40 އަކަށް އަހަރު ކުރިން އޭއައިގެ އިންޒާރު ދިން ކެމެރަންގެ ފިލްމެއްގައި އެ ޓެކްނޮލޮޖީ؟

ދުނިޔެ އަދު ދެކެމުން މިދާ ޓެކްނޮލޮޖީގެ އިންޤިލާބީ ރޭހުގައި އެންމެ ގިނަ ބައެއްގެ ސަމާލުކަން ހޯދާފައި ވާ އެއް ދާއިރާއަކީ މަސްނޫއީ ތޫނުފިލިކަން ނުވަތަ އަރޓިފިޝަލް އިންޓެލިޖެންސް (އޭއައި) ޓެކްނޮލޮޖީއެވެ. އޭއައި ޓެކްނޮލޮޖީގެ އެހީގައި ދިރިއުޅުމުގެ އެތައް ކަމަކަށް، ވަކިން ޚާއްޞަކޮށް ފަންނީ ދާއިރާގެ މަސައްކަތްތަކަށް ލުއި ލިބެމުން ދެއެވެ. މީހަކަށް ބޮޑު އަގު ދީގެން މީގެ ކުރިން ކުރުވި މަސައްކަތްތައް، އޭއައި ޓޫލް ބޭނުން ކުރާ ޕްލެޓްފޯމެއް މެދުވެރިކޮށް، އެތައް ގުނައެއް އަގު ހެޔޮކޮށް ނުވަތަ އެއްވެސް އަގަކާ ނުލާވެސް ކޮށް ނިންމާލެވެއެވެ. އޭއައި ޓެކްނޮލޮޖީއަށް އޮންނަ ތަރުހީބާ އެއްވަރަށް، މިކަމުގެ ސަބަބުން އިންސާނުންގެ ފިކުރީ ޙައްޤުތަކަށް އުނިކަން ލިބޭ ކަމުގެ ބަހުސްގެ އަޑުވެސް ދަނީ އިންތިހާއަށް ގަދަ ވަމުންނެވެ.

އޭއައި ޓެކްނޮލޮޖީގެ ސަބަބުން އިންސާނުންނަށް އޮތް ނުރައްކަލާ ބެހޭ ގޮތުން އެންމެ ފަހުން ވާހަކަ ދެއްކި އެކަކީ، އިތުރު ތަޢާރަފަކަށް ބޭނުން ނުވާ ހޮލީވުޑްގެ ކުޅަދާނަ ޑައިރެކްޓަރ ޖޭމްސް ކެމަރަންއެވެ. ކެމެރަން އަކީ އޭއައި ޓެކްނޮލޮޖީގެ ފަލްސަފާއަށް ބީރައްޓެހި މީހެއް ނޫނެވެ. އޭނާގެ ތާރީޚީ ފިލްމު 'ޓަރމިނޭޓަރ' ބިނާކޮށްފައި ވަނީވެސް، މަސްނޫއީ ތޫނުފިލިކަން ލިބިފައި ވާ މެޝިންތަކެއް މުޅި ދުނިޔެއަށް އަތްގަދަ ކުރަމުން ދާ ދިއުމުގެ މައްޗަށެވެ.

ކެނެޑާގެ ބްރޯޑްކާސްޓަރެއް ކަމަށް ވާ ސީޓީވީއަށް ދިން އިންޓަރވިއެއްގައި ކެމަރަން ބުނީ، އޭއައިގެ އިންޒާރު، 1984 ވަނަ އަހަރު އޭނާ ދީފައި ވާނެ ކަމަށާ، ނަމަވެސް އެއްވެސް މީހަކު އޭރު އޭނާގެ އަޑު ނޭހި ކަމަށެވެ. ކެމެރަންގެ ނަޒަރުގައި، އޭއައިގެ ސަބަބުން ކުރިމަތިވެދާނެ އެންމެ ނުރައްކަލަކީ ކޮބައިތޯ ބަލާލުން މުހިންމެވެ.

އަދި އެވަރުން ނިމުނީއެއް ނޫނެވެ. އަސްކަރީ މައިދާނުގައި ދުނިޔެ ދުށް އެންމެ ނުރައްކާތެރި ހަތިޔާރަކީ ނިއުކްލިއަރ ހަތިޔާރު ކަމަށް ވާ އިރު، ނިއުކްލިއަރ ހަތިޔާރުގެ ބާރުވެރިކަން ކަށަވަރު ކުރުމަށް ޤައުމުތަކުން ޖަހާ ރޭހުގެ ބީދައިން، ހަމަ އެފަދަ ވާދަވެރިކަމެއް، އޭއައި ޓެކްނޮލޮޖީގެ ސަބަބުންވެސް ފެށި ދާނެ ކަމަށް ކެމަރަން ޤަބޫލު ކުރެއެވެ.

ހޮލީވުޑްގެ އަދުގެ މަސްރަހަށް ބަލާލުމުން އެކަނިވެސް ކެމަރަންގެ ވާހަކަތަކުގައި ޙަޤީޤަތް އެކުލެވޭ މިންވަރު ހާމަވެއެވެ. މި ދުވަސްވަރަކީ ހޮލީވުޑްގެ ގިނަ ޢަދަދެއްގެ ލިޔުންތެރިންނާއި އެނޫންވެސް ފަންނީ ދާއިރާތަކުގެ މީހުން، ވަރުގަދަ ހަޅުތާލެއް ކުރަމުންދާ ދުވަސްވަރެކެވެ. ހަޅުތާލުގެ އަސްލު ގޮސް ގުޅެނީވެސް މަސްނޫއީ ތޫނުފިލިކަމާއެވެ.

ފިލްމީ ދާއިރާގައި ގިނަ ބައެއްގެ ބަސް ހުއްޓުވާލި މަސައްކަތްތަކެއް ކޮށްފައިވާ ކެމެރަންގެ އެންމެ ފަހުގެ ފިލްމު 'އެވަޓަރ: ދަ ވޭ އޮފް ވޯޓަރ'އަށް ދުނިޔޭގެ އެކިކަންކޮޅުތަކުން 2.32 ބިލިއަން ޑޮލަރުވަނީ ލިބިފައެވެ. ކެމެރަން ބުނި ގޮތުގައި އޭއައި ޓެކްނޮލޮޖީގެ އެހީގައި ސްކްރީންޕްލޭ ލިޔުމާ މެދު، ޚުދު އޭނާވެސް ދެގޮތަކަށް ވިސްނުން ގެންގުޅުނު ކަމަށެވެ.

އޭއައި ޓެކްނޮލޮޖީގެ އެހީގައި ކެމެރަންގެ ފިލްމެއްގެ ސްކްރިޕްޓް ތައްޔާރުކޮށްފާނެބާއެވެ؟ ނުކުރާނެއެކޭ ބުނެވޭކަށް ނެތެވެ. ސަބަބެއް ނެތިއެއް ނޫނެވެ.

މަސްނޫއީ ތޫނުފިލިކަން ނުވަތަ އޭއައި ޓެކްނޮލޮޖީގެ ބަހުސްތަކަކީ ބައިނަލްއަޤުވާމީ ސިޔާސީ ޕޯޑިއަމްތަކުގައިވެސް ހޫނުކޮށް ކުރިއަށް ގެންދާ ބަހުސެކެވެ. އޭއައި ޓެކްނޮލޮޖީގެ ކަންކަން ރެގިއުލޭޓްކޮށް، ޤާނޫނީ ޤަވައިދާއި ހަމަތަކުގެ ތެރެއިން ރެގިއުލޭޓް ކުރާނެ އުސޫލުތަކަކަށް މުޅި ދުނިޔެ ވަނީ ބޭނުން ވެފައެވެ.