މޮޅުވާން ޖެހެނީ ހަމައެކަނި ކޯޗަށްޓަކައެއް ނޫން: ކޭން

މެޗުތަކުން ޓީމުތައް މޮޅުވާން ޖެހެނީ ހަމައެކަނި ކޯޗަށްޓަކައި ނޫން ކަމަށާއި، އެއީ ކުލަބަށްޓަކައި ވެސް ކުރަން ޖެހޭ ކަމެއް ކަމަށް، ބަޔާން މިއުނިކަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ބުނެފި އެވެ.

އޭނާ މިހެން ބުނީ، ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ލާޒިއޯ ބަލިކޮށް، މުބާރާތުގެ ކުއާޓާ ފައިނަލުން ބަޔާން ޖާގަ ހޯދި މެޗަށްފަހު އެވެ. އެ މެޗުގައި ކޭން ވަނީ ދެ ލަނޑު ވެސް ޖަހައިފަ އެވެ. ޓޮޓެންހަމް ދޫކޮށްލުމަށްފަހު، ބަޔާނަށް ބަދަލުވެ އޭނާަ އަންނަނީ މޮޅު ކުޅުމެއް ދައްކަމުންނެވެ.

ކޭން ބުނީ ބަޔާނަށް ލިބުނޫ ވަރަށް މުހިންމު މޮޅެއް ކަމަށާއި، މުބާރާތުގެ ކުއާޓާ ފައިނަލުން ޖާގަ ލިބުމުން ހިތްހަމަ ޖެހޭ ކަމަށެވެ. އަދި ޚާއްސަކޮށް، އެ މޮޅަކީ އަހަރުގެ ބާކީ އޮތް ތަނަށް ލިބުނު ހިތްވަރެއްގެ ގޮތުގައި ދެކެން ޖެހޭ ކަމަށް ވެސް ކޭން ބުންޏެވެ. އެ ޢަޒުމުގައި ތިބެ، ޗެމްޕިއަންސް ލީގު އަދި ޖަރުމަނު ލީގުގައި ވެސް ކުރިއަށް ދާން ޖެހޭނެކަން އޭނާ ފާހަގަ ކުރި އެވެ.

މި ސީޒަނަށްފަހު ބަޔާންގެ ކޯޗުކަމުން ތޯމަސް ޓުޗެލް ވަކިވާއިރު، އެކަމާ ގުޅޭ ގޮތުން ސުވާލު ކުރުމުން ކޭން ބުނީ، އެއީ ވަރަށް އެހެން ކަހަލަ ޙާލަތެއް ކަމަށެވެ. އޭނާ ބުނީ ކުޅުންތެރިޔެއްގެ ޙައިޞިއްޔަތުން އެމީހުންނަަށް އޮންނާނީ ކޮންމެ މުބާރާތެއްގެ، ކޮންމެ މެޗަކުން ވެސް މޮޅުވުން ކަމަށެވެ. އަދި އެއީ ހަމައެކަނި ޓީމުގެ ކޯޗަކަށް ހުންނަ މީހާ އަށް ކޮށްދޭން ޖެހޭ ކަމެއް ނޫން ކަމަށާއި، އެއީ މުޅި ކުލަބަށް ކޮށްދޭން ޖެހޭ ކަމެއް ކަމަށް ވެސް އޭނާ ބުންޏެވެ.

ޓޮޓެންހަމް ދޫކޮށް ބަޔާނަށް ބަދަލުވެ، ކޭން ވަނީ މިހާތަނަށް އެ ކުލަބަށް 33 މެޗު ކުޅެދީ، 33 ލަނޑު ޖަހައިފަ އެވެ. އޭގެ ތެރެއިން 27 ލަނޑަކީ ޖަރުމަނު ލީގުގަައި އޭނާ ޖަހާފައިވާ ލަނޑުތަކެވެ. މި ސީޒަންގެ ޖަރުމަނު ލީގުގައި ބަޔާންގެ ނަތީޖާތައް ދަށްވެފައިވާއިރު، އެ ޓީމަށް މި ސީޒަންގެ ލީގު ދިފާއު ކުރެވޭނެ ކަމުގެ އުންމީދު ކުޑަ އެވެ. ބަޔާންގެ ކޯޗުކަމުން ޓުޗެލް ވަކިވާން ނިންމީ ވެސް، މި ސީޒަންގައި އެ ކުލަބުގެ ނަތީޖާތައް ދަށްވެފައިވާތީ، ކުލަބުގެ އިސްވެރިންނާއެކު ކުރިއަށް ގެންދިޔަ މަޝްވަރާތަކަށްފަހު އެވެ.