ގާޑިއޯލާ މާމޮޅު، އަހަރެން ފަދަ ކޯޗަކު ހޯދަން ފަސޭހަވާނެ: ކްލޮޕް

މެންޗެސްޓަރ ސިޓީގެ ކޯޗު ޕެޕް ގާޑިއޯލާ އަކީ އެންމެ މޮޅު ކޯޗުކަމަށާއި އެކަމަކު ތިމަންނާ ފަދަ ކޯޗަކު ހޯދަން ފަސޭހަވާނެ ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.

އޭނާ މިހެން ބުނީ އިނގިރޭސި ޕްރެމިއާ ލީގުގައި ލިވަޕޫލާއި ސިޓީ މިރޭ ވާދަކުރާ މެޗުގެ ކުރިން ވާހަކަ ދައްކަމުންނެވެ. މި ދެ ޓީމަކީ މި ސީޒަނުގެ ތައްޓަށް ވާދަކުރާ ދެ ޓީމެވެ. ޓޭބަލުގެ ކުރީގައި ލިވަޕޫލް އޮތްއިރު އެންމެ ފަހުގެ ތިން އަހަރުގެ ޗެމްޕިއަން ސިޓީ އޮތީ އެއް ޕޮއިންޓް މަދުން ދެވަނައިގަ އެވެ. މިހެންވެ މެޗު ކާމިޔާބުކޮށްގެން ސިޓީ އަށް ޓޭބަލުގައި ދެ ޕޮއިންޓްގެ ލީޑެއް ހޯދޭނެ އެވެ.

މެޗުގެ ކުރިން ވާހަކަ ދައްކަމުން ކްލޮޕް ބުނީ މި ސީޒަނަށް ފަހު ލިވަޕޫލްގެ ކޯޗުކަމުން އޭނާ ވަކިވި ނަމަވެސް އޭނާ ފަދަ ކޯޗަކު ހޯދަން އެ ޓީމަށް ދަތިވެގެން ނުވާނެ ކަމަށެވެ.

2015 ވަނަ އަހަރު ލިވަޕޫލާ ހަވާލުވެ މިހާތަނަށް 9 ތަށި ހޯދާފައިވާ ކޯޗު ބުނީ ސިޓީ އަތުން ބަލިވެގެން ޕްރެމިއާ ލީގު ގެއްލިއްޖެނަމަ އެކަމާ ހިތާމަ ނުކުރާނެ ކަމަށެވެ. ސަބަބަކީ ދެ ޓީމުގެ ތަފާތު އެންމެނަށް ވެސް އެނގޭތީ ކަމަށް ކްލޮޕް ބުންޏެވެ. އޭނާ އިޝާރާތް އެކުރަނީ ލިވަޕޫލަށްވުރެ ސިޓީގެ މުއްސަނދިކަން ބޮޑުވެފައި، ކުރާ ހަރަދު އެތައް ގުނައެއް އިތުރުވުމުގެ ސަބަބުންނެވެ.

މި ސީޒަނަށްފަހު ކޯޗުކަމާ ދުރަށްދާއިރު އަލުން އެނބުރި ކޯޗުކަންކޮށްދޭނެ ޓީމަކާ ހަވާލުވާނީ އެއް އަހަރުގެ ބްރޭކަކަށް ފަހު ކަމަށް ކްލޮޕް ބުންޏެވެ.