެރިވެވެވަޑައިގަންނަވަނީ އެންމެންގެ އުޅުމާއި ބަސްމަގު ރީތިކުރަން ކަމަށް ވާއިރު، އެންމެ އަރިހުގައި މަސައްކަތްކުރައްވާ ދައުލަތުގެ ވަޒީރުންނާއި ނައިބުންގެ އުޅުމާއި ބަސްމަގު ހުންނަ ގޮތް އެެނގިވަޑައިގަންނަވާތޯއެވެ؟

ދެން އޮތީ ދައުލަތުގެ ވަޒީރެއްގެ މަޤާމުގައި ހުންނެވި އާދަމް ޝަރީފް ދެއްކެވި ވާހަކައެވެ. ރައީސް މުއިއްޒު ރަސްމީ ދަތުރުފުޅުގެ ނަމުގައި ކުރައްވާ ކެމްޕެއިން ދަތުރުފުޅުގެ ތެރެއިން މ. ދިއްގަރަށް ވަޑައިގެން، އެރަށު ރައްޔިތުންނާ ބައްދަލު ކުރެއްވުމަށް ބޭއްވެވި ޖަލްސާގައި އާދަމް ޝަރީފް ވަނީ މަޖިލިސް މެންބަރެއްގެ ގޮތުގައި މިއަދުވެސް ހުންނެވިނަމަ މެންބަރެއްގެ "ދަތްދޮޅި ދުއްވާނުލާ" ހުރެވިދާނެތޯ ސުވާލު އުފައްދަވާފައެވެ. މިއީ ދައުލަތުގެ ވަޒީރުންގެ ކިބައިން މިއަދު ފެންނަންޖެހޭ ބަސްމަގާއި އަޚުލާގުތޯއެވެ؟ އެހެންވެ މިދަންނަވަނީ، ރައީސް އެވެ. ތިމަން މަނިކުފާނު ނަސޭހަތްތެރިވެވަޑައިގަންނަވަނީ އެންމެންގެ އުޅުމާއި ބަސްމަގު ރީތިކުރަން ކަމަށް ވާއިރު، އެންމެ އަރިހުގައި މަސައްކަތްކުރައްވާ ދައުލަތުގެ ވަޒީރުންނާއި ނައިބުންގެ އުޅުމާއި ބަސްމަގު ހުންނަ ގޮތް އެނގިވަޑައިގަންނަވާތޯއެވެ؟

އަހަރެމެން ބަސްމަގު ރީތިކޮށް ބައްޓަންކުރަންޖެހޭނީ ނިކަމެތި މީހާ މަތީ ފެންވަރުގެ މީހާއަށް އެކަންނެއް ނޫނެވެ. މަތީ ފެންވަރުގައި ހުންނަ މީހާވެސް ހަމަ އެ ނިކަމެތި މީހާއަށް މުޢާމަލާތް ކުރުމުގައި އަޚުލާގު ބެހެއްޓުމުގައި ރިވެތި ގޮތްތަކެއް ގެންގުޅެން ޖެހޭނެއެވެ. ސަރުކާރުގެ އިސް ވަޒީރުންނާއި ނާއިބުންގެ އަޚުލާގު މިދަރަޖައަށް ދާނަމަ ގައުމު ވެއްޓިގެންދާނީ ބޮޑު އަނދަވަޅަކަށެވެ. ދޮށީ މީހާގެ ޢަމަލުތައް ބަލާ ކުޑަކުދިން ދަސްކުރަމުންދާހެން ގައުމުގެ މަތީ ވެރިންގެ މި ޢަމަލުތަކުން އެންމެ ދަށު އާއްމު ރައްޔިތުމީހާއަށް ވެސް އޭގެ ނޭދެވޭ އަސަރުކުރުމަކީ ދުރުގައި އޮތްކަމެއް ނޫނެވެ. އެހެންކަމުން، ކުރިއަށް މި އޮތް ރަމަޟާން މަސް އަޅުގަނޑުމެން އެންމެންނާ ބައްދަލުކުރާހިނދު މި ނޭދެވޭ އެންމެހާ ކަންކަމުން ދުރުވަމާތޯއެވެ!