އޮޕަރޭޝަން ތިއޭޓަރުތަކަށްވެސް އޭއައި ޓެކްނޮލޮޖީ!

ޓެކްނޮލޮޖީގެ މައިދާނުގައި ހޯދަމުން އަންނަ ހައިރާން ކުރުވަނިވި ކުރިއެރުންތަކުގެ ވާހަކަދައްކާއިރު، ވަކިން ޚާއްސަކޮށް ސިއްހީ ދާއިރާއާ ގުޅުންހުރި ޓެކްނޮލޮޖީ އިންގިލާބަކީ އެންމެ ގިނަ ބައެއްގެ ސަމާލުކަން ހުއްޓޭ އެއް ދިމާއެވެ. ހުސްވި ފެބުރުއަރީ މަހުގެ ފަހު ހަފުތާގައި، ސްޕެއިންގެ ބާސެލޯނާގައި ކުރިއަށް ގެންދިޔަ މޯބައިލް ވޯރލްޑް ކޮންގްރެސްއަކީ، މި ދެންނެވި ފަދަ އިންގިލާބީ ސިއްހީ ޓެކްނޮލޮޖީގެ އުފެއްދުންތަކުން އެންމެ ފަހުން ފެނިގެން ދިޔަ އެއް އިވެންޓެވެ.

ސިއްހީ ދާއިރާގެ ކުރިއެރުން، އައު ހަރުފަތަކަށް ގެންގޮސްދިން އެއް ޓެކްނޮލޮޖީއަކީ އާޓިފިޝަލް އިންޓެލިޖެންސް (އޭއައި) ނުވަތަ މަސްނޫއީ ތޫނުފިލިކަމެވެ. މޯބައިލް ވަރލްޑް ކޮންގްރެސްއިން ފެނުނު، ސަރޖިކަލް ރޮބޮޓް ނުވަތަ އޮޕަރޭޝަން ކުރާ ރޮބޮޓް ޑޮކްޓަރަކީ މި ދެންނެވި ގޮތަށް، މަސްނޫއީ ތޫނުފިލިކަމުގެ ޓެކްނޮލޮޖީން ތަރައްގީކޮށް، ފައްކާ ކޮށްފައިވާ އުފެއްދުމެކެވެ.

ރޮބް ސަރޖިކަލްގެ ސީއީއޯ އަދި ފައުންޑަރު، ޖައުމެ އަމާތު ރިއޭރާ ފާހަގަކުރި ގޮތުގައި، އިންތިހާއަށް ހައްސާސް އަދި ކަވި ސަރޖަރީތައް ހަދަމުންދާއިރު، އެ ތަނުގައި ހުންނަ އަސްލު ޑޮކްޓަރުގެ ހިއްސުތަކަށް އިހްސާސްތަކެއް ކޮށްދެއެވެ. މިއީ އިންތިހާއަށް ކްރިޓިކަލް ފައްތަރުތަރުގައި ޑޮކްޓަރުންނަށް ލިބޭނެ ކުޑަ ނަމަވެސް ތަސައްލީއަކަށް ވާނެއެވެ.

އޮޕަރޭޝަން ނުވަތަ ސަރޖަރީގެ މުސްތަގުބަލުވެސް ގުޅިފައި އޮތީ ޑިޖިޓަލް ދުނިޔެއަކާއެވެ. ރިއެރާ ބުނިގޮތުގައި، އެ ކުންފުނިން ޢަމާޒު ހިފާފައިވަނީ ރޮބޮޓް ޓެކްނޮލޮޖީއާއި އޭއައި އަދި ޑައެގްނޯސްޓިކް އިމޭޖް ގުޅާލައިގެން އިންގިލާބީ ކުރިއެރުންތަކެއް ހާސިލުކުރުމަށެވެ.

މޯބައިލް ވަރލްޑް ކޮންގްރެސްއިން ގިނަ ބައެއްގެ ސަމާލުކަން ދަމައިގަތް އަނެއް އުފެއްދުމަކީ ފުރޮޅުލީ ހޮސްޕިޓަލެކެވެ. އެއްތަނުން އަނެއް ތަނަށް ފަސޭހަ ކަމާއެކު ގެންދެވޭ މި ހޮސްޕިޓަލް ފަރުމާކޮށްފައިވަނީ، ޕޭޝަންޓުންނާ އެންމެ ގާތުން ޚިދުމަތް ދޭން ތިބޭ ޓެކްނީޝަނުންނާ ޑޮކްޓަރުންނާ ދެމެދު އޭއާރް އައިނު ބޭނުންކޮށްގެން ވީޑިއޯ ކޮންފަރެންސް ކުރެވޭ ގޮތަށެވެ. އޭގެ އިތުރުން، ސްޓްރޯކް ޖެހުމަށްފަހު ސިކުނޑިއަށް އަންނަ ބަދަލުތައް ވަގުތުން މޮނިޓަރ ކޮށްލެވޭ ގޮތަށް ފަރުމާކޮށްފައިވާ ހެޑްބޭންޑެއް ވެސް ދައްކާލާފައިވެއެވެ.

މޯބައިލް ވަރލްޑް ކޮންގްރެސްއަކީ ޓެކްނޮލޮޖީއާއި ޓެލެކޮމް ނުވަތަ މުވާސަލާތީ ޚިދުމަތް ދޭ ކުންފުނިތަކުން އައު އުފެއްދުންތަކާއި އިންގިލާބީ އީޖާދުތައް ދައްކާލާ މައުރަޒެކެވެ. މި ފަހަކަށް އައިސް ކުރިއަށްގެންދާ މިފަދަ ހުރިހާ މައުރަޒެއްގެ މައިގަނޑު މައުލޫއަކަށް ވެފައި އޮންނަނީ މަސްނޫއީ ތޫނިފިލިކަމެވެ.

ތަޖުރިބާކާރުންގެ ވާހަކަތަކަށް ބަލާއިރު، އޭއައި ޓެކްނޮލޮޖީއަކީ އޭގެ ސުލޫކީ އަދި ގާނޫނީ މިންގަނޑުތަކާމެދު ބަހުސްތަކެއް އުފައްދަނިވި ފުރުސަތު އޮތް ޓެކްނޮލޮޖީއެކެވެ. ނަމަވެސް ސިއްހީ ދާއިރާއަށް އޭއައި ޓެކްނޮލޮޖީ ތައާރަފުކޮށް ހުށަހަޅާ ފަރާތްތަކުން ވަކާލާތުކުރާ ގޮތުގައި، މިއީ އެތަނެއްގެ ސިއްހީ ޚިދުމަތުގެ ގާބިލުކަން އިތުރުކޮށްދޭނެ ކަމެކެވެ. އަދި އެ ތަނެއްގައި މަސައްކަތްކުރާ މުވައްޒަފުންނާއި އެ ތަނަކުން ޚިދުމަތް ހޯދާ ބަލި މީހުންނަށްވެސް އެކަމުގައި ފައިދާތަކެއް އެކުލެވޭ ކަމެއް ކަމަށްވެސް އެ މީހުން ބުނެއެވެ.