ބަޔަކު ނާޖާއިޒު ފައިދާތަކެއް ނަގަމުން ދިޔަ ކަމުގައި ވީ ނަމަވެސް، އަރޓިފިޝަލް އިންޓެލިޖެންސް (އޭއައި) ނުވަތަ މަސްނޫއީ ތޫނުފިލި ކަމުގެ ޓެކްނޮލޮޖީގައި ހުރި ފައިދާތައް ހަނދާން ނައްތާލެވޭކަށް ނެތެވެ. އޭއައި ޓެކްނޮލޮޖީގެ ސަބަބުން ދިރިއުޅުމަށް ލިއްބައިދޭ ލުއި ފަސޭހަ ކަމުގެ އިތުރަށް، ޞިއްޙީ ދާއިރާއަށް ލިބެމުން ދާ ކުރިއެރުންތައްވެސް ގިނަގުނައެވެ. ދުނިޔޭގެ އެކި ކަންކޮޅުތަކުގައި މިހާރުވެސް ޞިއްޙީ އެކިއެކި ފަރުވާތަކުގައި އޭއައި ޓެކްނޮލޮޖީ ބޭނުން ކުރެއެވެ. އެގޮތުން، އިނގިރޭސިވިލާތުގެ ނޭޝަނަލް ހޮސްޕިޓަލް ފޮރ ނިއުރޮލޮޖީ އެންޑް ނިއުރޯސަރޖަރީ (އެންއެޗްއެންއެން) އަކީވެސް އޭއައި ޓެކްނޮލޮޖީގެ ބޭނުން ހެޔޮ ގޮތުގައި ހިފަމުން ދާ ހޮސްޕިޓަލެކެވެ.

އިނގިރޭސިވިލާތުގެ ނޭޝަނަލް ހޮސްޕިޓަލް ފޮރ ނިއުރޮލޮޖީ އެންޑް ނިއުރޯސަރޖަރީއިން އޭއައި ޓެކްނޮލޮޖީ ބޭނުން ކުރަނީ، ސިކުނޑީގެ ސަރޖަރީގެ ރޮނގުން ޑޮކްޓަރުން ތަމްރީނު ކުރުމަށެވެ. ޑޮކްޓަރުން ތަމްރީނު ކުރަމުން ދަނީ، ސިކުނޑީގައި ކުރަން ޖެހޭ ކުރިޓިކަލް އޮޕަރޭޝަންތައް، ވީހާވެސް ރައްކާތެރިކަމާއި، ކާމިޔާބު ކަމާއެކު ކޮށް ނިންމާލުމަށް ކަމަށް އެންއެޗްއެންއެންއިން ބުނެއެވެ.

އެންއެޗްއެންއެންގެ ޑޮކްޓަރުން ތަމްރީނު ކުރުމަށް ބޭނުން ކުރާ ނިޒާމް ތައްޔާރުކޮށް ނިންމާލުމުގެ މަސައްކަތް ކުރިއަށް ދަނީ ޔުނިވަރސިޓީ ކޮލެޖު ލަންޑަން (ޔޫސީއެލް)ގައެވެ. އެ ނިޒާމު ފަރުމާ ކޮށްފައި ވަނީ، ސިކުނޑީގެ ކްރިޓިކަލް ކަންކަމަށް ރިޢާޔަތް ކުރަނިވި ހެން، އޮޕަރޭޝަން ޑޮކްޓަރުގެ ސަމާލުކަމަށް، އެކަންކަން އަރާނެ ފަދަ ގޮތަކަށެވެ.

ސިކުނޑީގެ ސަރޖަރީއަކީ އަބަދުވެސް، އޮޕަރޭޝަން ކުރަމުން ދާ ވަޤުތު، އޮޕަރޭޝަން ކުރަމުން ދާ ސަރަޙައްދުގެ މަންޒަރުތައް ވަގުތުން ވަގުތަށް ސްކްރީނަކުން ފެންނާނެހެން ކުރަމުން ދާ އޮޕަރޭޝަންއެކެވެ. އޭއައި ޓެކްނޮލޮޖީ ބޭނުން ކުރަން ފެށުމާއެކު، އެ ވީޑިއޯއިން ފެންނަ ކަންކަން އޭއައި ނިޒާމުގެ ތެރެއިން ދެނެގަންނާނެއެވެ. އަދި ފެންނަމުން ދާ މަންޒަރުތައް ފަޙުމްކޮށްދިނުމަށް، ނުވަތަ ވަމުން ދާ ގޮތް ދެނެގަތުމަށް ޑޮކްޓަރުންނަށް އެހީތެރިކަން ފޯރުކޮށްދޭނެއެވެ.

އީޕީއެސްސީއާރް ސެންޓަރ ފޮރ އިންޓަރވެންޝަނަލް އެންޑް ސަރޖިކަލް ސައެންސަސްގެ ޑެޕިއުޓީ ޑައިރެކްޓަރ އޮފް ވެލްކަމް، ހާނީ މަރކަސް ފާހަގަ ކުރެއްވި ގޮތުގައި، ސަރޖަރީގެ ފެންވަރު ރަނގަޅު ކުރުމަށް، އޭއައި ޓެކްނޮލޮޖީއަށް އެހީތެރިކަން ފޯރުކޮށްދިނުމުގެ ދޮރު އޮތީ ހުޅުވާލެވިފައެވެ.

ސިކުނޑީގެ ސަރޖަރީ ހަދާ ޑޮކްޓަރުން ތަމްރީނު ކުރުމަށް ބޭނުން ކުރާ ނިޒާމަކީ ޕިޓުއިޓަރީ ގްލޭންޑްގައި އުފެދިފައި ވާ ޓިއުމަރުތައް ނެގުމަށް ކުރި 200 އަށް ވުރެ ގިނަ އޮޕަރޭޝަންތަކުގެ ވީޑިއޯތައް ބަލާ، އެ ވީޑިއޯތައް އެނަލައިޒް ކޮށްފައި ވާ ނިޒާމެކެވެ. ސަރޖަން ޑޮކްޓަރަކު 10 ވަރަކަށް އަހަރުގެ ތެރޭގައި ހޯދާ ޢަމަލީ މަސައްކަތުގެ ތަޖުރިބާ، އޭގެ 4 ބައިކުޅަ 1 ބައި ހާ ވަޤުތުގެ ތެރޭގައި، އޭއައި ނިޒާމުން ލިބިގެންފައި ވާ ކަމަށްވެސް މަރކަސް ވަނީ ފާހަގަ ކުރައްވާފައެވެ.

ނަތީޖާއެއްގެ ގޮތުން، ސިކުނޑީގައި އޮޕަރޭޝަން ކުރަން ޖެހޭ ސީދާ މިޞްރާބަށް ޑޮކްޓަރުންގެ ސަމާލުކަން ގެންގޮސްދެއެވެ. އަދި ސަރޖަރީގެ ކޮންމެ މަރުޙަލާއެއްގައި ކަންތައްތައް ވަމުން ދާން ޖެހޭނެ ގޮތްވެސް ޑޮކްޓަރުންނަށް އަންގައިދެއެވެ. ނިއުރޯސަރޖަރީގެ ރޮނގުން ތަމްރީނު ވަމުން އަންނަ، އަދި ޔޫސީއެލްގައި އޭއައިގެ ރޮނގުން ދިރާސާ ކުރަމުން އަންނަ ދަންޔާލް ޚާން ފާހަގަ ކުރި ގޮތުގައި މި އޭއައި ނިޒާމަކީ، ތަމްރީނުތަކުގައި ބޭނުން ކުރުމަށް ލިބޭ ވަރަށް ރަނގަޅު އެހީއެކެވެ. ތަމްރީނުތަކުގައި އެހީއެއްގެ ގޮތުގައި ބޭނުން ކުރަމުންދާ ސޮފްޓްވެއަރ ފަރުމާ ކުރުމުގައިވެސް ޚާން ވަނީ މަސައްކަތް ކޮށްފައެވެ.

ދާއިރާގެ އެންމެ ފުންނާބު އުސް ތަޖުރިބާކާރުންގެ ތެރޭގައި ގުނާލެވޭ މެންބަރުންގެ ޓީމަކުން ތަރައްޤީ ކުރަމުން ދާ ނިއުރޯސަރޖަރީ އޭއައި ނިޒާމް ފައްކާ ކުރުމަށް ފަހު، އޮޕަރޭޝަން ތިއޭޓަރުތަކުގައި ޢަމަލީ ގޮތުން ބޭނުން ކުރެވޭ ވަރު ވާނީ، އަދި 2 އަހަރެއްހާ ދުވަސް ފަހުން ކަމަށް ޔޫސީއެލްއިން ވަނީ ބުނެފައެވެ.