ބާސެލޯނާ މޮޅުކޮށްދިނީ ޔަމާލް!

ސްޕެނިޝް ލީގުގައި މަޔޯކާއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބާސެލޯނާ އިން މުހިންމު މޮޅެއް ހޯދައިފި އެވެ.

ހުކުރު ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 1-0 އިންނެވެ. އަނިޔާގެ ސަބަބުން މި މެޗުގައި ބާސެލޯނާގެ މުހިންމު ބައެއް ކުޅުންތެރިން ނުކުޅެ އެވެ. އެގޮތުން ފްރެންކީ ޑި ޔޯން، ޕެޑްރީ އަދި ގަވީ ފަދަ ކުޅުންތެރިން ހިމެނެ އެވެ. މި ވަގުތު އަނިޔާގެ މައްސަލަ ބޮޑުވެފައިވާ ބާސެލޯނާގެ ރަފީނިއާ އަށް ވެސް ވަނީ އެ މެޗުގައި އަނިޔާވެފަ އެވެ.

މެޗުގެ 24 ވަނަ މިނެޓުގައި ބާސެލޯނާ އަށް ވަނީ ޕެނަލްޓީއެއް ލިބިފަ އެވެ. އިލްކާއީ ގުންޑޮގާން ފޮނުވާލި ޕެނަލްޓީ މަޔޯކާގެ ގޯލު ކީޕަރު ވަނީ މަތަކޮށްފަ އެވެ. މެޗުން ބާސެލޯނާ މޮޅުވީ 73 ވަނަ މިނެޓުގައި ސްޕެއިންގެ ޒުވާން ކުޅުންތެރިޔާ ޔަމީން ޔަމާލް ޖެހި ލަނޑުންނެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޕޮލެންޑުގެ ކެޕްޓަން ރޮބާޓް ލެވަންޑޯސްކީ އެވެ.

މޮޅާއެކު ބާސެލޯނާ އިން ދެ ވަނައިގައި އޮތީ މިހާތަނަށް ކުޅުނު 28 މެޗުން 61 ޕޮއިންޓު ހޯދައިގެންނެވެ. ބާސެލޯނާ އަށް ވުރެ އެއް މެޗު މަދުން ކުޅެގެން އެއް ވަނައިގައި ރެއާލް މެޑްރިޑަށް ލިބެނީ 66 ޕޮއިންޓެވެ.